1 Tesalonika 4
4
Kuyoya kuje kuvwaelelesa Njambi
1Mukumanesela, vasamba vetu, mwalilongesele kuli yetu vati munapande kuyoya ngeci muvwaelelese Njambi. Mwa vushunga vene, omu mukemwo mumunakala nakuyoya. Co ololo tumilomba nakumisindiya mu lizina lya Mwene Yesu ngwetu muwezeleleko manene. 2Omwo mwazivuka vilongesa vitwamilongesele na moko ya Mwene Yesu. 3Njambi ashaka ngeci mupwe vakujela nakupatuka ku vupangala. 4Munu ku munu kuli yeni vanalume azivuke vati napande kuyoya na munakazi wendi#4:4 NAPANDE KUYOYA NA MUNAKAZI WENDI: Nambe, napande kunyunga muvila wendi. mu ngila yakujela na kalemeso, 5kesi na mashungu amavi, ngwe vaka-kujeneka kukulaela vaje kuvazivuka Njambi. 6Mu cifwa eci vene, naumo wai weni napande kulinga mwamuvi kuli vakwavo vaka-Yesu nambe kuvanyanyamena. Twamilekele laja cuma eci, co twaminangwile na nzili ngwetu Mwene akanyanyamesa vaje voshe valinakulinga ngacije. 7Omwo Njambi katusanene ngeci tuyoye mu vupangala embwe, oloni mukujela. 8Ngecivene, woshe uje avyana vilongesa evi kavyana munu, oloni alinakuvyana Njambi, uje akamyana Munzinzime wendi Wakujela.
9Kutwapandele kumisonekela a cizemo kuli umo na mukwavo. Omwo yeni vavenya Njambi wamilongesele vati munapande kulizema umo na mukwavo. 10Co munakala nakulinga ngeci kuli vaka-kukulaela voshe mu Masendoniya mwoshe. Ngecivene, tumilomba vakwetu, wezeleleniko manene. 11Pweni vaka-kuyoya mu kwoloka, akeni mana eni ku vyuma vyeni, nakupanga vyakulikwasa navyo yeni vavenya, ngwe muje twamilekeke laja. 12Mu ngila eyi vene, mukatambula kasingimiko kuli vaje kesi vaka-kukulaela, co kumukayoyela ali munu umo kuli vije munajeneka.
Kwija kwa Mwene
13Vakwetu, tushaka muzivuke vushunga ali vaje vanatsi, ngeci kesi mukale na vusiwa, ngwe vaje kuvesi na cinyangavili. 14Omwo tunakulaela ngwetu Yesu watsile, co wasangukile lalo, co tunakulaela ngwetu Njambi akanena amo na Yesu vaje vatsile mukukulaela kuli ikeye. 15#1 Koli 15:51-52 Evi tumilongesa ololo vinapu vilongesa vya Mwene ngeci, yetu tucili nakuyoya a litangwa lije Mwene akaija kutukatwama kulutwe lwa vaje vatsile laja. 16Kukakala mutambi wa lijwi lyakama lyakushika, lijwi lya kangelo wakama, nakwoya kwa lupembo lwa Njambi, co Mwene ikeye vavenya akashuluka kutunda mwilu. Co vaje vatsile mukukulaela kuli Kilistu vakasangukila ku mwonyo akulivanga, 17asinoni yetu tucili nakuyoya a simbu ije vakatukungulwila amo navo mu mashelwa nakuliwana na Mwene a mukambwila. Co tukakala amo na Mwene simbu yoshe. 18Ngecivene, litakameseni umo na mukwavo na majwi awa.
Currently Selected:
1 Tesalonika 4: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006