2 Samwele 24
24
Ndaviti alava vanu
(1 Miz 21:1-27)
1Shukulu Kalunga waluvalele na Isalele lalo, co walingisile Ndaviti kunena vukalu ali vakevo. Co Shukulu Kalunga wendekele kuli ikeye ngwendi, “Ya ukalave vanu va Isalele na Yunda.” 2Ngecivene, Ndaviti waanene mashiko kuli Yowave, muka-kushika vinzita vyendi ngwendi, “Ya na vamyata vove ku miyati yoshe ya Isalele kutunda ku shongo imo ya lifuti nakweta ku shongo ikwavo, co laveni vanu. Njishaka kuzivuka vungi vwavo muvanapu.”
3Oloni Yowave wakumbulwile mwene ngwendi, “Shukulu, Shukulu Kalunga Njambi yove atumise vanu va Isalele visimbu 100 kutuvakana muvanapu ololo, ngeci yove uyoye nakumona omo avatumisa. Oloni omwo vikajo shukulu ushaka kulinga eci?” 4Oloni mwene washikile Yowave na vamyata vendi kwononoka lishiko lyendi, co vakatukile vaile nakulava vanu va Isalele.
5Vajavukile Yondau, co vatungile cilombo cavo ku mbwela ya Aloele, nganda yakele mukati ka cana, mu lifuti lya Ngande. Co kutunda kuje vaile ku kunto ya Njazele, 6vaile lalo na ku Ngilyande nakweta na ku Kandeshe, mu lifuti lya vaHivi. Asinoni vaile ku Ndani, co kutunda ku Ndani vaile ku Sindone mu kangombe ka yambi. 7Asinoni vaile ku mbwela ku nganda ya cimpaka ca Tile, vaile lalo na ku vinganda vyoshe vya, vaHiti na vaKanana, akukotoka vaile ku Mbeleshemba, ku mutambela wa mu mbwela ya lifuti lya Yunda. 8Ngecivene, omo vendanganene mu lifuti mwoshe, velukile ku Yelusalema omo kuneti vingonde vitanu na viwana na matangwa makumi avali. 9Vambulwile kuli mwene vungi vwa vanalume voshe vaje vapandele kupwa mashwalale mu Isalele, vapwile 800,000, co mu Yunda vapwile 500,000.
10Oloni omo Ndaviti wamanesele kulava vanu, citaku-taku camuyandesele manene, co wendekele kuli Shukulu Kalunga ngwendi, “Njinavulumuna manene akulinga cuma eci! Shukulu njisambese. Njinalingi mwavulema.”
11Omo Ndaviti wendukile mutondo, co lijwi lya Shukulu Kalunga lyezile kuli Ngande muka-kwimanena wa Ndaviti ngwalyo, “Ya ukaleke Ndaviti ngwove, 12‘Shukulu Kalunga nendeka ngwendi akwana vyuma vitatu angulao cimo ngeci njicilinge kuli yove.’ ” 13Co Ngande waile kuli Ndaviti, nakumuleka vije vyendekele Shukulu Kalunga, co wamwihwile ngwendi, “Waangulao cuma cika? Myaka itatu#24:13 MYAKA ITATU...Mu ciHevelu ngwavo, myaka itanu na ivali. Kenga 1 Miz 21:12. ya njala mu lifuti lyove, nambe vingonde vitatu utunde mu lifuti kutewa vitozi vove, nambe matangwa atatu a mushongo wakulitambwisa mu lifuti lyove? Co ololo yongolao mwamuvwa, unjileke muukumbulwilao njiilwise kuli Shukulu Kalunga.”
14Ndaviti wakumbulwile ngwendi, “Njili mu vukalu! Oloni mwamuvwa tuwile mu livoko lya Shukulu Kalunga, omwo ikeye muka-mema ku mbunge, oloni kesi tuwile mu livoko lya munu embwe.” 15Ngecivene, Shukulu Kalunga watumine mushongo wakulitambwisa ali Isalele, kutunda ku mutondo nakweta ku simbu ije yemikile. Kutunda ku shongo imo ya lifuti nakweta ku shongo ikwavo kwatsile vaIsalele vakupwa 70,000. 16Omo kangelo ka Shukulu Kalunga washakele ngeci anyongese Yelusalema, Shukulu Kalunga watengulwile viyongola vyendi vyakuhisa vanu, co wendekele kuli kangelo uje wakele nakuvatsiya ngwendi, “Likele! Wapwisamo!” Kangelo wakele ku mutambela wa lijungwilo lya Alauna, kaNjevushi.
17Ndaviti wamwene kangelo uje wakele nakutsiya vanu, co wendekele kuli Shukulu Kalunga ngwendi, “Yange vene njili na mulonga. Yange njalingile mwamuvi. Indi ava vanu vayanda vanalingi vikajo? Yove unapande kuhisa yange na naanga yange.”
18A litangwa lije vene, Ngande waile kuli Ndaviti wamulekele ngwendi, “Ya ku lijungwilo lya Alauna ukatungile Shukulu Kalunga mutula.” 19Co Ndaviti wononokele lishiko lya Shukulu Kalunga, waile ngwe muje mwamulekele Ngande. 20Alauna omo wakengele, wamwene mwene na vamyata vendi valinakwija kuli ikeye. Co watsikamene asi kulutwe lwa Ndaviti, 21co wehwile ngwendi, “Shukulu, omwo vikajo munezila kuno?”
Co wamukumbulwile ngwendi, “Njinaija nakulanda lijungwilo lyove njitungileo Shukulu Kalunga mutula, ngeci njimanese ou mushongo wakulitambwisa.”
22Co Alauna wamukumbulwile ngwendi, “Wambate ngano shukulu, ngeci wane kuli Shukulu Kalunga vyoshe viwushaka. Co lalo vingombe vakwenyekela a mutula kupwa n̄ombelo, na vimandauluwa vyavo evi amolika na mavaya akujungwila ngeci vipwe vitale.” 23Alauna waanene vyoshe vije kuli mwene, co wendekele kuli ikeye ngwendi, “Shukulu Kalunga Njambi yove atambule n̄ombelo yove.”
24Oloni mwene wamukumbulwile ngwendi, “Embwe, njikufweta vene ndando yaivwa. Kunjasa kukombelela kuli Shukulu Kalunga Njambi vin̄ombelo vya kulanda embwe.” Co walandele lije lijungwilo na vingombe, na mavundungulu a siliva makumi atanu. 25Asinoni watungile mutula wa Shukulu Kalunga nakukombelela vin̄ombelo vya kwenyeka, na milambu ya kulitombola. Shukulu Kalunga wakumbulwile lilombelo lyendi, co mushongo wakulitambwisa wahwile mu Isalele.
Currently Selected:
2 Samwele 24: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006