1 Timoci 6
6
Vakarokorokotaki Ira na Turaga
1O ira kecega sa lotu ka ra se tiko vakabobula e dodonu me ra vakarokorokotaki ira tikoga na nodra turaga, me kakua ni vosa vakacacataki kina na yaca ni Kalou kei na i vakavuvuli Vakarisito. 2Vei ira na tiko vakabobula oqo ka lotu Vakarisito talega na nodra turaga, sa sega ni dodonu me ra beci ira ena vuku ni nodra sa lewe ni soqosoqo lotu vata; ia sa dodonu ga me ra qaravi ira vakavinaka cake sara, ka ni o ira me ra na rawa-ka mai na nodra veiqaravi era sa tamata vakabauta ka lomani.
Na i Vakavuvuli Lasu kei na Vutuniyau Dina
Oqo na ka mo dau vakatavuvulitaka ka vunautaka. 3Kevaka e dua sa vakatavuvulitaka e dua na i vakavuvuli tani ka sa sega ni muria na i vakavuvuli vinaka ni Turaga o Jisu Karisito kei na i vakavuvuli dina vakalotu, 4sa sinai ga o koya oqo ena qaciqacia ka sa sega ni kila e dua na ka. Sa tamata tauvi mate vakayalo o koya ka vinakata walega na veileti kei na veibataka na vosa sa tubu kina na vuvu, na veivala, na dauvakaucaca, na nanuma ca, 5kei na nodra veileti tawayaga o ira na tamata sa sega ni cakacaka vakavinaka tu na nodra vakasama ka sa sega ni tu vei ira na i vakavuvuli dina. Era nanuma ga ni qaravi lotu e sa dua na sala me da vutuniyau kina.
6Sa dina sara ni sa veivakaiyautaki vakalevu na lotu, ia vua ga na tamata sa yalo vakacegu ena veika sa soli vua se taukena. 7Na cava eda sa kauta mai ki vuravura? Sa sega sara ni dua na ka! Na cava eda na kauta tani rawa mai vuravura? Sa sega sara ni dua na ka! 8O koya oqo, ni kevaka e tu walega vei keda na i sulu kei na kakana, sa dodonu me rauti keda vakavinaka o ya. 9Ia o ira ga era gadreva me ra vutuniyau era sa lutu ki na veitemaki ka tacori ena veigagadre ca ka lialia e vuqa sa kuitaki ira na tamata ki na leqa kei na rusa. 10Ni sa vu ni veika ca kecega na daudomona na i lavo. Era sa gadreva vakalevu eso me ra taukena ka sa vakavuna oqo me ra gole tani kina mai na vakabauta ka voroka vakai ira na yalodra ena rarawa mosimosi.
Na i Vakaro vei Timoci
11Ia o iko e dua na tamata ni Kalou, mo tarovi iko mai na veika kece sara oqo. Mo vakasaqara matua ga na yalododonu, na i tovo vakalou, na vakabauta, na loloma, na vosota vakadede, kei na yalomalua. 12Mo vala ga ena i valu vinaka ni vakabauta; mo taura na bula tawamudu me nomu, ni sai koya na i tovo ni bula oqo ka sa kacivi iko kina na Kalou ena gauna o a vakatusa kina na nomu vakabauta ena matadra na i vakadinadina e vuqa. 13#Joni 18.37Io, ena mata ni Kalou, o koya sa solia na bula ki na ka kecega, kei Jisu Karisito, o koya sa tukuna na vakatusa vinaka ena mata i Ponitio Pailato, au sa vakaroti iko 14mo muria na i vakaro ka yalodina sara kina me yacova na siga ena lesu tale mai kina na noda Turaga o Jisu Karisito. 15Na nona rairai mai ena yaco ena gauna lokuci sa donu vua na Kalou, o koya na vu-ni-kalougata ka cecere duadua ga, na nodra Tui na tui, kei na nodra Turaga na turaga. 16O koya duadua ga sa tu vua na bula tawamudu ka sa tiko ena rarama sa sega ni torovi rawa. Ni sa sega na tamata sa raici koya oti se me na raici koya rawa. Me nona ga na vakarokoroko kei na lewa tawamudu! Emeni.
17Vunauci ira era sa vutuniyau ena veika ni vuravura oqo me ra kakua ni qaciqacia se vakararavi ki na i yau sa sega ni tudei, ia me ra vakararavi ga vua na Kalou, o koya sa solia walega vakayauyau na veika kecega vei keda me da marau kina. 18Vunauci ira me ra vakayacora na veika vinaka, me ra vutuniyau ena cakacaka vinaka, me ra dau lomasoli ka vakarau tu me ra dau veivukei. 19Ena sala oqo era na vakasokumuna kina me nodra na i yau talei ka na yaco emuri me dua na yavu vinaka ka tudei, me rawa ni ra rawata kina na bula, ia oqo ga na bula dina.
20I Timoci, mo qarauna vinaka na ka o sa nuitaki kina. Gole tani mai na veivosaki rogorogo ca kei na veiba lialia eso me baleta na veika era sa mai vakatoka cala eso na tamata me “Kila-ka”. 21Ni ra sa kaya tiko eso ni sa tiko vei ira na ka oqo, ka sa vakavuna me ra gole tani kina mai na vakabauta.
Me qai tiko vata kei kemudou taucoko sara na yalololoma ni Kalou.
Currently Selected:
1 Timoci 6: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.