Ezekiyele 3
3
1 #
Kuj 10:9-10
Njambi wendekele kuli yange ngwendi, “Muna munu, lya livulu eli lyakuzenga, asina uye ukendeke kuli vanu va Isalele.”
2Ngecivene, njeshamene kanwa kange, co wanjilisile lije livulu lyakuzenga. 3Wendekele ngwendi, “Muna munu, lya livulu eli linjinakwana, kutisa lifu lyove na livulu eli.” Co njalile, lyatovalele ngwe vuki.
4Asinoni Njambi wendekele ngwendi, “Muna munu, ya kuli vanu va Isalele, ukendeke kuli vakevo evi vyoshe vinjikuleka. 5Kunjakutumine ku vanu vaje vendeka muyati waukalu, nambe kuli vaka-kwija embwe, oloni njilinakukutuma kuli vanu va Isalele. 6Nga njikutuma ku vanu veka vaje vendeka muyati waukalu uje kuuzivi, co vakakutolilila. 7Oloni vanu va Isalele kuvakakutolilila, nameme yange kuvakanjitolilila. Voshe vapwa vanu vakukaluwa vimbunge na kaleulwizi. 8Ololo oni njikakaluwisa mbunge yove, nakukukolesa ngwe vakevo. 9Njikakukolesa mbe ngwe limanya, nakukukolesa mbe ngwe ndaimani, kesi uzive lyova lya vaje vaka-kutengulukila.”
10Njambi wendekele lalo ngwendi, “Muna munu, tolilila mwamuvwa nakwaka majwi oshe anjikuleka mu mbunge yove. 11Cooni ya ku vavushoko vwove, vaje vali mu vunzinda ukavaleke evi vinjikuleka yange Kalunga wa Akamwa ya Vyoshe, nambe vakakutolilila nambe kuvakakutolilila.”
12Asinoni Munzinzime wa Njambi wanjijundwile, co njazivile lijwi lyakuluma manene munima yange lyendekele ngwalyo, “Shangazaleni vumpau vwa Shukulu Kalunga vuli mwilu!” 13Co njazivile mambava a vikashama alipupa limo na likwavo mu lihunzi, na muyoyo wakama wa mavalo, uje wapwile ngwe mandunduma. 14Asinoni Munzinzime wa Shukulu Kalunga wanjijundwile nakunjambata, co njaluvalele nakuviilila. 15Ngecivene, njetele ku Tele Avive ku Ndonga ya Kevale, kuje kuvakele vaje vakele mu vunzinda, co njakele kuje matangwa atanu na avali, njalikasamenene manene a vyuma vije njamwene nakuziva.
Shukulu Kalunga emika Ezekiyele kupwa muka-kunyunga
16Munima ya matangwa atanu na avali, Shukulu Kalunga wendekele kuli yange ngwendi, 17“Muna munu, njikupwisa muka-kunyunga muyati wa Isalele. Yove ukavanangula vije vinjikuleka. 18Nga njikuleka ngwange muka-vuvi atsa, oloni yove kuumunangula ngeci atunde ku vingila vyendi nakwamena mwonyo wendi, ikeye akatsa, anga acili muka-vuvi, oloni mulonga wa kutsa kwendi ukakala ali yove. 19Nga unangula muka-vuvi, oloni ikeye katenguluka ku vuvi vwendi, ikeye atsa, anga acili mu vuvi, oloni yove unamena mwonyo wove.
20“Nga muka-vushunga alinga vuvi, nga njimwakela citanukiso ngeci awe, ikeye atsa nga kuumunangula, atsa omwo vuvi vwendi, co kunjikanuka lalo vilinga vyendi vyavivwa vije vyalingile, oloni mulonga wa kutsa kwendi ukakala ali yove. 21Nga unangula muka-vushunga ngeci kesi alinge vuvi, co ikeye atolilila kuli yove nakulikela kulinga vuvi, munu wa cifwa cangacije akayoya, co nove lalo kuukakala na mulonga.”
Ezekiyele apwa kaveveve
22Njazivile nzili ya Shukulu Kalunga, co wendekele kuli yange ngwendi, “Katuka uye ku cana ngeci njikendeke nove.”
23Ngecivene, njaile ku cana, co kuje njamwene vumpau vwa Shukulu Kalunga ngwe vuje vunjamwene ku Ndonga ya KeVaLe Co njawililile asi na cihanga cange cakwatele mu livu, 24oloni Munzinzime wa Njambi wakovelele muli yange, co wanjikatwile. Shukulu Kalunga wendekele kuli yange ngwendi, “Ya kwimbo ukalishokelele mu njuvo yove. 25Oloni yove ni muna munu, kenga, vakakukuta mikole, kuukai ku mbunga ya vanu. 26Njikakakatesa ndaka yove ku ndakwilo, ngeci kuukasa kunangula vanu ava vaka-kutengulukila. 27Asinoni, omo njikendeka lalo kuli yove nakukwilwisila nzili yakwendeka, co ukavaleka evi vinjendeka yange Kalunga wa Akamwa ya Vyoshe. Vamo vakakutolilila, oloni vakwavo kuvakakutolilila, omwo vanapu muyati wakutengulukila.”
Currently Selected:
Ezekiyele 3: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006