2 SAMUELA 3
3
1Era a vala vakadede sara na vuvale i Saula kei ira na vuvale i Tevita; ka tubu cake me kaukauwa tikoga mai o Tevita, ka ra malumalumu sobu tikoga na vuvale i Saula.
Ira na Luve i Tevita Tagane
2Era a sucu mai Epironi, eso na luve i Tevita tagane ka nona ulumatua o Amoni, ka tinana o Einoami na yalewa ni Jesireli, 3kei na kena i karua o Kiliavi, ka tinana o Avikali, na yalewa ni Kameli, na yada i Nepali; kei na kena i katolu o Apisalome na luve i Meka na luve i Talimei na tui Kesuri; 4kei na kena i ka va o Atonaija na luve i Akici, kei na kena i kalima o Sefataia, na luve i Avikali; 5kei na kena i kaono o Iciriami, na tinana o Ekila na wati Tevita. O iratou oqo na luve i Tevita, ka ra sucu mai Epironi.
6Ia ni ra a vala tiko na vuvale i Saula, kei na vuvale i Tevita, a vakataudeitaki koya o Epineri me kaukauwa ena vuvale i Saula. 7Ia e dua tiko na wati Saula e watina lailai o Risipa na yacana, na luve i Aia; a kaya vei Epineri o Isiposeci, “A cava li o mocera kina na wati tamaqu?” 8A cudru katakata o Epineri, ena vuku ni vosa i Isiposeci, ka kaya vua, “Oi au beka na ulu ni koli i Juta? A caka vinaka tiko ena gauna oqo ki na vuvale i Saula na tamamu, kei iratou na tacina kei na wekana, ka sega ni soli iko yani ki na liga i Tevita; ia o beitaki au edaidai ni'u cala ena vuku ni yalewa o ya? 9#1Samu 15.28 Me cakacaka vakakina na Kalou vei Epineri, ka vakaikuritaka talega kevaka au sega ni cakava vei Tevita me vaka sa bubului kina vua ko Jiova; 10me tokia na matanitu mai na vuvale i Saula, ka me vakatura cake na i tikotiko vakaturaga i Tevita me lewai ira na Isireli kei ira na Juta, me vakatekivu mai Tani me yaco sara yani ki Perisepa.” 11A sega ni vosa rawa tale vei Epineri o Isiposeci, ni a rerevaki koya.
12A tala o Epineri eso na mata vei Tevita mai Epironi,#3.12 E dua na i vakavakadewa makawa vakirisi mai Epironi; Vakaiperiu e sega kina na “mai Epironi”. ka kaya, “O cei li e nona na vanua? Me daru cakava mada e dua na veiyalayalati, ka'u na vukei iko ena nodra vakalesui kece mai na Isireli vei iko. 13A sa kaya o Tevita, “Sa donu vinaka; au na veiyalayalati kei iko; ia e dua ga na ka au vinakata mo cakava, o ya mo kauti Mikali mai na luve i Saula yalewa ena nomu lako mai mo mai raici au.” 14A sa tala eso na tamata o Tevita vei Isiposeci na luve i Saula, ka kaya, “Mo solia mai na watiqu o Mikali. Au a sauma ena dua na drau na vusodra na kai Filisitia me rawa ni'u vakawatitaki koya kina.”#1Samu 18.27
15A sa veitalaki o Isiposeci ka sa kau mai o Mikali mai vua na watina o Paliteli na luve i Laisi. 16Ia sa vakamumuri ga o Paliteli na watina, ka tagi voli ena gaunisala me yaco sara ki Peurimi. A qai kaya vua o Epineri, “Mo lesu tale ki nomu vale!” A sa lesu yani o Paliteli.
17A veivosaki kei ira na qase ni Isireli o Epineri, ka kaya, “Ena vica na gauna sa oti yani, o ni a qarai Tevita me nomuni tui. 18Ia oqo, mo ni vakayacora; me vaka ni a yalataka ko Jiova vei Tevita, ka kaya, ‘Ena liga i Tevita na noqu tamata, au sa vakabulai ira kina na noqu tamata na Isireli mai na ligadra na kai Filisitia, kei na ligadra na kedra meca kecega.’ 19A vosa talega o Epineri vei ira na Penijamini; ka lako talega ki Epironi me vosa vei Tevita ena veika kecega a nanuma ni vinaka vei ira na Isireli kei ira na Penijamini.
20Ni sa lako mai vei Tevita ki Epironi o Epineri kei na nona tamata era lewe ruasagavulu, a sa vakarautaka o Tevita e dua na kedra magiti. 21A sa kaya vei Tevita o Epineri, “Au na tucake ka lako, ka vakasoqoni ira vata kecega na Isireli vua na noqu turaga na tui, ka me caka na veiyalayalati kei kemuni, mo ni lewai ira kecega sa vinakata na yalomuni.” A talai Epineri yani o Tevita; a lako yani ena vakacegu o koya.
Vakamatei Epineri o Joape
22Ia ena gauna vata o ya, era a qai suka mai ena i valu o ira na tamata i Tevita kei Joape, a levu sara na i toki era a kauta mai; a sega ni tiko kei Tevita mai Epironi o Epineri, ka ni a talai koya yani ena vakacegu. 23Ia ni lako mai o Joape, ka vaka, “A lako mai vua na tui o Epineri na luve i Neri, a talai koya yani na tui me lako ga ena vakacegu.” 24A lako vua na tui o Joape, ka kaya vua, “A cava o sa cakava? Raica, a lako mai vei kemuni o Epineri; a cava li o ni a talai koya yani kina vaka o ya? 25O sega li ni kila ni a lako mai o Epineri, na luve i Neri, me vakacalai kemuni, me kila na nomuni veilakoyaki, kei na veika kecega o ni a cakava?”
26Ia ni a lako tani mai vei Tevita o Joape, a qai tala o koya eso na tamata me ra muri Epineri, me ra la'ki vakalesui koya mai na mata ni wai mai Sira, sa sega ni kila na ka oqo o Tevita. 27Ia ni lesu mai ki Epironi o Epineri, a qai kauti koya vakatikitiki ki na matamata ni koro o Joape, me vosa vua, a cokai koya mai kea e ketena, a mate kina o Epineri, me'i sau ni dra i Asaeli na tacina.
28Ia ni rogoca o Tevita, na i tukutuku, a kaya, “Au sa sega ni cala ka tawa mudu o au kei na noqu matanitu ena mata i Jiova ena vuku ni dra i Epineri na luve i Neri. 29Me lutuka mada ga na ulu i Joape, kei na vuvale taucoko i tamana; ia me kakua mada ga ni dua na gauna me sega kina ni dua ena vuvale i Joape na tamata sa turu dra balavu, se na vukavuka, se e dua sa vakaititoko voli, se e dua e bale ena i seleiwau, se e dua sa dravudravua ena kakana.” 30E rau a vakamatei Epineri o Joape kei na tacina o Avisai, me i sau ni dra i tacidrau o Asaeli ena i valu mai Kipioni.
31A vosa o Tevita vei Joape, kei ira kecega era tu vata, ka vaka, “Mo ni dresulaka na nomuni i sulu, ka tokara na i sulu taga, ka tagicaki Epineri.” A muria na tavata o Tevita na tui. 32Era a buluti Epineri mai Epironi; a tagi vakadomoilevu na tui mai na i bulubulu i Epineri ka vaka talega kina o ira kecega na tamata. 33A sa tagicaki Epineri na tui ena sere oqo:
A cava sa mate kina o Epineri me vaka e dua na tamata lialia?
34A sa sega ni vesuki na ligana,
A sa sega ni vesuki na yavana;
A sa mate ga me vaka e dua sa vakamatei mai vei ira na tamata ca!”
Era sa qai tagicaki koya tale o ira kecega na tamata.
35Ena siga taucoko o ya era a tovolea na tamata me ra vakamasuti Tevita me kania e dua na kakana, ia sa vosa bubului ga o koya ka kaya, “Me qai yaco ga vei au na veivakarusai ni Kalou kevaka au sa kania e dua na ka ni se bera ni oti na siga edaidai.” 36Era a vakasamataka na tamata kecega na ka oqo ka yalo vakacegu kina. Ni sa dau vakalomavinakataki ira na tamata na veika kece sara e dau vakayacora na tui. 37Era a kila o ira kecega na tamata kei ira kece na Isireli ena siga o ya ni a sega ni vuna na tui na mate i Epineri, na luve i Neri. 38A sa kaya na tui vei ira na nona vakailesilesi, “Dou sega beka ni kila ni a bale edaidai e dua na i liuliu rogo ka kilai e Isireli? 39E dina ga ni sa digitaki au na Kalou me'u tui, sa dua na malumalumu sa yacovi au ga edaidai. O iratou na luvei Seruwaia oqo eratou sa rui tamata voravora vei au. Me qai sauma ga ko Jiova na caka ca oqo me vaka sa veiganiti kaya!”
Currently Selected:
2 SAMUELA 3: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.