Madcos 2
2
Dada shëquëquenquiocquid Esusën bëdanmiaid
(Mat. 9.1-8; Duc. 5.17-26)
1Adashic iuepactsëc yash padpidec Capednaun yacno niduash Esus shubun puduedpanëdash. Adnubien: Esus chosh, quesho tantiash 2padpidec matses dadpen chochopanëdash. Adec chochoash shëcuë cuëman tsucus tsucustsëcquio yec utsi tabadtiapimbo yec tabadsho issun Esusën Nuquin Papan Chiaid Bëda chuibampanëdash. 3Adnubien dada 4tedshun dada shëquëquenquio icquid nandoten nandoshon bëec chopanëdash. 4Chochoshon matses tsucus tsucustsëcquio yec tabadsho istanquin shubu cacho padapadacquid yacno dectatoten dectatoshon macano nacnenaid chictanquin Esusën dayunquio dada shëquëquenquio icquid nandoten nandoaid imbudpanëdash. 5Aden imbudsho issun: Esusën bëdanmec, quequin abi imbudquidon tantiec, quequin ambibi tantiashun Esusën: Mado, mimbi icsambuen naid tantienquio yec bëshunobi, capanëdash.
6Adnubien utsi utsiec Moisesën chiampid tantiamequido ambobi tabadquin naden tantiapanëdash: 7¿Atotsi quiash adec Esus onquepec? Nuquin Papa icsambuen chuishunquidien nechitec. Nuquin Papa abentsëcquiobien icsambuen naidtedi tantienquio yec bëshunquid nec, quecuededpanëdash.
8Aden aidon tantiaid ambibi tantiashumbien Esusën naden chuipanëdash: ¿Atotsi quequin mibitedishun icsambuen tantie? 9Umbi: Mimbi icsambuen naidtedi tantienquio yec bëshunobi, quequin dada shëquëquenquiocquid chuinuc ¿bëdantequidpenquioda nedic? Adembidi umbi: Nidtoshon mibi imbudbued nandote chiadtoshon buanec nid, quequin chuinuc ¿bëdantequidpenquiobidida neuadic? 10Istac. Mibi ismenu. Matsesën Tishaid iquequi nidaidënuësh Nuquin Papan namiaid yec icsambuen naid tantienquio yec bëshunquid nec, quequin mabi tantianu, quetanquin dada shëquëquenquiocquid naden chuiquin: 11Nidtoshon mibi bëbued nandote chiadtoshon buanec min shubuno nidec nid, capanëdash Esusën. 12Adoac abitedishunquio isnuc badedquio nidtotanquin abi bëbued nandote chiadtotanquin buanec nidsho isash: Nideque. Is. Adombuen nabanquid isen ictennebi, quetsëcquiec onquiash: Nuquin Papa bëdamboshëcquidën naid nec, quecuededpanëdash.
Esusën: Ubëd iquec cho, Debi caid
(Mat. 9.9-13; Duc. 5.27-32)
13Adashic padpidec chian Cadidea caid cuëman Esus niduapanëdash. Ambobi tabadnubien aidën chuisho tantianuec matses dadpen chochoacsho issun Nuquin Papan Chiaid chuibampanëdash. 14Aden chuibanec nidquimbi Debi caid Adpeon mado piucquid bedshumbante shubumpi yacno tsadsho istuidpanëdash. Cun matses isadaidbo iuaquid nidaid Doma yacnocquidon chuiquid tapan chiacpadombuen piucquid bedshumbanec tsadpanëdash.#2.14 Debi cashumbic Mateo nepanëdash. Nidaid utsi yacno atona utsibon buambuansho issun piucquid bedshunquid Debi nepanëdash. Adembidi nidaid utsi yacnoshon atona bëbësho issun piucquid bedshunuaquid nepanëdash. Isadaidpembo chuiquid tapan: Cun matsespembon piucquid bedshunta, cac bedshumbanquidbidi Debi nepanëdash. Ambo tsadsho istuidshumbien: Ubëd iquec cho, Esusën cac: Ai, quianec badedi Esus tsibananec Debi nidpanëdash.
15Adshumbic Debin shubu yacno nidshun Esusën abëd icquidobëtan pepanëdash. Ambobidi piucquid bedshumënquid Debipadquidobëd cun matsesën: Icsambo icquidombo nec, caidontsen pebededpanëdash. Aido Debin shubuno Esus chosho tsibananec chochoquido dadpen icpanëdash. 16Aden adquidobëtan Esusën pesho isash Moisesën chiampid tantiamequido padiseobo icquin: ¿Atotsi queshun piucquid bedshumënquidobëtambi utsibon: Icsambo icquidombo nec, caidobëtan min chuiquidën pepec? capanëdash Esusbëd icquido chuiquin.
17Adsho tantiashien Esus: ¿Nënenquio icquidta dauëchoquidën dauë menepadic? Padenquio. Nënquidien dauëchoquidën dauë menequid. Adquiecbidi: Bëdambocquid nebi, quequin ambibi tantiaquid icshodambi: Ubëd icquec cho ¿capadi? Padenquio. Icsambuen naquid nebi, quequiduidtsëqui chuiquin: Mimbi icsambuen naid ënta. Aden ënash ubëd icquid mibi iquendac, quequin chuinuec chopondabi, quepanëdash Esus.
Esusën buna mëmunte chiaid
(Mat. 9.14-17; Duc. 5.33-39)
18Adnubien utsibon: Uan acten mentoanquidbëd icquidobëtan padiseobëd icquidon buna mëmunsho ispanëdash. Aden issun Esus naden chuituidpanëdash: ¿Atotsi queshun aidon buna mëmunnubi mibëd icquidon buna mëmunenquio icpec? capanëdash.
19Adoaquien Esusën: Aton chido bednun abi bednuequidën abëd icquido pemec. Aden pemenu, cac cuishonquequin isuidesa abëd icquido nec. 20Adbuedi iuecash chido inquid nibëdanan abëd icquidon uënësquiocquin buna mëmunendac.#2.19-20 Adembidi ubi uënësec nibëdanan ubëd icquidon uënësquio icquin buna mëmunendac, quequin tantiaquin Esusën chuipanëdash.
21Dashcute shëni canchedaid dashcute chuca cuëshë bëtuscaisa matses nec. Shënin chucambocquid bëtuscaid panac shëcuë amëec cancheduaic. 22Adembidi nuquin matsesën uba chinaid chuca nëish bitsi nacnenaid shënin cushtoac bitsi canchednuc chiuidec mëyadtsiash. Adnushe, queshun nëbi uba chinaid chuca bitsi nacnenaid chucanquio cushtoec, quequin Esusën chuipanëdash.
Chonoadtemaid uëshën icbo nebi, quiaid
(Mat. 12.1-8; Duc. 6.1-5)
23Adshumbic chonoadtemaid uëshën abëd icquidobëtan Esusën uanno nidenquio yec capuquin tied matampanëdash. Adnubien adosbiecquid tidico caid istuidshun cuëstanquin ëshchicshun abëd icquidon pebededpanëdash. 24Adosho issumbien padiseobon: Is. ¿Atotsi quiash mibëd icquido chonoadtemaid uëshëmbi chonoadpec? capanëdash Esus chuiquin.
25Adoaquien Esusën: ¿Abëd icquidobëtan chuiquid tapa Dabidën natiambo bundoshon ambi petemaidi pepampic, quequin chuiquin dada uampid isbanquin tantiamboda ictio? 26Naden napampic. Abëd icquidobëd ënapenuësh choash Dabid cumapenec bundoash Nuquin Papa tabadte shubumpi yacno abi puduedtemaidën puduedshun: Nuquin Papana nec, quequin pan sanaid bedshun ambi petemaidi abëd icquidobëtambi Dabidën pepampic. Nëish iua cuessuneshun pichicaquidon chuiquid tapambo Abiatad cuëmëdquid abentsëqui icnuc aid shubumpin puduedshun: Nëish iua pichicaquidon peteuidtsëqui nec, quetiadquidi abëd icquidobëtan Dabidën pepampic, quepanëdash Esus.
27Aden chuishumbic naden Esusën chuiuapanëdash: Matses chonoadquiash tiboquete bëdambo ictsiash, queshun Nuquin Papan aid uëshë icmiondash. Aid uëshë icmequin: Ma matsesën nëidtedi nainquio icnu, quequin chienquio icquin cun Pan chonoadtemaid uëshë icmiondash. 28Ubien Matsesën Tishaid iquequi chonoadtemaid uëshë icmequid nec. Adquid icquin umbi tantiacpadombuen matses namequid nebi, quepanëdash Esus padiseobo chiec.
Currently Selected:
Madcos 2: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.