2 Timateo 3
3
Matangwa akukotoka
1Anuka ngwove kukakala kukaluwa a simbu ya matangwa akukotoka. 2Omwo vanu vakapwa vaka-kulizema vakevo vavenya, vaka-kuzema vimbongo, vaka-kulishasha, vaka-kulijundula vakevo vavenya, vakapwa vaka-kushaula, vaka-kujeneka kwononoka kuli visemi vyavo, vaka-kujeneka kukandelela, vaka-kujeneka kukulaela, 3vakapwa vaka-kukenyuka, vaka-kujeneka kutetela vakwavo, vaka-vukaleo vwa makuli, vaka-muuka, vaka-vukalu, vaka-kuzinda vyavivwa, 4vakapwa vaka-kuluwanganya, vakakulupozoka kwendeka, vaka-kushula na kulyalesa, vakakuzema manene senga kutuvakana kuzema Njambi, 5vakakakateya vyuma vya cifwa cakulemesa Njambi, oloni vakavyana nzili yavyo. Litenge ku vanu va cifwa cangacije. 6Omwo amo vavo vakai nakukovela mu vinjuvo vya vanu nakwononwesa vanakazi vakuzeya vaje vanalemuwa na milonga ya vuvi vuje vunavatwala ku miyati yoshe ya mashungu, 7vanakazi vaje valinakweseka simbu yoshe kulilongesa, oloni kuvasa kuzivuka vushunga. 8#Kut 7:11 Ngwe Njane na Njambele valwisile Mosesa, ngecivene, na vanu ava lalo valinakulwisa vushunga, vanu vaje mana avo kuwesi nakupanga, co vanapu vaka-kwonwa mukukulaela. 9Oloni kuvasa kuya kulutwe, omwo vulema vwavo vukasholoka ku vanu voshe. Muje mukemwo mucafwile kuli Njane na Njambele.
Vilongesa vyakumanesela
10Oloni yove unakavangeya kulongesa kwange na futisi yange na vutumbe vwakuyoya kwange, unanongonona kukulaela kwange na kusimpa kwange na lukakateya lwange, 11#Vil 13:14-52; 14:1-7,8-20 na mapakeso ange na tuyando twange. Wavizivuka vyuma vyoshe vije vyalingiwile kuli yange mu Antyoke na mu Ikoniyame na mu Lisitala, mapakeso akukomokesa aje anjatambwile! Oloni Mwene wanjovwele ku vyoshe evi. 12Woshe uje ashaka kuyoya vuyoye vwa vu Njambi vuje vuli muli Kilistu Yesu akamona mapakeso, 13co vanu vaka-vuvi na vaka-manseno vakatwalelelao kulinga vuvi manene, nakukwisa vakwavo nakulikwisa vakevo vavenya. 14Oloni yove, kakateya mu vushunga vuje vuvakulongesele, co unemanao mbe mukukulaela. Wazivuka veya vaje vapwile valongisi vove, 15co wazivuka ngwove tunde ku vwanike vwove, unazivuka Visoneka Vyakujela, vije vyasa kukwana mana mukukutwamenena kukwovoka kwakukulaela muli Kilistu Yesu. 16Omwo Visoneka vyoshe Njambi wahwiminininemo ngeci vili na seo mukulongesa vushunga, na mukwendekela, na mukushungamesa, namukwana vilongesa akuyoya kwakuvwa, 17ngeci munu uje apangela Njambi apwe wamutunu nakushula kwakuvwa mukupanga vipangi vyoshe vyavivwa.
Currently Selected:
2 Timateo 3: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006