Lamentesin 4
4
Jerusalem bihaen long taem wea olketa enemi bin spoelem
(Profet hemi tok)
1Olketa nambawan gol blong yumi,
fastaem hemi saen fogud
bat distaem hemi barava doti.
An olketa tambu ston long haos blong Yawe,
distaem olketa stap olobaot long olketa rod.
2Olketa yang man blong Saeon, olketa
bin gudfala tumas olsem nambawan gol.
Bat distaem olketa pipol i tingdaonem olketa,
olsem pot long graon
wea hemi olsem samting nating nomoa.
3Nomata mami wael dog,
hemi gohed fo susum pikinini blong hem.
Bat olketa pipol blong mi
distaem i kamap olsem bed ya ostrij
wea hemi les fo lukaftarem pikinini blong hem.
4Olketa smolfala pikinini ya
i barava dae fo wata.
Olketa pikinini i askem kaikai,
bat no eniwan nao givim.
5Bifoa, olketa pipol bin kaikaim nambawan kaikai.
Distaem, olketa hanggre an dae nomoa long rod.
Olketa hu i grouap long haos blong olketa risman,
distaem olketa lukaotem kaikai long ravis hip.
6God hemi spoelem wantaem nomoa taon long Sodom,
an no eniwan save helpem hem.
Bat panis wea hemi kasem pipol blong mi
hemi wos moa winim panis blong pipol long Sodom bifoa.#Jenesis 19:24.
7Bifoa, olketa bikman i klin fogud,
olsem snou wea hemi jes foldaon kam.
Olketa strong an helti,
wea no eni sik hemi save kasem olketa.#4:7 Long Hibru langguis, mining blong disfala ves hemi no klia.
8Bat distaem fes blong olketa
i doti olsem asis long faea,
an pipol i no luksave long olketa moa.
Olketa kamap bon nating,
an skin blong olketa hemi barava drae olsem stik.
9Olketa no garem kaikai long gaden,
mekem olketa fo barava dae long hanggre nao.
Hemi moabeta fo olketa dae finis,
olsem olketa hu i dae long faet.
10Bifoa, olketa mami i lukaftarem gudfala
pikinini blong olketa.
Bat bihaen taem God hemi spoelem pipol blong mi,
olketa mami i kilim pikinini ya,
an kukim fo kaikaim.#Diutronomi 28:57; Esikiel 5:10.
11Yawe hemi barava kros tumas,
an kros blong hem hemi olsem bikfala faea,
wea hemi sendem godaon fo bonem Saeon
go-go graon nating nomoa hemi stap.
12Olketa king long wol no save bilivim,
an evri narafala pipol no save bilivim tu,
wea olketa enemi blong Jerusalem
i save fosim go insaet long olketa geit blong hem.
13Bat olketa enemi bin go insaet,
bikos olketa profet an prist blong hem
bin gohed fo mekem ravis sin insaet long taon ya:
Olketa ya bin gohed fo kilim dae olketa stretfala pipol.
14Distaem olketa lida ya i go olobaot
long olketa rod olsem blaen man.
Han blong olketa nao i fulap long blad,
mekem pipol i les fo tasim olketa,
nomata kaleko blong olketa tu.
15Olketa pipol i singaotem olketa olsem,
“!Ei! !Yufala goaot! !Yufala no tasim mifala!
!Yufala no klin long ae blong God!”
An taem olketa ranawe go olobaot,
olketa long narafala kantri i tok olsem,
“!Olketa no save stap moa long ples blong mifala!”
16Yawe tu hemi les long olketa,
an mekem olketa evriwan fo go stap olobaot.
Hemi no tinghae moa long olketa prist
an no onarem moa olketa lida ya.
17Yumi tu lukluk had
fo eniwan kam helpem yumi.
Olsem sekiuriti antap long taoa,
yumi weitem disfala kantri wea hemi fren blong yumi
fo kam, bat hemi no save help nomoa.
18Olketa enemi gohed fo aftarem yumi,
mekem yumi no save wakabaot insaet long taon.
Hemi kamap klia
wea taem blong yumi hemi finis nao.
19Olketa enemi i aftarem yumi kuiktaem moa,
winim igol save flae kamdaon fo kasholem animol.
Olketa ronem yumi antap long olketa maonten,
an haed long drae eria fo kasholem yumi.
20Disfala king wea Yawe bin siusim,
hemi olsem wea hemi holem laef blong yumi.
Yumi tingse hemi save gadem yumi
from olketa narafala kantri,
bat enemi i kasholem hem,
an tekem hem aot from yumi.#Jeremaea 39:1-7; 52:4-11.
21Olketa pipol blong Idom an Us,
yufala gohed fo hapi distaem.
Bat bae trabol hemi kasem yufala,
wea yufala wakabaot olsem yufala drang,
an filsem bikos yufala stap neket.
22Olketa pipol blong Jerusalem,
panis blong yumi bae hemi save finis nao.
Bae Yawe hemi no letem yumi
fo stap fo longtaem long farawe kantri.
Bat yufala pipol blong Idom,
bae Yawe hemi panisim yufala
from olketa sin blong yufala,
an somaot olketa rong blong yufala.
Currently Selected:
Lamentesin 4: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.