1 CESALONAIKA 5
5
Mo ni Vakarau ni Sa Voleka Mai na Turaga
1Kemuni na veiwekani, sa sega ni yaga me'u vola yani vei kemuni na ka me baleta na gauna kei na siga eso ena vakayacori kina na veika oqo. 2#Maciu 24.43; Luke 12.39; 2Pita 3.10Ni o ni sa kila vinaka tu ni na yaco na Siga ni Turaga me vaka na nona lako voli e dua na daubutako ena bogi. 3Ena gauna era na kaya kina na tamata, “Eda sa qai vakacegu ka tiko vinaka,” ena qai yaco vakidacala vei ira na rusa me vaka na kena yaco na mosi ni kete vua e dua na yalewa bukete sa taratara, ka na sega ni dua e dro tani rawa kina. 4Ia vei kemuni na veiwekani, o ni sa sega ni tiko ena butobuto, ka sa sega kina ni dodonu me na yaco yani vakidacala vei kemuni me vaka na daubutako na Siga o ya. 5O ni sa gone ni rarama kece sara, ka gone ni siga; eda sa sega ni gone ni bogi, se gone ni butobuto. 6O koya oqo me da sa kakua kina ni moce tiko me vakataki ira na kena vo; ia me da yadra tikoga ka yalomatua. 7Ni o ira era daumoce era sa moce ena bogi, kei ira era daumateni era sa mateni ena bogi. 8#Aisea 59.17; Efe 6.13-17Ia me vaka ni da sa gone ni siga, sa dodonu kina me yalomatua. E dodonu me da tokara na vakabauta kei na loloma me i sasabai ni lomasereda, kei na noda nuitaka na veivakabulai me i vakaruru ni uluda. 9Ni a sega ni lesi keda na Kalou me da rusa, ia me da taukena ga na veivakabulai ena vuku i Jisu Karisito na noda Turaga. 10Sa i koya ka a mate ena vukuda me rawa ni da na bula vata kaya ena gauna ena lesu tale mai kina, se da bula tiko se da sa mate ena gauna o ya. 11O koya oqo mo ni veivakacegui ka veivakayaloqaqataki kina vakai kemuni, me vaka o ni sa vakayacora tiko.
Na i Otioti ni Veivakasalataki kei na Vakanuinui Vinaka
12Ia keitou sa vakamasuti kemuni na veiwekani mo ni dokai ira era sa veiqaravi voli ena kemuni maliwa, o ira sa digitaka na Turaga me ra liutaki kemuni ka vakatavulici kemuni. 13Mo ni vakarokorokotaki ira ka lomani ira ena vuku ni cakacaka era sa dau vakayacora. Mo ni veilomani tiko vakai kemuni.
14Keitou sa vakamasuti kemuni na veiwekani mo ni vunauci ira era sa vucesa, ni vakayaloqaqataki ira era sa yalolailai, ni vukei ira era sa malumalumu, ka dauvosoti ira na tamata kecega. 15Ni raica me kakua ni dua me veisausaumitaka na ca vua e dua tale, ia ni nakita tikoga mo ni caka vinaka ena kemuni maliwa ka vakakina vei ira na tamata kecega.
16Ni reki tikoga. 17Ni masu tikoga me kua ni mudu. 18Ni vakavinavinaka ena vuku ni veika kecega ena veigauna kecega, ni sai koya oqo na loma ni Kalou vei kemuni ena vuku i Karisito Jisu.
19Ni kakua ni tarova na cakacaka ni Yalo Tabu; 20ni kakua ni beca na nodra i tukutuku na parofita. 21Ni vakatovolea na ka kecega; taura matua ga na ka e vinaka; 22ni tarovi kemuni mai na ka kecega e ca.
23Me qai vakasavasavataki kemuni sara na Kalou dauveivakacegui; ka me qai maroroi vinaka me taucoko sara vakaoti na yalomuni kei na lomamuni kei na yagomuni me yacova na siga ena lako tale mai kina na Turaga ko Jisu Karisito. 24Sa yalodina o koya sa kacivi kemuni, ka na vakayacora na veika oqo.
25Kemuni na veiwekani, ni masulaki keitou talega.
26Ni kidavaki ira na veiwekani kecega ena i regu savasava.
27Au sa vakarota vei kemuni, ena yaca ni Turaga, me qai wiliki na i vola oqo vei ira kece sara na veiwekani.
28Me tiko vata ga kei kemuni na lolomasavu ni noda Turaga ko Jisu Karisito.
Currently Selected:
1 CESALONAIKA 5: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.