Lamentesin 5
5
Profet hemi prea long Yawe fo hemi sore long olketa
1Yawe, plis yu tingim disfala trabol
wea hemi kasem mifala.
Lukim tu wea mifala sem tumas.
2Olketa lan wea yu bin givim long mifala,
an olketa haos blong mifala tu,
distaem i stap long han blong olketa strensa.
3Mifala kamap olsem pikinini
wea mami an dadi i lus,
an olketa mami blong mifala i olsem wido.
4Mifala mas baem wata,
an faeawud hemi dia tumas.
5Olketa enemi gohed fo mekful long mifala,
mekem mifala i taet tumas, an no save res.
6Mifala bin putum mifala seleva
andanit long paoa blong Ijip an Asiria,
mekem mifala save garem kaikai fo stap laef.
7Olketa grani blong mifala long bifoa i sin,
bat olketa evriwan i dae finis,
an distaem mifala safa nomoa from sin blong olketa.
8Olketa wakaman nomoa i rul ovarem mifala,
an no eniwan save tekem mifala aot
from paoa blong olketa.
9Mifala mas go long bus, fo lukaotem kaikai,
bat mifala no sef
bikos man fo kil an stil i stap olobaot.
10Mifala hanggre tumas,
mekem mifala garem fiva
wea bodi hemi barava hot fogud olsem aven.
11Olketa enemi i reipem olketa woman long Jerusalem,
an olketa gele tu long evri vilij long Jiuda.
12Olketa hangem olketa lida blong mifala,
an olketa no tinghae long olketa olo.
13Olketa fosim olketa yangman,
fo pusum hevi ston fo krasim wit fo mekem flaoa.
An olketa boe mas karim hevi bandol faeawud.
14Olketa lida i no sidaon moa
long miting ples blong olketa taon,
an olketa yanga i no mekem miusik moa.
15Mifala no save hapi.
Bifoa, mifala save dans fo hapi,
bat distaem mifala gohed fo sore an krae nomoa.
16Olketa samting wea mifala bin praod long hem,
distaem i samting nating nomoa.
!Sore tumas long mifala, bikos mifala sin!
17From panis ya mifala filnogud tumas,
an mifala gohed fo sore an krae
go-go mifala no save lukluk nao.
18Mifala gohed fo sore an krae
bikos maonten long Saeon hemi kamap emti ples
wea olketa wael dog nomoa i stap long hem.
19Bat yu, Yawe,
yu nao yu king fo evritaem olowe.
20?Waswe nao yu oltaem fogetem mifala?
?Waswe nao yu gohed fo les long mifala enitaem?
21O Yawe, plis yu tekem mifala kambaek long yu,
mekem mifala save stap hapi olsem bifoa.
22?Bat wea, yu les long mifala tumas?
?Kros blong yu bae hemi no save finis?
Currently Selected:
Lamentesin 5: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.