Tobit 3
3
Prea blong Tobit
1Mi barava filnogud an mi sem tumas long toktok blong Ana. So mi stat fo sore an krae, an mi prea olsem, 2?O Lod, yu nao yu stret. Evrisamting yu duim hemi stret. Evri wei blong yu hemi gud an tru. An yu nao jajem pipol long disfala wol. 3Mi askem yu fo kaen long mi. Plis no panisim mi fo olketa sin blong mi, an olketa sin wea mi no luksave nomoa. Plis, no panisim mi fo sin blong olketa olo grani blong mi bifoa. 4Bikos mifala bin sin agensim yu, an mifala no obeim strongfala toktok blong yu, hem nao yu letem olketa enemi fo stilim evrisamting blong mifala, an tekem mifala go long deferen kantri, an kilim dae samfala long mifala. An yu letem evri pipol blong narafala kantri fo storim mifala an laf nogud long mifala an tokspoelem mifala. 5Oltaem yu jajem olketa olo grani blong mi bifoa fo evri sin blong olketa. An yu panisim mi tu fo olketa sin blong mi. So long wei wea oltaem yu panisim mifala hemi stret nomoa. 6Distaem, yu duim enisamting nomoa yu wande duim long mi. Aotem laef blong mi, mekem mi finis go from disfala wol, an letem bodi blong mi gobaek moa long graon. Hemi gud tumas sapos mi dae. Mi safa tumas long olketa toktok wea olketa pipol i spoelem mi long hem. Lod, yu tokstrong kam mekem evri trabol blong mi hemi finis, an tekem mi go long ples wea bae mi res fo evritaem olowe. Lod, herem kam prea blong mi. Hemi moabeta fo mi dae mekem mi no safa tumas long olketa toktok ya wea olketa pipol i tokspoelem mi long hem.?
Hadtaem blong Sera
7Wanfala woman, nem blong hem Sera, hemi stap long biktaon Ekbatana long Media. Hemi dota blong Raguel. Long sem de wea Tobit hemi prea, wanfala haosgele blong Raguel hemi tokspoelem Sera. 8Sera hemi marit sevenfala taem, bat bifoa hemi save slip tugeta wetem eniwan long olketa hasban blong hem, disfala ravis devol Asmodeus, hemi kilim olketa dae. Haosgele ya hemi tok olsem long Sera, ?!Lukim go ya! Yu marit sevenfala taem finis, bat yu kilim dae evri hasban blong yu taem yu no slip tugeta wetem eniwan long olketa yet. An no eniwan save givim eni pikinini boe long yu. 9?Waswe nao yu kros olowe long mifala olsem? Yu kros nomoa bikos olketa hasban blong yu i dae finis. Sapos olsem hemi gud yu go slip wetem olketa. Hemi gud tumas nao yu nating garem eni pikinini.? 10Taem Sera hemi herem diswan, hemi barava sore tumas an krae. Hemi laekem tumas fo hangem hem seleva dae, so hem go nao long wanfala rum wea hemi stap long antap pat long haos. Bat taem hemi tingting gud moa, hemi tok olsem fo hem seleva, ?!Mi mas no duim diswan! Mi seleva nomoa wanfala pikinini blong dadi blong mi. Sapos mi kilim mi seleva dae, bae mi mekem dadi blong mi hu hemi olo tumas nao fo dae long sore. Sapos olsem, bae pipol i tokspoelem dadi blong mi falom wanem mi duim. Mi no duim disfala nogud samting. Bae mi askem God nomoa fo aotem laef blong mi, mekem mi no save herem olketa pipol i tokspoelem mi.?
Prea blong Sera
11Nao Sera hemi go kolsap long windo an hemi apem tufala han blong hem, an prea olsem, ?Yu nao God hu save kaen long pipol. Hemi gud fo mifala mas preisim yu, an tinghae long biknem blong yu. An evrisamting wea yu mekem i mas preisim yu olowe nao. 12Lod plis helpem mi. 13Tok kam fo finisim laef blong mi, mekem mi no herem moa evrisamting wea olketa tokspoelem mi long hem. 14Lod yu save dat mi no slip wetem eni man yet, an mi no sin wetem eni man. 15Mi nating meksem long mi seleva o long dadi blong mi taem mifala stap long disfala deferen kantri. Mi seleva nomoa wanfala pikinini blong dadi blong mi, an mi nao fo tekova long evrisamting blong hem. An mi no garem eni man long laen blong mifala fo mi maritim. Sevenfala taem nao mi marit, bat evri hasban ya i dae finis. ?Wanem nao mi laef fo hem? Mi mas dae nao. Bat sapos yu no wande aotem laef blong mi, plis yu sore kam long mi, an no letem mi herem moa olketa pipol wea i tokspoelem mi.?
God hemi herem prea blong Tobit an Sera
16God hemi stap long heven an hemi herem kam prea blong Tobit an Sera. 17So#Nambas 36:6-9; Tobit 6:10-12. hemi sendem kam enjel Rafael fo helpem tufala. Hemi bae tekemaot disfala waet samting wea hemi satem ae blong Tobit mekem hemi save lukluk moa. An Rafael bae hemi stretem tu marit blong Sera an Tobias san blong Tobit. Bikos Tobias nao hemi man long laen blong Raguel, hemi stret fo Tobias fo maritim disfala woman. God hemi sendem kam tu Rafael fo aotem disfala ravis devol, Asmodeus, from Sera. Long datfala taem, Tobit hemi lusim ples wea hemi sidaon long hem an gobaek moa insaet long haos blong hem. Barava long datfala taem tu long Ekbatana, Sera hemi kamdaon from antap pat long haos blong hem.
Currently Selected:
Tobit 3: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.