Apocalipsis Introducción
Introducción
Jaꞌ jun libro tiꞌ jix tzꞌibꞌelecan yet abꞌil 94-96 d.C. Jaꞌ naj Juan jix tzꞌibꞌencan yet eyecꞌ naj bꞌey jun txꞌotxꞌ chi yij Patmos.
Apocalipsis sbꞌi jun libro tiꞌ, yutol jaꞌ tzet tzꞌibꞌebꞌilcan yu naj apóstol Juan, jaꞌton tzet txꞌoxbꞌil yil naj yet eyoc naj preso bꞌey Patmos, jaꞌton jun txꞌotxꞌ txꞌotxꞌ ey snan jaꞌ mar. Jix tzꞌibꞌelecan jun libro tiꞌ yet lalan yujtele ecꞌ ebꞌ eyoc scꞌul yin Cristo. Jaꞌ tzet naꞌbꞌil yu naj Juan tiꞌ, tol chi cuyle ebꞌ creyente sicꞌlebꞌil, yet watxꞌ tecꞌan chi yute sbꞌa ebꞌ yaon oc scꞌul yin Cristo, yet tecꞌan pax chi yute sbꞌa ebꞌ xol syaꞌilal oj jul yibꞌan ebꞌ. Jaꞌ jun libro tiꞌ chi alontej yu tzet txꞌoxbꞌil yil naj Juan yin jaxca weyiche, yet chi naꞌcha el yu ebꞌ creyente chi awten tzet chi yal jun libro tiꞌ, caxcꞌal mi cꞌam chi naꞌcha el yu masanil ánima.
Asanne jun libro tiꞌ yul Nuevo Testamento tol caw tzꞌajan chi yalaꞌ jantaj wan tzet qꞌueyubꞌtaj oj juloj. Caw ecꞌal wan yechel oj txeclo a bꞌey satcan yetoj sat yul yibꞌankꞌinal tiꞌ. Chi yalon pax yu jun tzet miman yeloc apnoj, jaꞌton tzet oj yun sjul Jesucristo yet scaelal, tzet oj yun sqꞌueyle can el ebꞌ man oj yaoc scꞌul yin Cristo cꞌal yin Dios, yetoj cꞌal pax tzet oj yun smitxꞌle naj diablo yet oj ale can eytoj naj yul jun jolan xabꞌ yin mil abꞌil cꞌal yet oj ale cantoj naj xol kꞌakꞌ yin junelne yetoj ebꞌ oj oc tzajan yintaj naj. Chi yalon pax oj tol oj yakꞌ Yaawil Cristo yetoj iglesia yin mil abꞌil, chi yalon cꞌal pax oj tzet oj yun Dios yakꞌon spaj tet ebꞌ yuninal, jaꞌton ebꞌ chi jijen tzet chi yoche Dios, yetoj cꞌal pax tzet oj yun yintajnele can el ebꞌ ánima ma yaoc scꞌul yin Dios. Chi yalon pax yu tzet oj yun stannel jun yul yibꞌankꞌinal tiꞌ cꞌal satcan yu Dios. Chi yalon can yu jun acꞌ satcan yetoj jun acꞌ yul yibꞌankꞌinal.
Currently Selected:
Apocalipsis Introducción: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.