Apocalipsis 1
1
Jaꞌ Wan Tzet Chi Yakꞌ Cristo Kotajne Eloj
1Jaꞌ jun libro tiꞌ chi alontej wan tzet akꞌbꞌil tet Jesucristo yu Dios, yu yakꞌon kotajne el mac jon yakꞌomal jon servil. Jaꞌ wan chi yaltej tiꞌ, sowalil tuxa oj yunne. Jix chejletej jun ángel yu Jesucristo ey jin an, yu yakꞌon wotajne el wan tiꞌ, jain Juan jin tiꞌ an, ẍejabꞌ jin Naj Jesucristo. 2Jaꞌ masanil tzet jix wil an, jaꞌ chi wal an. Jaꞌ skꞌane Dios chi wal an. Jaꞌ wan oj wal tiꞌ, jix yakꞌ pax sbꞌa Jesucristo testigoal yin. 3Jaꞌ jun libro tiꞌ, yin eyojto chi yalon can tzettaj yetal oj juloj. Jaꞌ mac chi awten a tzet chi yalaꞌ, cꞌal ebꞌ chi abꞌeni, caw watxꞌ yet ebꞌ, ta chi sjije ebꞌ tzet chi yalaꞌ, yutol tuxa oj yun tzet chi yal an tiꞌ.
Jaꞌ An Scarta Naj Juan Jix Yatoj Tet Jujebꞌ Iglesia
4Jain Juan jin tiꞌ an, jain ton chin tzꞌibꞌetoj ey jex, jex creyente bꞌey jujebꞌ iglesia bꞌey yul yet Asia.* Chi woche chi xꞌox swatxꞌcꞌulal Dios ey jex, catuꞌ ey watxꞌcꞌulal snan je xol yu Dios. Eyecꞌ Dios tinaniꞌ, ey cꞌaltaꞌ ecꞌ Naj yet tax yichbꞌanil, catuꞌ tꞌinan oj juloj. Chi woche pax chi xꞌox swatxꞌcꞌulal ebꞌ jujwan Espíritu eyecꞌ sattaj sdespacho ey jex. 5Jaꞌ Jesucristo, jaꞌcaw testigo. Chi woche pax chi xꞌox swatxꞌcꞌulal ey jex, catuꞌ yu Naj yuxan ey watxꞌcꞌulal snan je xol. Jaꞌ Naj bꞌabꞌel pitzcꞌunaj a xol ebꞌ camnaj. Jaꞌ Naj Yaaw yeoc yibꞌan ebꞌ rey yul yibꞌankꞌinal tiꞌ. Caw ey scamcꞌulal Naj ey jon. Jix yiꞌel cu penail yetoj ẍiqꞌuil. 6Jaꞌ Naj jix cu aon oc reyal. Jix yakꞌ kopiso junjun jon yin ao oc tiꞌe tet Dios, Naj Smam. Caw mimanbꞌanebꞌil ojabꞌ Naj, ey ojabꞌ yipal Naj yin tobꞌalkꞌinal. Amén. 7Ilaꞌ, tuxa oj jul Cristo xol asun. Masanil ánima oj ilon sjuli, tol tax ebꞌ jix makꞌon cam Naj, oj yil sjul Naj ebꞌ. Jaꞌ yet oj yilon ánima bꞌey junjun conobꞌ yul yibꞌankꞌinal tiꞌ, oj okꞌ ebꞌ. Caw yel oj yunne. 8Jix yalon Naj Kaawil jaxca tiꞌ: “Jain ton bꞌabꞌel jin sattaj masanil, catuꞌ slawubꞌal jin pax oj. Jaxca yakꞌon letra A, yetoj Zeta, quey jin tuꞌ an,” ẍi Naj Kaawil, Naj chi skeꞌ yu masanil. Eyecꞌ Naj tinaniꞌ, ey cꞌaltaꞌ ecꞌ Naj yet tax yichbꞌanil, catuꞌ jaꞌton Naj oj juloj.
Jix Yil Yin Cristo Naj Juan Snan Xol Stzejejial
9Jain Juan jin tiꞌ an, wuẍtaj jin bꞌa yin Cristo je yetoj. Ketbꞌi cu bꞌa kabꞌen syaꞌil. Catuꞌ ketbꞌi pax cu bꞌa yalan sYaawil Dios. Jun laan chi kute cu chaꞌon cu tecꞌanil chi yakꞌ Jesucristo. Jaꞌ yet junel, bꞌet akꞌbꞌil jin can bꞌey jun lugar chi yij Patmos eycantoj snan xol jaꞌ mar, yu cꞌal walon el skꞌaneal Dios, cꞌal yu wakꞌon jin bꞌa testigoal yin Jesucristo. 10Jaꞌ yet jun scꞌual Naj Kaawil, jix jul yipal Naj Espíritu win an. Catuꞌ jix wabꞌeni, ey jun aw caw ip yoc wintaj jix wabꞌ an, jaxca yokꞌ chꞌen trompeta. 11Jix yalon ey jin jaxca tiꞌ:
/—Jain ton bꞌabꞌel jin sattaj masanil, catuꞌ slawubꞌal jin pax oj. Jaxca yakꞌon letra A, yetoj Zeta, quey jin tuꞌ./ Jaꞌ wan tzet oj ja wil tiꞌ, tzꞌibꞌe can yul junoj libro. Catuꞌ cha waontoj tet ebꞌ creyente bꞌey wan jujebꞌ iglesia, /bꞌey yul yet Asia,/ tet ebꞌ a Éfeso, tet ebꞌ a Esmirna, tet ebꞌ a Pérgamo, tet ebꞌ a Tiatira, tet ebꞌ a Sardis, tet ebꞌ a Filadelfia, cꞌal tet ebꞌ a Laodicea, ẍi ey jin an. 12Jix lawi cꞌal tuꞌ, catuꞌ jix jin meltzotoj tꞌanan wintaj wilon mactxequel jun chi alon ey jin tuꞌ an. Catuꞌ jix wilon an, ey jujebꞌ oro tzejtebꞌal. 13Jaꞌ snan xol wan tzejtebꞌal tuꞌ, ey jun mactxequel jaxca yili ánima. Eyoc jun jojan pichile yin, chi ta eyol yin yajan. Eyoc jun oro miman sat kꞌalile yin xaamscꞌul. 14Jaꞌ xiil, caw saj jaxca sajin lana, ma jaxca sajil sajbꞌat. Jaꞌ sbꞌakꞌ sat, laan yili jaxca xaj kꞌakꞌ. 15Jaꞌ yajan, caw chi tzejeji jaxca chꞌen bronce jix tzꞌaꞌ yul jorna, catuꞌ chi nijle el stzꞌilal, tuxa cꞌal chi tzꞌejlabꞌi yili. Jaꞌ yul snukꞌ, tuxa cꞌal chi nilili sbꞌilwi jaxca sbꞌey jaꞌ mimej jaꞌ. 16Iꞌbꞌil a jujebꞌ weycan yu swatxꞌ kꞌabꞌ Naj. Eyeltej jun espada caabꞌ yee caw eel yul stiꞌ. Chi kopopi sat Naj jaxca skopopial yajan cꞌu yet chuman cꞌu. 17Jaꞌ yet jix wilon yin tuꞌ, jix jin ey telna yajantaj jaxca junoj camnaj. Jix yaontoj skꞌabꞌ wibꞌan. Catuꞌ jix yalon ey jin jaxca tiꞌ:
—Manche jaach xiwi. Jain ton bꞌabꞌel jin sattaj masanil catuꞌ slawubꞌal pax jin. 18Jain ton tiꞌ, jaꞌcaw iquis jin. Caxcꞌal jix jin camle, iquis jin cꞌal pax yin junelne tinaniꞌ. Jain tiꞌ, yaawil jin camich, yaaw jin pax jun lugar bꞌey yaman ecꞌ spixan ebꞌ camnaj. 19Tzꞌibꞌe can wan tzet jix ja wil tiꞌ, wan eyecꞌ yet jun tiempoal tiꞌ, cꞌal wan tol to oj juloj. 20Oj wal ey jaach tzet chi yal yeloc apnoj wan jujebꞌ weycan jix ja wil yul jin watxꞌ kꞌabꞌ, cꞌal wan jujebꞌ oro tzejtebꞌal jix ja wilaꞌ. Jaꞌ wan jujebꞌ weycan tuꞌ, yechel ebꞌ jujwan jin chejabꞌ bꞌey jujebꞌ iglesia. Jal jujebꞌ tzejtebꞌal tuꞌ xin, yechel jujebꞌ iglesia tuꞌ yeoc ebꞌ.
Currently Selected:
Apocalipsis 1: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.