Rut 4
4
Boas hemi maritim Rut
1Boas hemi go long bikfala doa long wolston blong taon ya, ples wea olketa man save mekem miting long hem, an hemi sidaon weit. No longtaem nomoa man ya long famili blong Elimelek hu hemi kolsap moa long Elimelek winim hem, olsem wea hemi bin talem finis long Rut, hemi gopas. Nao Boas hemi tok olsem long man ya, “Ei, brata. Yu kam fastaem an sidaon long hia.” So man ya hemi kam an hemi sidaon wetem hem. 2Boas hemi kolem kam tenfala lida long taon ya, an hemi tok olsem long olketa, “Plis, yufala kam an sidaon long hia.” So olketa kam an sidaon, 3an hemi tok olsem long man ya, “Neomi hu hemi kambaek finis from Moab, hemi laek fo salem pisgraon ya blong Elimelek, kasin brata blong yumi. 4So mi laek fo talem yu, sapos yu laekem pisgraon ya, yu mas peim nao long ae blong olketa pipol hu i sidaon long hia, an long ae blong olketa lida blong yumi ya. Bat sapos yu no laekem, yu mas talem long mi mekem mi save, bikos yu seleva nao nambawan man hu hemi garem raet fo peimaot, bat sapos yu no peim, mi nao mektu man hu hemi garem raet fo peimaot.” Man ya hemi tok olsem, “Mi nao bae mi peimaot.”
5Boas hemi tok olsem, “Oraet, sapos yu peimaot graon ya long Neomi, yu mas maritim Rut tu, disfala wido woman ya hu hemi marit bifoa long pikinini blong Elimelek. Long wei ya nao, bae graon ya hemi gohed fo stap long nem blong man ya, an fo garem pikinini fo lukaftarem pisgraon ya.”
6Man ya hemi tok olsem, “Sapos olsem, mi no save peimaot disfala pisgraon ya, bikos sapos mi duim olsem, maet mi lusim olketa samting wea olketa pikinini blong mi bae i onam. So, yu nao mas peimaot graon ya. Mi nomoa nao.”
7Long kastom blong Israel bifoa, taem wanfala man hemi peimaot graon long narafala man, o tufala sensim graon blong tufala, oltaem, man hu hemi salem graon mas tekemaot sandol blong hem, an hemi mas givim long man hu hemi peimaot graon ya, mekem hemi somaot dat man ya hemi barava onam graon ya nao.
8So taem man ya hemi talem Boas fo peimaot graon ya, hemi tekemaot sandol blong hem, an givim go long Boas.#Diutronomi 25:7-10. 9Boas hemi tok olsem long olketa lida blong olketa an long olketa narafala man blong ples ya, “Yufala evriwan i witnes blong mi nao. Tude, mi peimaot evrisamting ya nao long Neomi. Distaem, evrisamting wea fastaem hemi blong Elimelek, an Kilion, an Malon, olketa i blong mi nao. 10An Rut, disfala woman blong Moab, wea Malon hemi dae from, hemi kamap waef blong mi nao, mekem hemi garem pikinini fo karim nem blong man ya an fo tekova long graon blong hem. An olketa long famili blong hem bae i no save fogetem nem blong hem, an yumi evriwan long ples ya i no save fogetem tu.#Diutronomi 25:5-6. Tude, yufala evriwan i lukim nao samting ya wea mi duim.”
11So olketa lida wetem olketa narafala pipol moa long ples ya i tok olsem, “Ya, hemi gud. Mifala nao i witnes blong yu. Letem Yawe hemi mekem woman ya hu hemi kam long haos blong yu, bae hemi olsem Resel an Lea blong bifoa ya, wea tufala bonem plande pikinini fo Jekob, wea yumi bon kam long laen blong hem.#Jenesis 35:23-26. An letem yu kamap wanfala bikman hu hemi garem biknem long disfala taon blong yumi ya Betlehem, an long disfala eria long Efrata. 12Letem olketa pikinini wea Yawe bae hemi givim long yutufala, olketa mekem famili blong yu hemi garem biknem olsem famili ya blong Peres bifoa, wea dadi blong hem nao Jiuda, an mami blong hem nao Tama.”#Jenesis 38:27-30.
Boas an Rut tufala garem pikinini
13So Boas hemi tekem Rut long hom blong hem, an tufala marit nao. Yawe hemi blesim Rut, nao hemi babule, an hemi bonem wanfala pikinini boe. 14Olketa woman long taon ya i tok olsem long Neomi, “!Neomi! !Yumi preisim Yawe! Tude hemi givim wanfala smol grani long yu hu hemi bon long Rut, mekem bae hemi save lukaftarem yu. Letem pikinini ya hemi kamap wanfala bikman blong yumi pipol blong Israel. 15Bae hemi mekem laef blong yu hemi kamap gudfala moa, an taem yu olo, bae hemi lukaftarem yu. An Rut hemi lavem yu tumas. Nomata yu garem sevenfala pikinini boe fo helpem yu, bae olketa no save helpem yu gudfala, olsem wea hemi duim fo yu taem hemi bonem disfala pikinini.” 16So Neomi hemi karim pikinini ya, an hemi gohed fo lukaftarem hem nao.
17Olketa woman long ples blong hem i kolem pikinini ya Obed, an olketa gohed fo tok olsem, “Distaem, Neomi hemi garem wanfala pikinini boe nao.” Obed ya, hemi dadi blong Jese, an Jese hemi dadi blong King Deved.
Laen blong King Deved
18Olketa laen blong Peres hemi olsem. Peres hemi bonem Hesron, 19an Hesron hemi bonem Ram, an Ram hemi bonem Aminadab, 20an Aminadab hemi bonem Nason, an Nason hemi bonem Salmon, 21an Salmon hemi bonem Boas, an Boas hemi bonem Obed, 22an Obed hemi bonem Jese, an Jese hemi bonem King Deved.#1 Kronikols 2:5-10; Matiu 1:3-6; Luk 3:31-33.
Currently Selected:
Rut 4: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.