EFESO 5
5
Na Bula ena Rarama
1Me vaka ni o ni sa luvena lomani na Kalou, ni tovolea sara mada mo ni vakadamurimuri koya. 2#Lako 29.18; Same 40.6Mo ni vakaitovotaki kemuni tikoga ena loloma; me vaka na nona lomani keda na Karisito ka solia na nona bula ena vukuda, me i solisoli vinaka ka i soro e vakalomavinakataka na Kalou.
3Me vaka ni o ni sa tamata lotu, sa sega ni kilikili kina me cavuti ena kemuni maliwa na veibutakoci, na i tovo vakasisila eso ni veidauci, kei na daukocokoco. 4E sega talega ni rakorako mo ni vakayagataka na veivosa vakasisila eso, se na veiwali ca, se na vosa ca, ni sa tawa kilikili na veika oqori. Ia mo ni ia ga na vakavinavinaka vua na Kalou. 5Mo ni kila deivaki sara oqo: ni sa sega sara ni dua na nona i votavota ena matanitu i Karisito kei na matanitu ni Kalou o koya sa dauveibutakoci, se tamata i tovo dukadukali, se dua e daukocokoco (ni sa dua na tiki ni dauqaravi kalou lasu na kocokoco).
6Me kakua ni dua me vakacalai kemuni ena veivosa tawayaga. Ni sai ira oqo na veika ena yaco kina na cudru ni Kalou vei ira na dautalaidredre vua. 7Sa i koya oqo mo ni kua kina ni malele vei ira. 8Ni o ni a dau tu eliu ena butobuto, ia ni o ni sa yaco mo ni sa nona tamata na Turaga, o ni sa tu ena rarama. Ia mo ni bula voli me vaka na luve ni rarama. 9Ni sa vua ni rarama na i valavala kecega e vinaka, dodonu ka dina. 10Mo ni tovolea sara mo ni kila na ka e vinakata na Turaga. 11Ni kakua ni malele vei ira na tamata era dau cakava na i valavala ni butobuto ka sega ni yaga, ia mo ni vakaraitaka mai na veika oqori ki na rarama me laurai votu. 12Ni sa ka vakamadua na veivosakitaka na veika era dau vakayacora vuni. 13Ia ni sa kau mai e dua na ka ki na rarama, sa yaco me laurai, ni sa rarama na ka kecega sa vakavotui. 14Ni veika kecega sa vakavotui ena rarama. O ya na vuna sa kainaki kina:
“O iko na daumoce, mo yadra mai,
Ka tucake mai na mate,
Ena qai vakararamataki iko na Karisito.”
15Mo ni qarauna vinaka sara kina na nomuni i valavala ni bula. Ni kakua ni vakataki ira na tamata dauvakalecalecava na ka, ia ni vakataki ira ga na yalomatua. 16#Kolo 4.5Vakayagataka vinaka na gauna ka ni sa gauna ca na veisiga oqo. 17Ni kakua ni yalowai, ia ni vakasaqara ga na veika e vinakata na Turaga mo ni cakava.
18O koya oqo mo ni kakua kina ni daumateni, ni sa dau yaco kina na ka vakasisila, ia mo ni vakasinaiti ga ena Yalo Tabu. 19#Kolo 3.16,17Mo ni veivosaki vakai kemuni ena same, kei na sere, kei na meke vakayalo; ni laga sere kei na same vua na Turaga ena vakavinavinaka e lomamuni. 20Ni vakavinavinaka tikoga vua na Kalou na Tamada ena vuku ni ka kecega, ena yaca ni noda Turaga ko Jisu Karisito.
Na Tagane kei na Yalewa Vakawati
21Ni dui vakamalumalumutaki kemuni vakai kemuni ena nomuni dokai Karisito.
22 #
Kolo 3.18; 1Pita 3.1 Kemuni na yalewa vakawati, ni dui vakamalumalumutaki kemuni vei ira na dui watimuni me vaka na nomuni vakayacora vakakina vua na Turaga. 23Ni sa ulu ni yalewa vakawati na watina me vaka sa ulu ni soqosoqo lotu na Karisito, ka sai vakabula talega ni yago o koya. 24Me vaka sa vakarorogo na i soqosoqo lotu vei Karisito, me ra vakarorogo vaka talega kina na yalewa vakawati vei ira na watidra ena ka kecega.
25 #
Kolo 3.19; 1Pita 3.7 Kemuni na tagane vakawati, ni lomani ira na dui watimuni me vaka sa lomana na i soqosoqo lotu na Karisito ka solia na nona bula ena vukuna. 26A sa cakava oqo me vakacabora kina na i soqosoqo lotu vua na Kalou mai na nona vosa, ni sa vakasavasavataka oti ena nona vuya ena wai, 27me rawa kina ni cabora na i soqosoqo lotu ena kena i serau uasivi ki vua, ni sa savasava sara ka dodonu, sa sega ni tauvi duka se sasanukinuki, se dua na ka me vakamelei kina. 28Sa kilikili me ra lomani ira vakakina na watidra o ira na tagane vakawati me vaka na nodra lomana na yagodra dina. 29Ni sa sega ni dua e dau cata na yagona dina, ia sa dau vakania ga ka maroroya, me vaka ga sa dau cakava na Karisito ki na i soqosoqo lotu; 30ni da sa veitiki ni yagona. 31#Vteki 2.24Me vaka sa kaya na i Vola Tabu, “Na ka oqo ena biuta kina na tamana kei na tinana na tagane me rau duavata kei na watina, ka rau na yaco me duabau ga.” 32Sa i koya oqo e dua na ka vuni titobu sara, ka'u sa kila ni sai dusidusi ni Karisito kei na i soqosoqo lotu. 33Ia mo ni dui lomani ira vaka talega kina na dui watimuni me vaka na nomuni dui lomani kemuni; ia na yalewa vakawati me vakarokorokotaka na watina.
Currently Selected:
EFESO 5: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.