Sere i Solomoni 2
2
1Oi au na rosi ni Saroni,
Kei na viavia ni buca.
Na Tagane
2Me vaka na viavia ena maliwa ni soni,
Sa vakakina o noqu daulomani ena kedra maliwa na yalewa.
Yalewa
3Me vaka na vuni apolo ena maliwa ni veivunikau,
Sa vakakina o noqu daudomoni vei ira na tagane.
Au sa via vakaruru ga ena kena i yaloyalo,
Ka sa kamikamica na vuana ki gusuqu.
4Sa kauti au o koya ki na nona vale ni soqo
Ka vakaruguti au ena nona loloma titobu.
5Mo vakaukauwataki au ena vuanikau ni keke,
Ka vakabulabulataki au ena vua ni apolo;
Ni sa vakamalumalumutaki au na noqu gagadre.
6Na ligana i mawi sa toka ena ruku ni uluqu,
Ka sa mokoti au na ligana i matau.
7Au sa vakaroti kemudou na goneyalewa ni Jerusalemi,
Mo dou yalataka ena vuku ni me kila kei na kaseli
Ni dou na sega ni vakacacana na neirau veidomoni.
Ai Karua ni Sere
Na Yalewa
8Au sa rogoca na domo i koya ka'u sa domona.
Raica! sa lako tiko mai oqo,
Sa lade kosova mai na veiulunivanua,
Ka cici takosova na veidelana kivei au.
9O noqu daudomoni sa vaka na kaseli,
Se dua na luve ni dia tagane.
Raica, sa tucake tu o koya ena daku ni bai.
Sa rai mai ki loma mai na katubaleka
Ka iro mai ena i sogo cicila.
10Sa dau vosa vei au o noqu daudomoni.
Na Tagane
Mo mata cake mai, isa noqu daulomani;
I noqu mata vinaka, lako mai me daru sa mai gole.
11Raica, sa oti na vula i batabata;
Sa mudu na uca, ka sa oti yani;
12Sa basika mai na veisenikau ena dela ni vanua;
Eda sa yacova mai na gauna ni lagalaga sere,
Ka sa rorogo mai na tagi ni ruve ena noda loma ni vanua.
13Na vunilolo sa vuataka mai na vuana vou;
Ka sa vakakina na vunivaini,
Ni sa kuvuraka mai na kena i boi kamica.
Mo tucake mai, isa noqu daulomani;
I noqu mata vinaka, mo lako mai me daru mai gole.
14O iko sa vaka na ruve e vuni koto
Ena veiqara ni vatu levu.
Me'u raica mada na matamu totoka,
Ka rogoca na voqa ni domomu kamikamica.
15Dou vesuki ira laivi na fokisi,
Na yavu fokisi lalai
Ka ra dau vakacacana na veiloganivaini,
Ni sa tekivu me vuavuai mai na neirau loganivaini.
Na Yalewa
16O noqu daudomoni sa noqu, ka'u sa nona oi au.
Sa dau vakania voli na nona qele ni sipi ena veiloga ni viavia
17Me yacova sara yani na kida ni mataka,
Ka sa seavu yani na butobuto.
Mo lesu tale mai, noqu daulomani, me vaka na kaseli,
Me vaka na me kila ena veiulunivanua mai Peceri.
Currently Selected:
Sere i Solomoni 2: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.