2 SAMUELA 2
2
1Ia ni sa oti na ka oqo, sa qai tarogi Jiova o Tevita, ka kaya, “Me'u lako cake beka ki na dua na nodra koro na Juta, se me'u kakua?”
A sa kaya vua ko Jiova, “Io, mo lako.”
A sa kaya o Tevita, “Na koro cava beka me'u lako kina?”
A sa kaya vua ko Jiova, “Ki Epironi.” 2E ratou sa qai lako cake kina o Tevita kei rau talega na watina, o Einoami na yalewa ni Jesireli kei Avikali na yalewa ni Kameli, na yada i Nepali.#1Samu 25.42-43 3A sa kauti ira cake na nona tamata era tu vata o Tevita; na tamata yadua kei ira na nona lewe ni vale ka ra la'ki vakaitikotiko ena veikoro mai Epironi. 4Era a qai lako mai na Juta, ka lumuti Tevita me nodra tui.#1Samu 31.11-13
Era a qai tukuna vei Tevita, “Sai ira na kai Jepesi mai Kiliati sa buluti Saula,” 5a sa qai tala o Tevita eso na nona tamata vei ira na kai Jepesi mai Kiliati, ka kaya vei ira, “Me vakalougatataki kemudou ko Jiova ni dou sa vakaraitaka na nomudou yalodina vei Saula na nomudou turaga, ni dou sa buluti koya. 6Ia oqo me qai vakaraitaka ko Jiova vei kemudou na nona loloma tudei kei na nona yalodina. Oi au talega ka'u na caka vinaka vei kemudou ena vuku ni ka oqo. 7Ia oqo mo ni kaukauwa ka qaqa! Sa mate o Saula na nomuni tui, ka ra sa lumuti au na Juta me'u nodra tui.”
Buli me Tui Isireli o Isiposeci
8A sa kauti Isiposeci na luve i Saula o Epineri na luve i Neri ka kavetani ni valu i Saula, ka sa kauti koya mai Meeneimi ki Kipioni. 9A sa buli koya me tui ni vanua o Kiliati, kei Asuri,#2.9 Se Aseri kei Jesireli, kei Ifereimi, kei Penijamini, kei ira kecega na Isireli. 10Sa yabaki 40 o Isiposeci ena gauna sa buli kina oqo me tui Isireli, ka veiliutaki me yabaki rua.
Ia era a muri Tevita voli ga na yavusa Juta, 11ka a veiliutaki mai Epironi o Tevita me vitu veimama na yabaki.
Veivaluvaluti o Isireli kei Juta
12A sa lako yani mai Meeneimi ki Kipioni o Epineri na luve i Neri, kei ira na tamata i Isiposeci na luve i Saula. 13O Joape na luve i Seruwaia kei ira na tamata i Tevita era a la'ki veitavaki vei ira ena mataniwai mai Kipioni; sa tiko o Epineri kei ira na nona i lala ena dua na yasa ni drano, ka tiko na i lala i Joape ena yasana ka dua. 14A sa kaya vei Joape o Epineri, “Me ra tucake mada na cauravou ka qito vakaivalu e matada.” A sauma o Joape, “Sa donu vinaka.” 15E ratou a toso mai e lewe tinikarua ka matataki Isiposeci mai vei ira na Penijamini, ka vala kei iratou e lewe tinikarua na tamata i Tevita. 16Era a dui vesuka na ului kedra i sa ka suaka na sarisaridra ena i seleiwau, ka ra sa bale sobu ka mate kece kina na lewe 24. Ena vuku ni ka oqo sa vakatokai kina na tiki ni vanua o ya mai Kipioni me o Elakaca-asurimi, a kena i balebale, “Na Rara ni Veiseleiwau.”
17A kaukauwa sara na i valu ena siga o ya, ka vakadrukai Epineri kei ira na Isireli kina o ira na tamata i Tevita. 18E ratou a tiko tolutolu mai kea na luve i Seruwaia: o Joape, kei Apisai, kei Asaeli. Ia sa daucici me vaka na dia ni veikau o Asaeli. 19A cici muri Epineri o koya, ka sega tale ni qai gole tani ki na i matau se ki na i mawi ena nona cici voli. 20A rai mai ki muri o Epineri, ka kaya, “O iko beka oqori, Asaeli?
A sauma lesu o koya, “Io, oi ga oqo.”
21A sa kaya vua o Epineri, “Kua ni cemuri au tiko! Mo cemuria tale e dua vei ira na sotia ka taura na nona i yaragi.” Ia sa cici muri Epineri tikoga o Asaeli. 22A mani kaya tale vei Asaeli o Epineri, “Muduka na nomu cemuri au tiko! O via vakaukauwataki au li me'u vakamatei iko? Ena qai rawa vakacava me keirau veisotari e matana votu kei tuakamu o Joape?” 23Ia sa sega ga ni via soro o Asaeli; a sa qai vakasuka lesu yani vakaukauwa na dia ni nona moto o Epineri ni sa suaki Asaeli, ka la'ki curu basikata sara na dakuna na moto o ya. A sa bale sobu e kea o Asaeli ka mate kina, ka ra sa tu vakadua o ira kecega ka a yaco yani ki na tikina sa davo matemate koto kina o Asaeli.
24Ia e rau a qai muri Epineri o rau o Joape kei Apisai. Ia ni dromu tiko na matanisiga, e rau a yaco sara ki na delana o Ama, o ya a donui Qia ena sala ki veikau kei Kipioni. 25Era a soqoni vata na luve i Penijamini, ka muri Epineri, me ra dua na i lala ka ra la'ki tu ena dua na delana. 26A kacivi Joape o Epineri ka kaya, “E dodonu li me da veivaluvaluti tikoga ka tawa mudu? O ni sega beka ni raica ni tinitini ga ni veivaluvaluti sai koya na yalo ca? Eda veiwekani veivolekati tikoga oqo. A cava na kena dede mo sega ni tukuna kina vei ira na nomu tamata me sa rauta na nodra cemuri keimami tiko?
27A sa kaya vua o Joape, “Me vaka sa bula ko Jiova, kevaka o a sega ni vosa, era na sega ni cegu na noqu tamata ena cici muri iko me yacova sara na mataka.” 28A uvuca na davui o Joape, ka ra tu vakadua na tamata kecega, ka sega tale ni ra muri ira tiko na Isireli, ka sa mudu tale e kea na veivala.
29A sa tayabe yani ena Buca o Joritani o Epineri kei ira na nona tamata ena bogi taucoko o ya; ka ra kosova na Uciwai na Joritani, ka tayabe yani ena mataka taucoko o ya ni bera ni ra yaco yani ki Meenieimi.
30A lesu mai o Joape mai na nona cici muri Epineri; ia ni a vakasoqoni ira vata na nona tamata, a yali vei ira e lewe tini kaciwa na tamata i Tevita kei Asaeli. 31Ia o ira na tamata i Tevita era a vakamatea e lewe tolu na drau ka onosagavulu vei ira na Penijamini, kei ira na tamata i Epineri. 32Era a kauti Asaeli, ka buluti koya ena i bulubulu i tamana mai Peceliema. Era a lako tu ena bogi taucoko o ya na tamata i Joape ka la'ki kida vei ira na mataka mai Epironi.
Currently Selected:
2 SAMUELA 2: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.