1 Tesalonika 5
5
Livwaeseleni cimweja akwija kwa Mwene
1Vasamba, kutwapandele kumisonekela a visimbu na myaka omo vyuma evi vikalingiwa. 2#Mat 24:43; Luk 12:39; 2 Pet 3:10 Omwo yeni vavenya mwazivuka ngweni Litangwa lya Mwene likaija ngwe mwizi omo akaija a simbu ya vutsiki. 3Omo vanu vendeka ngwavo, “Vyuma vyoshe vili mwamuvwa kunoloka kuluu,” asinoni vwasi-vwasi kunyonga kuvawana! Kukaija vwasi-vwasi ngwe mushongo ali munakazi ashaka kukita, co vanu kuvakasa kuputumuka. 4Oloni yeni vasamba vange, kumwesi mu lisusulungu, co Litangwa lije kesi likamikasumune ngwe mwizi. 5Yeni voshe mwapwa vanu vaje vanakundama ku ceke, vaje vanakundama ku mutanya. Yetu kutwakundamene ku vutsiki nambe ku lisusulungu embwe. 6Ngecivene, kutwapandele kulala tulo ngwe veka, tunapande kutona nakulikongomeka. 7Ikapu simbu ya vutsiki omo vanu valala tulo, ikapu simbu ya vutsiki omo vanu vakapende. 8#Isa 59:17; Efe 6:13-17 Oloni yetu twakundama ku mutanya, co tunapande kulikongomeka. Tunapande kuzala kukulaela na cizemo ngwe ntelo ya a nulo, nakuzala cinyangavili cakwovoka kwetu ngwe tepa. 9Njambi katwangwile kuyandela vukalu vwendi embwe, oloni tukatambule kwovoka ali Mwene yetu Yesu Kilistu, 10uje watutsililile ngeci tukayoye amolika nendi, nambe tuyoya nambe tutsa omo akaija. 11Ngecivene, litakameseni umo na mukwavo nakulikwasa umo na mukwavo, ngwe muje mumuli nakulinga ololo.
Vilongesa vyakumanesela na viindu
12Vakwetu, tumilomba ngwetu aneni kasingimiko kakavwa kuli vaje valinakupanga akati keni, vaje vamitwamenena nakuminangula mukuyoya kwa vuka-Yesu. 13Pangeni navo na kasingimiko kakama na cizemo, omwo a vipangi vije valinakulinga. Pweni vaka-kwoloka akati keni.
14Vakwetu, tumisindiya ngwetu munangule volwa, takameseni vipapoki, kwaseni vaka-kuzeya, pweni vaka-lukakateya kuli voshe. 15Kengeni ngeci kesi kukale umo elwisa vuvi ku vuvi, oloni simbu yoshe pweni vaka-kulinga mwamuvwa kuli umo na mukwavo na kuli vanu voshe.
16Pweni vaka-kujolela simbu yoshe, 17lombeleni simbu yoshe, 18kandeleleni mu visimbu vyoshe. Eci cikeco cashaka Njambi mukuyoya kweni muli Kilistu Yesu.
19Kesi muzime Munzinzime Wakujela, 20kesi mwombwanese lijwi lya Njambi. 21Pweni vaka-kweseka vyuma vyoshe, co nyungeni vije vinapu vyavivwa, 22co teweni vyuma vyoshe vyavivi.
23Njambi uje muka-kutwana kwoloka amipwise vaka-kujela mu vyoshe, co anyunge vunu vweni vwoshe, munzinzime, na mwonyo na muvila, kujeneka milonga yoshe akwija kwa Mwene yetu Yesu Kilistu. 24Uje namisana akacilinga, omwo wapwa wa kulongwa.
25Vakwetu, netu tulombeleleni lalo.
26Indwiseni voshe vaka-kukulaela nakulitsemba kwa kwoloka.
27Njimilambelela na moko ya Mwene kulava mukanda ou ku mesho a vaka-kukulalela voshe.
28Kutetela kwa Mwene yetu Yesu Kilistu kukale amo neni.
Currently Selected:
1 Tesalonika 5: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006