Mbimbi 5
5
Lilombelo lya mema ku mbunge
1Yove Shukulu Kalunga anuka vije vinalingiwa kuli yetu.
Kenga ali yetu, co mona kushauka kwetu.
2Vufuko vwetu vuli mu mavoko a vangenzi,
co vaka-kwija valinakuyoyela mu vinjuvo vyetu.
3Vitozi vanatsii vatatetu,
co ololo vananetu vanapu vifwile.
4Tunapande kufweta mema tulinakunwa,
co tunapande kulanda vitale vyakwota
vije tunajeneka.
5Valinakutwendesa manene
ngwe vimulu nambe ngwe tumelo,
tunajuka manene,
oloni nalumo lwai vatutavesa kuhwima.
6Akuwana vyakulya vyakupwisamo
ngeci tuyoye,
twile nakuvilomba ku Ingito na ku Asilya.
7Vakukulwila vetu valingile vuvi,
oloni ololo voshe vanatsi,
co ololo tulinakuyanda omwo vuvi vwavo.
8Vindungo valinakutushwana,
co naumo wai asa kutupatula ku nzili yavo.
9Vaka-kutsiya valinakuyambangela
mwaya lifuti mwoshe,
myonyo yetu ili mu vushonde
omo tuya mukushakezeka vyakulya.
10Njala inatunenela mushongo wa lusike,
co cikonde cetu cishaluka manene ngwe tuhya.
11Vawisile vanakazi amolika na vambanda
va mu vinganda vya mu Yunda
nakulinga navo vuvi a munkinda wa Siyone.
12Vantwama vetu vanavatwala mukuvashukika,
co tukulukazi vetu kuvesi nakuvasingimika.
13Vakwenje vetu valinakuvasindiya
kutwa tiliku ngwe vindungo,
vanike va vanalume valinakupelyangela na vitele
vyakulema vya vitale.
14Tukulukazi lalo kuvesi na simbu
yakutumbama ku cikolo ca nganda,
co matukuka a vakwenje
kuvesi na simbu lalo yakwimba myaso.
15Kuvwaelela kunatundu mu vimbunge vyetu,
co kuviilila kukekwo kunengi
mu mwela wakulisamba.
16Nacimo cuma cinasalao lalo cai
ku vije twalyalesele navyo.
Twalingile vuvi,
co ololo tunanyongo.
17Tulinakuvinja mukati ka vimbunge vyetu,
co kutwasa kumona omwo misozi.
18Omwo Munkinda wa Siyone
uli mwawo lika mu ngundu,
co vimbanje lika valinakwendelamo.
19Oloni yove Shukulu Kalunga,
wapwa u mwene ku myaka yoshe,
co ukashwana kutwala
na ku shongo ya myaka.
20Omwo vikajo unatusezela ngacije
simbu yakama?
Kuma kuukatwanuka lalo ndi?
21Shukulu Kalunga twilwisile kuli yove!
Co tukeluka!
Twilwisile lalo vumpau vwetu vwalaja.
22Indi unatuvyana vene ku myaka yoshe ndi?
Kuma kukwesi naa asikisila kuluvala kwove ndi?
Currently Selected:
Mbimbi 5: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006