Daniel 12
12
Las de
1Man ya hu hemi werem barava nambawan kaleko, hemi tok olsem, “Long datfala taem, disfala nambawan enjel, Maekol hu hemi lukaftarem olketa pipol blong yu, bae hemi kamap. An wanfala taem blong trabol bae hemi kamap, wea hemi barava nogud tumas winim eni narafala taem bifoa, taem olketa pipol i stat fo stap long ples ya. Long taem ya nao, bae God hemi sevem evri pipol blong yu wea nem blong olketa hemi stap insaet long buk blong hem.#Eksodas 32:32; Sams 69:28; Matiu 24:21; Revelesin 3:5; 20:15. 2An plande long olketa pipol hu i dae finis, bae i laefbaek moa. Samfala long olketa bae i hapi long laef ya wea hemi stap olowe, bat samfala long olketa bae i sem fogud an safa fo evritaem olowe nao.#Aesaea 26:19; Matiu 25:46; Jon 5:29. 3An olketa waes pipol hu i tisim olketa narafala pipol fo falom stretfala wei blong God, bae i saen fogud fo evritaem olowe olsem olketa sta long skae.”
4Nao hemi tok olsem long mi, “Daniel, yu satem buk ya an putum wanfala mak long hem fo hemi staphaed go-go kasem las de ya.#Revelesin 22:10. An long taem ya tu, bae plande pipol i gohed fo go olobaot fo trae an save long olketa samting wea hemi gohed fo kamap.”
5Mi luk go nao mi lukim dat tufala man moa, wanfala hemi stanap long disfala saet long riva, an narafala hemi stanap long narasaet. 6Wanfala long tufala ya hu hemi stanap long saet blong riva ya, hemi askem man ya hu hemi werem barava nambawan waet kaleko an hemi stap lelebet goap moa falom riva. Hemi tok olsem, “?Hao long nao olketa samting ya fo sapraes long hem bae hemi gohed, bifoa hemi finis?”
7Oraet, man ya hu hemi stap lelebet goap moa long riva hemi liftimap tufala han blong hem goap long heven, an hemi mekem wanfala strongfala promis long nem blong God hu hemi stap olowe. Mi herem hem tok olsem, “Bae olketa samting ya hemi gohed nomoa olsem fo tri an haf yia. Taem olketa pipol blong God i no garem moa paoa fo faet, bae taem ya blong trabol hemi jes finis.”#Revelesin 10:5-6; 12:14.
8Mi herem samting ya wea hemi talem, bat mi nating save long mining blong hem. So mi askem hem olsem, “?Bikman, wanem nao bae hemi hapen long datfala taem?”
9Hemi ansa olsem, “Daniel, yu no wari long olketa samting ya. Bikos olketa toktok ya mas staphaed go-go kasem las de. 10Bae God hemi mekem plande pipol fo kamap stret an klin long ae blong hem. Bat pipol hu i nogud, bae i no save long olketa samting ya. Bae olketa gohed nomoa fo duim olketa ravis samting. Olketa waes pipol nomoa bae i luksave long olketa samting ya.#Revelesin 22:11.
11“Stat long taem wea olketa enemi i stopem olketa sakrifaes wea olketa pipol blong God i ofarem evri de, an olketa putumap wanfala barava ravis samting, bae hemi kasem 1,290 de bifoa en ya hemi kam.#Daniel 9:27; 11:31; Revelesin 11:2-3. 12Olketa wea tingting blong olketa hemi stap strong long God go-go kasem en blong 1,335 de ya, bae God hemi blesim olketa.
13“Daniel, tingting blong yu mas stap strong long God go-go kasem en long laef blong yu. Long datfala taem nao bae yu dae, bat bae yu laefbaek moa fo tekem olketa gud samting blong yu long las de.”
Currently Selected:
Daniel 12: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.