Madcos 1
1
I. BEDANQUIN CHIAID
(1.1-15)
Uan acten mentoanquidën nate chiaid
(Mat. 3.1-12; Duc. 3.1-9, 15-17; Uan 1.19-28)
1Nuquin Papan ambi tantiampicpaden aton Madombo Esuquidistu Mesias caid chomete tauaquin chiampid Chiaid Bëda chuinu. Tantia.
2Ëndenquimboshë Nuquin Papan ambi oncamiaid Isayas dada uamiampid nad iquec:
Mibi chote chuiquidba chomendambi, Mado.
Aidëmbi: Bëdambo icquid choeque. Icsambuen nabanenquio icquin ënta, quequin chuibanendac, Mado.#1.2 Mad. 3.1 tantiaquin nëid dada uapampic Madcosën. Aid ista.
3Aidëmbi shubu nibëdacnoshon cumapenen cuënac matses chochosho:
Chuiquid tapambo choec, queshun podquied nacnenacbimbuen: Nuquin Icbombo choeque.
Mimbi icsambuen naid ënash bëdambuec tabadta,
quequin Uan acten mentoanquidën nate Isayasën chuipampic.#1.3 Isa. 40.3 tantiaquin Madcosën nëid dada uapampic. Aid ista.
4Aden chiampicpadquiequi: Nuquin Papan Chomiaid choec, quequin chuibanquidba Uan bëyuc chopanëdash. Aidëmbi shubu nibëdacno tabadquin cumapenec onquequin naden chuibampanëdash: Mimbi icsambuen naid ënshun Nuquin Papa tantiabenquin acten mentometa. Adosho isash mimbi icsambuen naid tantienquio yec Nuquin Papa bëshunendac, quequin chuibampanëdash. 5Aden Uanën chuibannubien matses dadpen: Tantiatannu, quec nidaid cuëshë Udea yacnocquidobëd shubu dadpen icquid Edusaden yacnouësh chochopanëdash. Chochoash tabadquin tantiashien: Aden Icsambuen naombique. Umbi icsambuen naid ënnu, quequin abimbo chuisho Uanën acte Odan caidën mentobampanëdash. 6Nadquid Uan icpanëdash. Aton dashcute nëish iua dapa camechon bu daëdcaid dasiuidpanëdash. Tsipantebic nëish iua bitsi nacnenaid tsiupanëdash. Aton pete bacumbëd capishtobiecquid icpanëdash. 7Aidëmbi naden chuibampanëdash: Umbia chuibambon cun tsiuec choshon ubi udictsëc nadatiambocquin nabanquin chuibanendac. Aidi bëdamboshëcquid icnuc ubi icsaquid yec abi tapucudaid chicnuec dacuëdec shuebudtiapimbo iquebi. 8Mibitedi acten mentoquiduidtsëqui nebi. Aidien abipadquidquio aton Mayan Bëda menianquidquio nendac.
Esus acten mentoaid
(Mat. 3.13-17; Duc. 3.21-22; Uan 1.31-34)
9Adnubien Uanën chuibuedquio Esus nidaid Cadidea caidën icquid shubu daëdpactsëcquid Nasaded yacnouësh chopanëdash. Adec choacshobien Uanën acte Odan caidën Esus mentopanëdash. 10Aden acten mentoac pudundonobi abu canchedec shëcuë yansho Esusën ispanëdash. Adnubi oshpodcobimbuec isadec aton Mayan Esusbëd icnuec budpanëdash. 11Adnubien abucuësh nadec onquepanëdash: Mibiuidtsëqui cun Madombo icsho umbi bëdambuen isquin umbi tantiaidquio mibi nec, quepanëdash.
Nuquin Papan Chiaid Esus niacmenu, quequin Mayan Icsa Satanasën tanaid
(Mat. 4.1-11; Duc. 4.1-13)
12Aden mentobocshobien Nuquin Papan Mayanën shubu nibëdec masiuidpambo yacno Esus buampanëdash. 13Ambobi 39tedec ushpanëdash. Ambo icshobi Nuquin Papa chieshënquid Mayan Icsa Satanasën: Nuquin Papan Chiaid niacmequin tannu, quianec choshon tanuidpanëdash. Ambobi bëdibiecquid nëish aben icquid chedobëd icpanëdash. Ambo Esus icshobi Nuquin Papabëd icquido chochoshon nashumbededpanëdash.
Nidaid Cadidea yacnoshon Esusën tauambuen chuibanquin matses nashunaid
(Mat. 4.12-17; Duc. 4.14-15)
14Adnubien isadaidpembon chuiquid tapan acten mentoquid Uan bedmeshun quënën tsadunmepanëdash. Aden Uan quënën tsadunmiambien Esus nidaid Cadidea caid yacno nidpanëdash. Adshumbic tauaquin Nuquin Papan Chiaid Bëda chiec: Nuquin Papan namiacno tabadte nëbi iquec, quequin Esusën chuibampanëdash. 15Nuquin Papan chiampicpadquid ambi namiacno iuedanquid nëmbobi iqueque. Mimbi icsambuen naid ënshun Chiaid Bëda tantiash bëdambuec tabadta, quequin Esusën chuibampanëdash.
II. ADQUID NEBI, QUEQUIN ESUSËN CHIAID
(1.16—8.30)
1. Tantiaquidënquio chiacpadombuen chiaid
(1.16—3.12)
Nuëcquid bedquido 4ted Esusën: Ubëd iquec cho, caid
(Mat. 4.18-22; Duc. 5.1-11)
16Aden chuibanashic chian dapa Cadidea caid cuëman nidquin Simombëtan aton utsi Andedesën nëshaid acte nënesho istuidpanëdash. Aid daëdi nuëcquid bedquidombo nepanëdash. 17Aden istuidshumbien: Nuquibi icnu. Cho. Nuëcquid bedquid icbuedi nuëcquid mimbi bedbocpadombuembidi nëbi umbi namiaid icquin matses chuibanquid mibi icmenu, capanëdash Esusën. 18Adoaquien nëshaid nianec Esusbëd nidannepanëdash.
19Adanec udictsëc nidquimbi Sebedeon mado daëdshun Santiacobëtan Uanën cano antabëdquin aton nëshaid nacnensho Esusën istuidpanëdash. 20Aden nacnensho istuidtanquimbien Esusën ambi utsi chuibocpadombuembidi chiaquien aid daëdshuntsen aton papabëta abi nashunquido cano antabëdsho nianec Esusbëd nidannepanëdash.
Podobitsi icsa dapuduedaid Esusën dapuduenmiaid
(Duc. 4.31-37)
21Adashic shubu dadpen icquid Capednaun caid yacno abëd icquidobëd nidpanëdash. Nidash chonoadtemaid uëshën Nuquin Papan Chiaid chuibante shubun puduedshun iccuededquido tantiamequin Nuquin Papan Chiaid Esusën chuibampanëdash. 22Aden chuisho tantiash tantiadempambo yec tabadec: ¿Mitsipadombuen tantiabenshun adombuen chuibanquin napeba? Tantiaquidënquio chuibanacpadombuen Esusën chuibampayoc. Ma Moisesën chiampid tantiamequidon adombuen chuibanenquio icpaboc, quecuededpanëdash. 23Aden Esusën isadaidbon Nuquin Papan Chiaid chuibante shubun chuibansho tantiec tabadnubien dada podobitsi icsa dapuduedaid abi tsadacnouëshquiobi cumapenec nadec cuëdec: 24Nasaded yacnocquid Esus caid ¿atotsi quec nëmbo cho? ¿Ubipadquidtedi nibëdquio icmenuecta cho? Umbi isaidquio mibi nec. Nuquin Papan bëdambuen isaidquio yec Icsaisambo mibi nec, quepanëdash. 25Adoaquien Esusën: Adec cuëdenda. Adec cuëdenquio yec aidën dadan iquenquio iquec dapuduenta, capanëdash. 26Adoac abi dapuduedaid uëdëquec uebudnubi cumapenec sidquianec podobitsi icsa dapuduempanëdash.
27Adosho isash tantiadempambo yec tabadcuededec: ¿Abimbobida capec? ¿Mitsi padquid nepeba? Ambi chuibanaid chiaid chuca utsibien nechitec. Ma chuiquidën nacpadombuen: Dapuduen, ambi cac aidën chiacpadombuen podobitsi icsan napayoc, quec onquecuededpanëdash. 28Aden isanec nidanneshun Esusën nabanaid ambi isbued chuibampanëdash. Aden chuibansho aid nidaid cuëshën icquid Cadidea yacno tabadquidon tantiabededpanëdash.
Simonën nachi bëdanmiaid
(Mat. 8.14-15; Duc. 4.38-39)
29Adashic Nuquin Papan Chiaid chuibante shubu yacnouësh puduenanec Simonën shubu yacno nidec Santiaco yec Uan yec quec aidobëd Esus nidpanëdash. Aidën shubun icquidbidi aton utsi Andedes icpanëdash.#1.29 Simon Esusën Petedo cuëntequid nepanëdash. 30Aidën shubun icquidbidi Simonën nachi nëncuenash chumbo yec ueten uepanëdash. Adnubi Esus chosho issun utsin: Simonën nachi nëncuenash chumbo iquec, quequin chuipanëdash. 31Aden chiac aid uiacno puduedshun Esusën mëdinquin nidtomiac chumbo icbuedi badedquio dauebudec bëdampanëdash. Aden bëdanmiac codocashun abëd icquidobëta Esus pemepanëdash.
Esusën daicsaidobëta nënquido dadpen bëdanmiaid
(Mat. 8.16-17; Duc. 4.40-41)
32Adnubien inchëshbudtsëqui Capednaun yacnocquidon daicsaidobëta nënquido bëbëpanëdash. Adembidi podobitsi icsa dapuduedaidtedi Esus yacno bëbëpanëdash. 33Aden bëbëash Simonën shubu shëcuë cuëman puduedabi matses dedpen tabadcuededpanëdash. 34Adsho issun shubunuësh puduenshun nënquidobëta daicsaidotedi Esusën bëdanmebampanëdash. Adembidi podobitsi icsa dapuduedaid oncamenquio icquin dapuduenmebampanëdash. Umbi tantiaid Nuquin Papan Madombo nec, quequin chuinushe, queshun oncamenquio icpanëdash.
Esusën Nuquin Papan Chiaid Bëda chuibanaid
(Duc. 4.42-44)
35Adashic badiadte anoentsëqui isucunanec shubu nibëdacno abentsëqui Esus nidpanëdash. Adec nidshun Nuquin Papa chuipanëdash. 36Adec nidan isucunshun abëd icquidobëtan Simonën Esus nibëmpanëdash. 37Aden nibënquin istuidshumbien: Mibi isnuec chochoquidtedishun mibi nibëmbededec, capanëdash.
38Adsho tantiashumbien Esusën: Capucuennequin utsibotsen Chiaid Bëda chuibannuec chondabique. Shubu dadpen icquid anoentsëc icquidtedi chuibanec nidnunid, quepanëdash. 39Aden chuibanec nidaid cuëshë Cadidea caidën icquidtedi yacno capucuennequin Esusën Nuquin Papan Chiaid chuibante shubun shubunquiec puduedcuennequin Nuquin Papan Chiaid Bëda chuibampanëdash. Adembidi podobitsi icsa dapuduedaido dapuduenmebampanëdash.
Dada aton dada daush daushpambo yec daicsaid bëdamiaid
(Mat. 8.1-4; Duc. 5.12-16)
40Aden Esusën chuibannubien dada aton dada daush daushpambo yec daicsaidquio chopanëdash. Esus yacno choequi dannëshën sebudec tinquebudshun chiec: Ubi bëdanmete bunquin mimbi ubi bëdanmetsiaque. Ubi bëdanme, Icbo, quequin Esus chuipanëdash.
41Adsho tantiash aid isec uënësquio ictanquin mishec Esus: Mibi bëdanmete bunebique. Bëdanta, 42quenubi daicsaid nibëdquio yec badedquio bëdampanëdash. 43Aden bëdanmetanquin: Tantia. Chuinu. 44Nidquin: Aidën bëdanmioshi, quequin utsibo chuibanenda. Naden nata. Edusaden yacno nidash Nuquin Papa tabadte shubu dapa yacno nidec daquënë uaidën puduedta. Ambo puduedshun Moisesën chiampicpadombuen Nuquin Papa ismequin nëish iua cuessunneshun pichicaquido isme. Adoshombic oshpodcobimbuecquid daëd bedshun meneta. Adoac: Bëdanac, mibi caindac, capanëdash Esusën.#1.44 D.N.Ch. 14.1-32 tantiaquin aden Esusën chuipanëdash. Aid isbanta. 45Adsho tantiaboshombi niacbidanquin: Esusën bëdanmioshi, quequin abitedi chuibennepanëdash. Aden chiac Esus yacno matses dadpen chochopanëdash. Adec chochosho isash: Shubu dadpen icquid yacno tabadtiapimbo iquebi, quianec shubu nibëdacno Esus abëd icquidobëd nidpanëdash. Adnubien Esus nibënec nidaid utsi utsiec yacnouësh matses dadpen chochopanëdash.
Currently Selected:
Madcos 1: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.