Apocalipsis 2
2
Jaꞌ Tzet Jix Stzꞌibꞌetoj Naj Juan Tet Ebꞌ Creyente A Éfeso
1Jaxca tiꞌ cha wute ja tzꞌibꞌentoj tet jun jin chejabꞌ eyecꞌ snan xol ebꞌ creyente bꞌey conobꞌ Éfeso: “Jaꞌ Naj mitxꞌnen a jujebꞌ weycan yul swatxꞌ kꞌabꞌ, catuꞌ chi ecꞌabꞌ snan xol jujebꞌ oro tzejtebꞌal, jaꞌ chi alon ey jex jaxca tiꞌ: 2Wotaj masanil tzet chi el je yuneni. Wotaj tol caw che yiꞌatej je cꞌul je mulna yin yet Dios, catuꞌ tol caw miman che yute je cꞌul stecha masanil tzettaj yetal je yu. Catuꞌ cꞌam pax che chaꞌoc ebꞌ cꞌam swatxꞌil je nan je xol. Wotaj pax oj, tol che yakꞌle porobꞌal ebꞌ chi tzꞌaj yaloc sbꞌa jin chejabꞌoj. Jix eyqꞌuey ebꞌ yin slekꞌtiꞌal je yu. 3Caw miman che yute je cꞌul stecha masanil tzettaj yetal je yu. Miman syaꞌilal jix el je yilon jin yaꞌiloj, ma cꞌal jex isabꞌi aoj. 4Asan xin, ey niꞌan man tzꞌajanoj jex chi wil an, yutol manxa laan oj je camcꞌulal win jaxca yet sbꞌabꞌelal. 5Yu jun tuꞌ, naꞌwejtej tzet utbꞌil je yei, yet watxꞌ cꞌam chi etex el je naꞌbꞌal. Naꞌwej je bꞌa, waꞌnewej oc je bꞌeybꞌal jaxca yet yalantoj. Ta man oj je naꞌ je bꞌa, eyman oj jin apnoj ey jex, catuꞌ oj jin apnoj wiꞌon el je tzejtebꞌal bꞌey slugar. 6Ey jun tzet watxꞌ chi el je yunen chi wil an. Yutol jaꞌ sbꞌeybꞌal ebꞌ Nicolaítas,#2:6 Jaꞌ ebꞌ Nicolaítas chi cuywa ebꞌ yin wan txꞌoj cuybꞌanile, tol caw otajbꞌil ebꞌ, ma caw ey sjelanil ebꞌ tet wanxa creyente. cꞌam swatxꞌil yul je sat, ilaꞌ jin pax oj, cꞌam swatxꞌil ebꞌ yul jin sat an. 7Masanil mac chi abꞌen wan tiꞌ, ya ojabꞌ oc xiquin yin tzet chi yal Santo Espíritu tet junjun iglesia. Jix yal Naj jaxca tiꞌ: Jaꞌ ebꞌ oj yakꞌ ganar yakꞌon techaoj, oj wakꞌ sat teꞌ teꞌ sloꞌ ebꞌ, teꞌ yet kꞌinale tol ey cꞌal yin tobꞌalkꞌinal. Jaꞌ jun teꞌ tuꞌ, jaꞌ bꞌey satcan bꞌey eyecꞌ Dios, jatuꞌ eyecꞌoj.”
Jaꞌ Tzet Jix Stzꞌibꞌetoj Naj Juan Tet Ebꞌ Creyente A Esmirna
8Jaxca tiꞌ cha wute ja tzꞌibꞌentoj tet jun jin chejabꞌ eyecꞌ snan xol ebꞌ creyente bꞌey conobꞌ Esmirna: “Jaꞌ Naj bꞌabꞌel sattaj masanil, catuꞌ slawubꞌal pax oj, jaꞌ Naj jix cami, jix pitzcꞌu cꞌal pax aoj, jaꞌ Naj chi alon ey jex jaxca tiꞌ: 9/Wotaj tzet chi el je yuneni./ Wotaj, tol wu cꞌal, yuxan che yabꞌ syaꞌilal. Caw mebꞌa jex, caw yel, bꞌeom jex pax yul sat Dios. Wotaj pax oj, tzet chi yun je bꞌuchle yu ebꞌ chi yaloc sbꞌa Israelal. Jaꞌ ebꞌ tuꞌ, jaꞌ naj Satanás lalan yakꞌon servil ebꞌ. 10Manche jex xiw yu wan syaꞌilal oj jul je yibꞌan. Ey jex oj jex ale oc preso yu naj diablo, catuꞌ oj jex yakꞌon porobꞌal. Oj je yabꞌ syaꞌil jayebꞌoj cꞌu. Jijem ojabꞌ cꞌal pax che yute je bꞌa masantaꞌcꞌal camich. Oj jin pajtze je jijemal tuꞌ, jaꞌton je kꞌinal tol ey cꞌal yin tobꞌalkꞌinal. 11Masanil cꞌal mac chi abꞌeni, ya ojabꞌ oc xiquin ebꞌ yin tzet chi yal Naj Espíritu tet junjun iglesia. Chi yal jaxca tiꞌ: Jaꞌ ebꞌ oj akꞌon ganar yakꞌon techaoj, manxa oj yabꞌ syaꞌil ebꞌ jun yet scaabꞌ camich.”#2:11 Jaꞌ jun yet scaabꞌ camich, jaꞌton yet chi too ebꞌ bꞌey syaꞌilal yin junelne.
Jaꞌ Tzet Jix Stzꞌibꞌetoj Naj Juan Tet Ebꞌ Creyente A Pérgamo
12Jaxca tiꞌ cha wute ja tzꞌibꞌentoj tet jun jin chejabꞌ eyecꞌ snan xol ebꞌ creyente bꞌey conobꞌ Pérgamo: “Jaꞌ jun mactxequel ey yespada caabꞌ yee tol caw eel, jaꞌ chi alon ey jex jaxca tiꞌ: 13/Wotaj masanil tzet chi el je yuneni./ Wotaj tol chex ee ecꞌ bꞌey jun conobꞌ bꞌey caw chi yakꞌ yaawilal naj Satanás, jacꞌalaꞌ pax je jijen ey jin an. Yel toni, jix yakꞌ naj Antipas testigoal win an. Jaꞌ jix makꞌle cam je xol, bꞌey eyecꞌ Satanás tuꞌ, ma cꞌaltaꞌ je bꞌej je yaon oc je cꞌul win an. 14Ey pax bꞌey man tzꞌajanoj jex chi wil an. Ilaꞌ tol ey jex che yaoc je naꞌbꞌal yin scuybꞌanil Balaam,#Números 25:1-3; 31:16. naj jix akꞌon scꞌul naj Balac, yet jix akꞌle etex el ebꞌ Israel. Yu naj Balac tuꞌ, yuxan chi ẍiꞌ ebꞌ tzet chi oc yin xaambꞌalil tet tzet chi al-le oc diosal, catuꞌ jix too pax ebꞌ yin mule. 15Yetoj pax oj, ey jex che yaoc je naꞌbꞌal yin scuybꞌanil ebꞌ Nicolaítas. /Jaꞌ scuybꞌanil ebꞌ tuꞌ, caw cꞌam swatxꞌil chi wil an./ 16Yu jun tuꞌ, naꞌwej je bꞌa. Ta cꞌamaj, oj jin apnoj yin eymanil ey jex, catuꞌ oj wakꞌlen jowal je yetoj mac jex queytuꞌ che yute je bꞌa jaxca tuꞌ, oj wakꞌbꞌalne jun espada eyeltej yul jin tiꞌ an. 17Masanil mac chi abꞌeni, ya ojabꞌ oc xiquin ebꞌ yin tzet chi yal Naj Espíritu tet junjun iglesia, chi yal jaxca tiꞌ: Jaꞌ ebꞌ oj akꞌon ganar oj wakꞌon jin maná sloꞌ ebꞌ,#2:17 Maná, jaꞌton jun loꞌbꞌe jix akꞌle yu Dios tet ebꞌ Israel bꞌey cusiltaj txꞌotxꞌ. Jaꞌ jun maná chi yal yin titiꞌ, yet Espíritu, manaj yet mimanile jaxca yet ebꞌ peyxa tuꞌ. jun ewbꞌabꞌil eloj. Oj wakꞌ pax jun yaliẍ chꞌen caw saj tet junjun ebꞌ. Jaꞌ yin jun chꞌen tuꞌ, tzꞌibꞌebꞌil oc jun acꞌ bꞌie cꞌam mac otajneni. Asan ebꞌ chi ẍaꞌ yet oj otajnen eloj.”#2:17 Jun yaliẍ chꞌen, tejan jaxca jun jix skꞌanbꞌalne ebꞌ yet peyxa tuꞌ, yet watxꞌ chi skeꞌ yoctoj ebꞌ bꞌey junoj kꞌin. Jaxca junoj boleto.
Jaꞌ Tzet Jix Stzꞌibꞌetoj Naj Juan Tet Ebꞌ Creyente A Tiatira
18Jaxca tiꞌ cha wute ja tzꞌibꞌentoj tet jun jin chejabꞌ eyecꞌ snan xol ebꞌ creyente bꞌey conobꞌ Tiatira: “Jaꞌ Naj Scꞌaal Dios, Naj jaxca xaj kꞌakꞌ yul sat, cꞌal yajan jaxca chꞌen bronce chi nijle el stzꞌilal. Jaꞌ Naj chi alon ey jex jaxca tiꞌ: 19Wotaj masanil tzet chi el je yuneni. Wotaj tol ey je camcꞌulal. Caw chin je yaoc yin je cꞌul. Yin jijemal chin je yakꞌ servil. Caw miman che yute je cꞌul stecha masanil tzettaj yetal je yu. Wotaj, tol yel miman je mulnail tinaniꞌ yintaj yet yalantoj. 20Ey wal niꞌanxa bꞌey man jex tzꞌajanoj, yutol che chaꞌoc jun ix caw pena ix je nan je xol.#2:20 Jaꞌ skꞌaneal ix Jezabel chi kil bꞌey 1a Reyes 16:31-33. Jaꞌ jun ix tuꞌ, caw penawom ix, yuxan chi kꞌanbꞌalne sbꞌi yu ebꞌ ix penawom ix. Jaꞌ jun ix tuꞌ chi yij Jezabel, chi tzꞌaj yaloc sbꞌa ẍejabꞌoj Dios, tucꞌal chi yakꞌ pax lekꞌtiꞌal tet ebꞌ jin chejabꞌ. Yutol chi akꞌwi cꞌule tet ebꞌ, tzet utbꞌil tol chi too ebꞌ yin mule, catuꞌ chi ẍiꞌon ebꞌ tzet jix akꞌle yin xaambꞌalil tet tzet chi al-le oc diosal. 21Jix wakꞌ cꞌal mimancꞌulal yin ix, yet watxꞌ tol chi snaꞌ sbꞌa scꞌul ix yin yamulal, ma cꞌal pax snaꞌ sbꞌa scꞌul ix niꞌoj. 22Yu jun tuꞌ, oj watoj ix sat txꞌat yu jun miman yaꞌbꞌil yin smimanil ix. Jal ebꞌ chi unen mul yetoj ix, oj wakꞌ miman syaꞌilal yibꞌan ebꞌ. Oj wute ebꞌ jaxca tuꞌ, ta cꞌam chi snaꞌ sbꞌa scꞌul ebꞌ, ta man cꞌal oj sbꞌejcan sbꞌeybꞌal ebꞌ jaxca ix tuꞌ. 23Yetoj pax oj, oj wakꞌ pax cam ebꞌ chi cuywi yintaj ix. Jaxca tuꞌ xin, oj yotajne el junjun iglesia, tzet utbꞌil tol jain tiꞌ, wotaj masanil tzet chi ecꞌ yin je naꞌbꞌal cꞌal yin je pixan. Oj jin pajtze jain tiꞌ, jatacꞌalaꞌ tzet chi el je yunen junjun jex. 24Jal jaex jex a Tiatira, jex tol cꞌam che yaoc je naꞌbꞌal yin scuybꞌanil ix ix tuꞌ, jaꞌton scuybꞌanil Satanás jun chi aloni, tol miman yeloc apnoj. Cꞌam junojxa chejbꞌanile chi waltoj ey jex jaex tiꞌ. 25Asan jun tiꞌ chi waltoj ey jex. Tol jacꞌalaꞌ watxꞌ ojabꞌ cꞌal che yute je bꞌeybꞌal, masantaꞌcꞌal chin apni an. 26Jaꞌ ebꞌ oj yakꞌ ganar yakꞌon techaoj, ebꞌ jacꞌalaꞌ yunen jaxca chi woche masantaꞌcꞌal slawubꞌal. Jaꞌ ebꞌ oj waoc yaawiloj wan mimej conobꞌ. 27Jaxca jix jin yute jin Mam yakꞌon wopiso jain tiꞌ, jaxca tuꞌ oj wute wakꞌon yopiso ebꞌ. Yu jun tuꞌ, oj yakꞌ yaawilal ebꞌ yetoj jun chꞌen kꞌojoche. Chi yal yeloc apnoj tol caw jow oj yun yetoj jun yopiso. Jaꞌ junjun mimej conobꞌ tuꞌ, jaxca junoj txꞌotxꞌ xi chi makꞌle poꞌo, jaxca tuꞌ oj yun yu ebꞌ. 28Yetoj pax oj, oj wakꞌ pax jun miman weycan tet ebꞌ,#2:28 Tejan chi yal yu jun weycan yutol caw miman yeloc apnoj ebꞌ jaxca jun weycan tuꞌ. Job 38:7, ma tol ey stzejejial ebꞌ jaxca jun weycan tuꞌ. Daniel 12:3. jun chi aol yet cꞌamto chi sajbꞌi yet skꞌinibꞌ. 29Masanil mac chi abꞌeni, ya ojabꞌ xiquin ebꞌ yin tzet chi yal Naj Espíritu tet junjun iglesia.”
Currently Selected:
Apocalipsis 2: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.