Hosia 3
3
Profet Hosia hemi baem baek waef blong hem
1 (Profet) Yawe hemi tok moa olsem long mi, “Yu go somaot moa lav blong yu fo waef blong yu. Nomata hemi gohed fo durong wetem olketa narafala man, bat yu mas somaot dat yu lavem hem tumas. Yu mas lavem hem barava olsem wea mi lavem olketa pipol blong Israel. Nomata olketa pipol ya i gohed fo falom olketa narafala god, an tekem olketa grep wea hemi drae#3:1 Long wei blong olketa hiden pipol bifoa, olketa givim olketa grep wea hemi drae go long olketa laea god, bikos olketa bilivim wea sapos olketa duim olsem, bae olketa garem plande pikinini, an gaden blong olketa bae hemi garem plande kaikai. an givim go long olketa olsem tambu ofaring blong olketa, bat mi gohed fo barava lavem olketa nomoa.”
2So, mi baem hem baek fo fiftinfala pis silva wetem 140 kilo long bali.#3:2 “bali” Bali hemi wankaen kaikai wea hemi luk olsem raes, bat olketa mekem wankaen flaoa long hem fo mekem bred. 3Mi tok olsem long hem, “Yu mas stap kuaet fo longtaem olsem waef blong mi. An yu mas lusim disfala ravis wei blong yu fo olobaot wetem olketa narafala man olsem juri. Long datfala taem, yu mas no slip wetem eni man, an bae mi tu no slip wetem yu.” 4Long sem wei tu, bae olketa pipol blong Israel mas stap fo lelebet longtaem, wea olketa no garem king, o bikman. An bae olketa no mekem sakrifaes moa long olketa narafala god, an no stanemap moa olketa pos fo wosipim. An bae olketa no yusim moa olketa kaving, o olketa narafala samting moa fo faendemaot abaotem enisamting wea bae hemi no kamap yet. 5An bihaen, olketa pipol blong Israel bae i sensim tingting blong olketa, an kambaek moa long Yawe, hu hemi God blong olketa. An bae olketa kambaek tu long man wea hemi bon kam long laen blong King Deved, hu hemi kamap king fo olketa. An long datfala taem, bae olketa tinghae long Yawe, an bae Yawe hemi blesim olketa long evri gudfala samting wea hem nomoa save givim.
Currently Selected:
Hosia 3: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.