Rut 3
3
Boas hemi mekem promis fo helpem Rut
1Neomi hemi tok olsem long Rut, “Mi mas faendem wanfala man fo maritim yu, mekem yu save garem ples wea yu save stap gud nomoa. 2Yu save, man ya Boas wea yu gohed fo waka wetem olketa wakamere blong hem, hemi wanfala man long famili blong hasban blong mi ya, hu hemi fitim fo hemi maritim yu. Yu lisin. Long ivining tude, hem wetem olketa wakaman blong hem bae i go long ples fo klinimaot olketa skin blong bali, an tekemaot kaikai blong hem. 3So hemi gud fo yu go suim, an yu rabem bodi blong yu wetem oel wea hemi smel naes tumas. Yu werem gudfala kaleko blong yu, an yu godaon long ples ya wea bae hemi waka long hem. Bat yu mas no letem hem save dat yu stap finis long ples ya. Taem hemi kaikai finis, 4an hemi go fo slip, bae yu mas lukluk gudfala long ples wea hemi leidaon fo slip. Nao yu mas go liftimap blangket long lek blong hem, an leidaon go kolsap long en long lek blong hem fo askem hem fo lukaftarem yu. Bae hemi talem yu wanem bae yu save duim.”
5Rut hemi tok olsem, “Hemi gud. Bae mi duim evrisamting ya wea yu bin talem.”
6So Rut hemi godaon long ples ya wea olketa klinimaot skin blong bali an hemi duim evrisamting wea Neomi bin talem long hem. 7Taem Boas hemi kaikai an hemi dring go-go hemi filgud, hemi go an slip kolsap long hip blong bali ya. Rut hemi wakabaot kuaet go, hemi liftimap blangket long lek blong Boas, nao hemi leidaon kolsap long en long lek blong hem. 8Long midol long naet, man ya hemi seke, an hemi wekap. Hemi sapraes tumas fo lukim dat wanfala woman hemi gohed fo leidaon kolsap long en long lek blong hem. 9Hemi askem hem olsem, “!Ei! ?Yu hu ya?”
Nao woman ya hemi tok olsem, “Mi Rut nomoa ya, wakamere blong yu. Mi laekem yu fo lukaftarem mi, bikos yu wanfala long famili blong hasban blong mi, an hemi fitim fo yu maritim mi. Plis yu tekem mi, bae mi kamap olsem waef blong yu nao.”
10Boas hemi tok olsem, “Letem Yawe hemi blesim yu, bikos wei ya wea yu duim distaem, hemi gudfala moa winim olketa samting wea yu bin du-duim fo mami inlo blong yu. Mi sapraes tumas bikos yu no go lukaotem wanfala yang man hu hemi risman o hemi puaman, mekem yu maritim, bat yu gohed fo tinghae tumas long famili blong mifala. 11Yu no fraet. Evri pipol long ples ya i save finis wea yu wanfala gudfala woman. Bae mi duim evrisamting ya wea yu askem. 12Hemi tru wea mi wanfala man long famili blong hasban blong yu, bat wanfala man hemi stap nomoa hu hemi kolsap moa long hasban blong yu winim mi, an hemi barava fitim fo lukaftarem yu winim mi. 13Hemi gud fo yu stap long hia tunaet, an long moning bae mi trae fo askem hem sapos hemi save tekem yu fo hemi lukaftarem yu. Bat sapos hemi les, mi talem yu tru long nem blong Yawe hu hemi laef, bae mi tekem yu, mekem mi lukaftarem yu. So yu stap long hia go-go kasem moning.”
14So Rut hemi slip long ples ya, kolsap long en long lek blong man ya, go-go kasem moning. Bat taem hemi tudak yet, Boas hemi talem hem fo getap, bikos hemi no laekem eniwan fo save dat woman ya hemi bin kam an stap long ples ya. 15So Boas hemi tok olsem long hem, “Yu tekemaot mektu kaleko blong yu ya, an yu stretem long ples ya, mekem mi kapsaetem samfala bali antap long hem.” Hemi duim olsem, an Boas hemi kapsaetem bali antap long kaleko ya go-go hemi kolsap kasem tuenti kilo. Hemi helpem Rut fo liftimap kaleko ya wea hemi fulap long bali. So Rut hemi karim gobaek long taon nao.
16Taem hemi kasem haos, Neomi hemi askem hem olsem, “?Hao nao evrisamting?”
So Rut hemi tok olsem long hem, “O, man ya hemi kaen tumas long mi, an hemi promis wea bae hemi stretem marit blong mi. 17An hemi givim bali ya long mi, bikos hemi sei wea hemi nogud fo mi kambaek long yu sapos mi no holem kam enisamting fo yu.”
18Neomi hemi tok olsem long hem, “Hemi gud, yumi weit nomoa fo lukim olketa samting wea bae hemi hapen, bikos Boas bae hemi no save sidaon go-go hemi finis fo stretem samting ya tude.”
Currently Selected:
Rut 3: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.