1 Vimyene 22
22
Mikaya muka-kwimanena anangula Ahave
(2 Miz 18:2-27)
1Kwakele kwoloka akati ka Isalele na Silya mu myaka ije ivali, 2oloni mu mwaka wamucitatu Mwene Njosefati wa mu Yunda waile mukumona Mwene Ahave wa mu Isalele.
3Ahave wehwile vamyata vendi ngwendi, “Omwo vikajo kutwatambwile Lamote ili mu Ngilyande kuli mwene wa Silya? Ikeyo yapwa yetu!” 4Co Ahave wehwile Njosefati ngwendi, “Wasa kuya amo nange mukulwisa Lamote ndi?”
Njosefati wamukumbulwile ngwendi, “Yange njinalivwaesela cimweja nga uya, cifwa cimo na kuli mashwalale vange na tuvalu twange. 5Oloni akulivanga tucihule cizango ca Shukulu Kalunga.”
6Ngecivene, Ahave wasanene vaka-kwimanena, vapwile 400, co wavehwile ngwendi, “Citava ngeci njiye nakulwisa Lamote nambe embwe?”
Co vakevo vamukumbulwile ngwavo, “Ya ukavalwise. Shukulu Kalunga akakwana nzili yakuvafungulula.”
7Oloni Njosefati wehwile ngwendi, “Kuma kukwesi muka-kwimanena weka lalo uje itwasa kwihula ali Shukulu Kalunga ndi?”
8Ahave wamukumbulwile ngwendi, “Kwali, Mikaya muna Imela. Oloni yange njamuzinda omwo ikeye simbu yoshe kesi kwambulwila vuka-kwimanena vwavuvwa ali yange, oloni vwavuvi lika.”
Njosefati wamukumbulwile ngwendi, “Mwene kapandele kwendeka ngacije embwe!”
9Asinoni Ahave wasanene mwata umo, co wamulekele aye akasane Mikaya vwasi.
10Co vaje vimyene vavali, vazalele vikoveyo vyavo vya vumwene, vatumbamene mu matanda avo ku mutambela wa lijungwilo kuyehi na cikolo ca Samaliya, co voshe vaka-kwimanena vambulwile vuka-kwimanena ku mesho avo. 11Umo wavo vaka-kwimanena, Zendekiya muna Kenaana, wafulile vimbinga vya vutale, co wendekele kuli Ahave ngwendi, “Eci cikeco canendeka Shukulu Kalunga ngwendi, ‘Na vimbinga evi ukalwisa vaSilya, co mwa vushunga vene ukavafungulula.’ ” 12Co vaka-kwimanena voshe vendekele cuma cimo ngwavo, “Ya ukalwise Lamote, co ukahyana. Shukulu Kalunga akakwana nzili yakuvafungulula.”
13A simbu ije vene, uje mwata waile nakukasana Mikaya wayevetelele Mikaya ngwendi, “Vaka-kwimanena voshe vanendeka lijwi limo, nove majwi ove alitombole na majwi a vakweni.”
14Oloni Mikaya wamukumbulwile ngwendi, “Mu lizina lya Shukulu Kalunga njilikumiiya ngeci njikendeka vene evi ikeye anjilekavyo!”
15Omo ikeye wetele ku mesho a Mwene Ahave, co mwene wamwihwile ngwendi, “Mikaya, citava ngeci Mwene Njosefati nange tuye tukalwise Lamote, indi embwe?”
Co Mikaya wamukumbulwile ngwendi, “Eyo, yeni mukalwe! Mwa vushunga mukahyana. Shukulu Kalunga akamyana nzili yakuvafungulula.”
16Oloni Ahave wamukumbulwile ngwendi, “Omo wendeka kuli yange mu lizina lya Shukulu Kalunga, unapande kwendeka vushunga! Visimbu vingaijo njikakuleka ngacije?”
17 #
Kul 27:17; Mat 9:36; Mak 6:34 Mikaya wamukumbulwile ngwendi, “Mu cimona njamwene mashwalale va Isalele valishandokela akamwa ya malundu ngwe vimanga vakujeneka kanyungi. Co Shukulu Kalunga wendekele ngwendi, ‘Ava vanu kuvesi na ntwama, veceleni veluke ku membo mu kwoloka.’ ”
18Ahave wendekele kuli Njosefati ngwendi, “Kunjakulekele ngwange munu ou kesi kwambulula vuka-kwimanena vwavuvwa kuli yange, oloni vwavuvi lika!”
19 #
Isa 6:1; Yom 1:6 Mikaya wamukumbulwile ngwendi, “Ololo tolilila eci cendeka Shukulu Kalunga! Njamwene Shukulu Kalunga natumbama a litanda lyendi mwilu, na tungelo twendi voshe vemanene kuli ikeye ku cilyo na ku cimoshwe. 20Shukulu Kalunga wehwile ngwendi, ‘Iyajo akakwisa Ahave ngeci akaye ku Lamote vakamutsiileko?’ Tungelo vamo vendekele mweka, co vakwavo lalo vendekele mweka, 21noo munzinzime wezile wemanene kulutwe lwa Shukulu Kalunga, wendekele ngwawo, ‘Yange njikamukwisa.’ 22Co Shukulu Kalunga wehwile ngwendi, ‘Mu ngila ikajo ukamukwisila?’ Munzinzime wakumbulwile ngwawo, ‘Njikaya nakusindiya vaka-kwimanena voshe va Ahave kwendeka makuli.’ Co Shukulu Kalunga wendekele ngwendi, ‘Ya ukamukwise. Ukasa vene.’ ”
23Ngecivene, Mikaya wamulekele ngwendi, “Eci cikeco vene calingiwa. Shukulu Kalunga ikeye nalingisa vaka-kwimanena vove voshe kukukwisa. Oloni ikeye nazivuka ngwendi ukaliwana uli mu vukalu?”
24Asinoni Zendekiya muka-kwimanena waile kuli Mikaya, nakumupupa mbanda ku mesho, co wamwihwile ngwendi, “Munzinzime wa Shukulu Kalunga wasa kutunda muli yange wendeke muli yove?”
25Co Mikaya wamukumbulwile ngwendi, “Ukanjanuka omo ukaya ku mulili wa kunima ya njuvo nakuvandako.”
26Co Mwene Ahave washikile umo wa ali vamyata vendi ngwendi, “Kwateni Mikaya mumutwale kuli Amoni, nguvulu wa Samaliya, na kuli Yowashe muna mwene. 27Valekeni vamwake mu kamenga, co vamwane lika likende na mema noo njiiluka mwamuvwa.”
28Co Mikaya watambekeleleko ngwendi, “Nga yove wiluka mwamuvwa, co Shukulu Kalunga kendekele muli yange embwe!” Co lalo wendekele ngwendi, “Tolilileni kesi mwivale evi njinendeka!”
Kutsa kwa Ahave
(2 Miz 18:28-34)
29Asinoni Mwene Ahave wa mu Isalele na Mwene Njosefati wa Yunda vaile mukulwisa nganda ya Lamote mu Ngilyande. 30Co Ahave wendekele kuli Njosefati ngwendi, “Omo tukovela mu nzita, yange njilimuka mweka, oloni yove zala vene vikoveyo vya vumwene.” Ngecivene, mwene wa mu Isalele walimukile mweka akukovela mu nzita. 31Co mwene wa Silya washikile vaka-kushika matemba endi vaje makumi atatu na vavali ngeci kesi valwise munu weka kuvanga mwene wa mu Isalele. 32Ngecivene, omo vakevo vamwene Mwene Njosefati, co voshe vayongwele ngwavo ikeye mwene wa mu Isalele, co vakevo vatengulukile nakumulwisa. Oloni omo watambekele, 33co vakevo vanangukile ngeci kesi ikeye mwene wa Isalele, co valikelele kumulwisa. 34Nameme ngoco, akuvezika, lishwalale umo wa vaSilya washele mukili wendi, co wakwatele Mwene Ahave mukati ka mutongo wa vuzalo vwendi vwa nzita. Co Ahave walekele muka-kwendesa litemba lyendi ngwendi, “Njinavetwa! Tenguluka nakutundisa litemba mu nzita!”
35Omo nzita yatwaleleo kulwa manene, co Mwene Ahave vamutumbamesele mu litemba lyendi nakulwa na vaSilya. Co maninga akutunda a mbandu yendi andwekelele manene asi ya litemba, co kweta ku cingwezi watsile. 36Co omo litangwa lyatokele, mutambi wetile mu mbunga yoshe ya vaIsalele ngwavo, “Munu na munu eluke ku lifuti lyendi na ku limbo lyendi!”
37Omu mukemwo mwatsililile Mwene Ahave. Co muvila wendi vautwalele ku Samaliya nakukautsinda. 38Co litemba lyendi valikushilile mu lishali lya Samaliya, kuje tutali vakacwilile maninga endi, co na vikwizi vajwelelemo, ngwe vene muje mwendekele Shukulu Kalunga.
39Vyuma vyeka vije vyalingile Mwene Ahave, kuwezelelako na vipangi vyendi vya lipela lyakwoleka na vimbinga vya vinjamba, vyoshe vije watungile, vavisoneka mu Livulu lya Mizimbu ya Vimyene va Isalele. 40Co a kutsa kwa Ahave munendi Ahaziya wamushwanene kupwa mwene.
Mwene Njosefati wa mu Yunda
(2 Miz 20:31–21:1)
41Mu mwaka wamuciwana wakushwana kwa Mwene Ahave wa mu Isalele, Njosefati muna Asa wapwile mwene wa mu Yunda 42omo ikeye wakele na myaka makumi atatu na myaka itanu, co washwanene mu Yelusalema myaka makumi avali na itanu. Co vaina lizina lyavo lyapwile Azuva, muna Shilehi. 43Ngwe mwalingile ishe Asa, ikeye walingile vije vyavivwa ku mesho a Shukulu Kalunga, oloni kanyongesele ije mitambela vakele nakulemesela vaje vaka-kujeneka kukulaela, co vanu vatwaleleo kukombelela nakwenyeka insense kuje. 44Njosefati wakele mu kwoloka na mwene wa mu Isalele.
45Vyuma vyeka vije vyalingile Njosefati, kusimpa kwendi kwoshe, na vinzita vyendi vyoshe, vavisoneka mu Livulu lya Mizimbu ya Vimyene va mu Yunda. 46Co ikeye washekele voshe vikwizi va vanalume na ava va vanakazi vaje vakele nakupanga ku mitula ya vinjambi va makuli vaje vasaleleo kutunda ku matangwa a ishe Asa.
47Co lifuti lya Endome kulyakele na mwene, valishwanene kuli katumwa uje yaangwile mwene wa mu Yunda.
48Mwene Njosefati washongele mato akama a mu mema a kalunga aje vavwaeselele kututa ngolinde ya ku lifuti lya Ofila, oloni kuwaileko omwo atavukilile ku Eziongembele. 49Asinoni Mwene Ahaziya wa mu Isalele wendekele kuli Njosefati ngwendi vanalume vendi vaye amo na vanalume vendi, oloni Njosefati wavyanene.
50Njosefati watsile, co vamutsindile mu mbumbo ya vumwene mu Nganda ya Ndaviti, co munendi Njeholame washwanene kupwa mwene.
Mwene Ahaziya wa mu Isalele
51Mu mwaka wamulikumi na itanu na ivali wakushwana kwa Mwene Njosefati wa mu Yunda, Ahaziya muna Ahave wapwile mwene wa mu Isalele, co washwanene mu Samaliya myaka ivali. 52Co walingile vuvi ku mesho a Shukulu Kalunga, kukava vuvi vwalingile ishe Ahave, na vaina Njezevele, na mwene Yelovowame, uje watwamenenene Isalele mu vuvi. 53Walemesele nakupangela Mbale, ngwe mwalingile ishe akulivanga, na ikeye lalo washangumwine vukalu vwa Shukulu Kalunga, Njambi wa Isalele.
Currently Selected:
1 Vimyene 22: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006