1 Vimyene Cizivukiso
Cizivukiso
Livulu Lyakulivanga lya Vimyene lilinakutwalao na vin̄anda vyakushwana kwa vumwene vwa vaIsalele vuje vwashangumukila mu mavulu a Samwele. Livulu eli vasa kulyangununa mu mitambela itatu. (1) Solomoni ashwana kupwa mwene wa mu Isalele na mu Yunda na kutsa kwa ishe Ndaviti. (2) Kushwana nakuhyana kwa Solomoni. Cuma cakwanukamo manene cinapu cakutunga kwa Njuvo ya Shukulu Kalunga mu Yelusalema. (3) Kulyangunuka kwa muyati wa Isalele mu vumwene vwa ku kunto na ku mbwela, na vin̄anda vya vimyene vaje vavushwanene kutwala mukati ka myaka 850 BC (Omo Simbu kanda Yesu Asemuke).
Mu mavulu avali a Vimyene muka-kushwana woshe vamushangazalele kwesekesa na kulongwa kwendi kuli Njambi, co kwasiwa kwa muyati wa Isalele kwakavangeyeye a kulongwa oku vene. Kulemesa tumponya nakujeneka kwononoka, simbu yaingi vyanenele n̄avava. Vimyene va ku vumwene vwa ku kunto vonwele, oloni muzimbu wa vimyene va ku Yunda walikumbasana.
Vakuzivukamo mu mavulu a Vimyene vanapu vaka-kwimanena va Shukulu Kalunga, vanalume vakusimpa vaje vendekeleleko Njambi nakunangula vanu ngeci kesi valemese tumponya nakujeneka kwononoka Njambi. Munu wakwamuka manene napu Elinja na n̄anda yendi yakulilwisa na vaka-kukombelela va Mbale (lyaangununo 18).
Kulumbununa vyuma vili mu livulu
Mamaneselelo akushwana kwa Ndaviti 1:1–2:12
Solomoni apwa mwene 2:13-46
Kushwana kwa Solomoni 3:1–11:43
a. Myaka yakulivanga 3:1–4:34
b. Kutunga Njuvo ya Shukulu Kalunga 5:1–8:66
c. Myaka ya mamaneselelo 9:1–11:43
Kulyangunuka kwa vumwene 12:1–22:53
a. Kulitengulukila kwa miyati ya ku kunto 12:1–14:20
b. Vimyene va mu Yunda na mu Isalele 14:21–16:34
c. Elinja muka-kwimanena 17:1–19:21
d. Mwene Ahave wa mu Isalele 20:1–22:40
e. Njosefati wa mu Yunda na Ahaziya wa mu Isalele 22:41-53
Currently Selected:
1 Vimyene Cizivukiso: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006