Mateo 28
28
Esus uincuenaid chiaid
(Madc. 16.1-8; Duc. 24.1-12; Uan 20.1-10)
1Esus uënësacsho chococabon daëdec ushtanec dominco badiadnuc Esus chococabocno isec Madia Macdadenabëd Madia utsi nidpanëdash. 2Nidash isec tabadnubi nidaid cumapenec ishcudpanëdash. Adnubien Nuquin Papabëd icquidquio abucuësh budtanquin cuënote dapa bëtashaid shëcbentanec aidëmbi matsadtopanëdash. 3Nuquin Papabëd icquid abu bed bedquiacbimbuec bëchamauanquiec isadpanëdash. Aton dashcute ushumboshë icpanëdash. 4Adec dacuëdampambo icsho istanequien chococaid isec tabadquido sondado dacuëdtanec uëdëquec padishash uënësacbimbuec samëdpanëdash.
5Adnubien Nuquin Papabëd icquidën chidobo naden chuipanëdash: Dacuëdenda. Cueste napotiaidën dectanquin uënës uamebued Esus isnuec nec, quequin mibitedi tantiembi. 6Nëmbo nibëdec. Ambi chuibocpadequi uincuenash nidosh. Abi nambocno en isec cho, cac chidobon isac nibëdquio icpanëdash. 7Mimbi isbued Esusbëd icquido chiec nid. Badedquio nidshun naden chuita. Uënësbuedi uincuenash nidaid Cadidea yacno abia nidshun mibitedi cainec. Amboshon mimbi Esus isendac, quequin chiec nid. Aidted umbi chuitequid chiombi, caquien 8chidobo auëshquiobi dacuëdbuedi cuishonquec titinquianec Esusbëd icquido chiec nidannepanëdash.
9Titinquianec nidanneshobien Esusënquiotsen bëquedpanëdash. Adshun: Mibi isnuec nebi, capanëdash. Adshobien chidobon: Cun Icbo mibi nec, quequin ismequin dannëshën sebudshun tadayumpanëdash. 10Adoaquien Esusën: Dacuëdenda. Cun utsibo ubëd icquido naden chiec nid: Nidaid Cadidea yacno nidannec nid. Amboshon mimbi ubi isendac, quiosh, quequin chiec nid, caquien Madian chido utsibobëd choquin chuituidpanëdash.
Esus uincuenacsho isquid sondado muaquin chuimiaid
11Aid chidobo nidnubien Esus nauedaid isquido sondado abi chomebuedo Nuquin Papa ismequin nëish iua cuessunneshun pichicaquidon chuiquido chiec nidpanëdash. Nuquin Papabëd icquid chonoc Esus uincuembued chuituidpanëdash.
12Adoaquien aid chuiquidon chuiquid utsi tsësiobobëd onquec nidannepanëdash. Adec aidobëd onquequin tantiash: Adonona, quetanquin sondado chedo chiec chopanëdash. Mimbi isaid utsibo chienda. Mibi piucquid dadpen menenu, queshun piucquid dadpenquio menepanëdash naden chuiquin: 13Mimbi isaidquio chienquio icquin naden chuita: Ubitedi ushquian abëd icquidon Esusën dada ampequin beduanaccosh, quequin utsibo chuita. 14Mibi caic: Sondado ushquiopac caosh, quequin chiac min chuiquid tapa Pidaton chushcaquin mibitedi cuidnushe. Aid: Chushcaquin cuidenda, quequin ubitedishun chiendambi, quequin 15piucquid meniac bedanec nidash isadaidbon chuiquidon chiacpadec muapanëdash sondado. Adembidi aid tantiaquin nëbimbobi isadaidbo dadpenshun: Esusën dada ampepanëdash, quequin chuiuaic.
Ubi chuibenneta, quequin Esusën chiaid
(Madc. 16.14-18; Duc. 24.36-49; Uan 20.19-23)
16Adnubini Esusbëd icquido 11tedtsëqui iquec Esusën chiacnombo nidaid Cadidea yacno nidec macuësh tapa yacno nidannepondabi. 17Macuësh tapa yacno nidquimbi Esus istuidpondambi. Istuidshumbic: Cun Icbombo neque. Ismenu, queshun dannëshën sebudpondambi. Utsibombien: ¿Cun Icbombobida nepeba? capondash.
18Adsho issun Esusën anoentsëqui choquin naden ubitedi chuipondash: Ubipadquid utsi nibëdec. Nuquin Papan abitedishun Icbombo icmequin abuc icquidobëta nidaidën icquidotedi namequidquio icmioshibique.#28.18 Aden abitedishun Icbo icmete Daniedën chuipampic. Dan. 7.13-14 ista. 19Nidaid utsi utsiec yacno nidshun ubi tantiaquido icmenuen matses abitedi Umbi Chiaid chuibenneta. Adoac ubi tantiabensho acten mentoquin: Nëid Esus tantiabenshun Nuquin Papatsen tantiaquid nec. Nëidbëd Aton Mayan Bëda tabadec, quequin utsibo ismequin acten mentobanta. 20Mimbi mentoaido: Nuquin Icbon chiacpadec bëdambuec tabadnuna, quequin umbi chuibuedtedi tantiaquin chuibanta. Mimbi adosho isash nidaid abitedi nibëdanmiambo icnuc mibitedi nianenquio yec mibëd iquendabi, quepondash Esus.
Currently Selected:
Mateo 28: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.