Sere i Solomoni 3
3
1Ni'u davo koto ena noqu i mocemoce ena bogi
Au a qarai koya sa gadreva na yaloqu;
Au a qarai koya, ia ka'u a sega ni raici koya.
2Au na duri cake oqo ka lako ki na koro levu,
Me'u curuma na kena sala kei na veibasoga ni sala.
Au a qarai koya sa gadreva na yaloqu,
Au a qarai koya, ia ka'u a sega ni raici koya.
3Era raici au o ira ka yadrava voli na koro levu.
Au tarogi ira, Dou raici koya li na noqu daulomani?
4E sega ni dede ena noqu siviti ira, au sa kunei vunituraga.
Au a mokoti koya ka bese ni laivi koya,
Me yacova ni'u sa kauti koya mai ki na vale i tinaqu,
Ki na loma ni rumu au a sucu mai kina.
5Dou yalataka vei au na goneyalewa ni Jerusalemi;
Dou yalataka ena vuku ni me kila kei na kaseli
Ni dou na sega ni vakacacana na neirau veidomoni.
Ai Katolu ni Sere
Na Yalewa
6A cava oqo sa cabe cake mai na vanua lala me vaka na duru kubou,
Ka vakaisaluwaki ena mura kei na ferekiniseni,
A veika boi vinaka era sa volitaka na dauveivoli?
7Raica! sa laveti cake mai o Solomoni ena nona vatavata;
Era lewe onosagavulu na nona matayadra,
Era sotia digitaki ka yaloqaqa i Isireli.
8Era vakaiyaragi kecega ena i seleiwau,
Ka rui cecere na nodra kila-ka vakaivalu:
Sa lili e dibidra na nodra i seleiwau,
Ka tu vakarau me ra veiraravui ena bogi.
9Sa laveti na tui o Solomoni ena nona vatavata;
Ka caka mai na kau ni Lepanoni.
10Na kena duru sa caka ena siliva,
Ka ubi e delana na wa talitali koula.
Na lokoloko ni kena i dabedabe sa ubi ena i sulu lokaloka,
Na kena era talia vakamaqosa na marama ni Jerusalemi.
11Oi kemudou na goneyalewa ni Saioni, dou mai raca na tui o Solomoni.
Sa vakaisala tu ena i sala ka vakaisalataki koya kina o tinana
Ena siga ni nona vakamau,
Ena siga sa reki ka marau vakalevu kina na yalona.
Currently Selected:
Sere i Solomoni 3: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.