EKLESIASTA 1
1
Vuhava bya hinkwaswo.
1Hi wona marito ya mudyondzisi, n'wana Davhida, hosi ya Israele.
2Vuhava bya swahava, ku vula mudyondzisi, vuhava bya swahava, hinkwaswo i vuhava.
3Vunene hi byihi lebyi munhu a nga na byona entirhweni hinkwawo wa yena lowu a tikarhataka ha wona ehansi ka dyambu xana? 4Rixaka rin'wana ra hundza, kutani ku humelela rin'wana, kambe misava yi tshama hilaha ku nga heriki. 5Dyambu ra tsuvuka, kutani ri ya eku peleni hi ku hatlisa, ri ya endhawini ya rona laha ri nga tsuvuka kona.
6Moya wona, wu hungela edzongeni, kutani wu tlhela wu rhendzelekela tlhelo ra n'walungu, wu hungela hinkwako hi ku rhendzeleka, kutani wu tlhelela kambe eku rhendzelekeni ka wona.
7Milambu hinkwayo yi khulukela elwandle, hambiswiritano lwandle a ri tali; laha milambu yi humaka kona, hilaha yi tlhelelaka kona eku khulukeni ka yona. 8Swilo hinkwaswo swa karhateka ku tlula hilaha munhu a nga vulaka hakona: tihlo a ri kolwi hi ku vona, kumbe ndleve a yi tali hi ku yingisa. 9Lexi ngi xi ri kona, hi lexi nga ta va kona; lexi nga endliwa, hi lexi nga ta endliwa; a ku na lexintshwa ehansi ka dyambu.
10Xana xilo xi kona lexi nga vuriwaka leswaku: “Languta lexi, i xintshwa”? A xi ri kona ni khale, emahlweni ka hina. 11Lexi ngi xi ri kona khale, a xi tsundzukiwi, hambi xi ri lexi nga ta ta endzhaku; lava nga ta ta endzhaku, va nga ka va nga xi tsundzuki.
12Mina, mudyondzisi, a ndzi ri hosi ya Israele eYerusalema. 13Ndzi nyiketile mbilu ya mina ku lava ni ku lavisisa hi vutlhari swilo hinkwaswo leswi endliwaka ehansi ka tilo; i ntirho lowu vavisaka lowu Xikwembu xi wu nyikeke vana va vanhu leswaku va karhateka ha wona.
14Ndzi vonile mitirho hinkwayo leyi endliwaka ehansi ka dyambu, kutani, vonani, hinkwaswo i vuhava, ni ku karhateka ka moya. 15Lexi hombolokeke xi nga ka xi nga ololoki; ni lexi pfumalekaka xi nga ka xi nga hlayiwi.
16Ndzi va ndzi ku embilwini ya mina: “Languta, ndzi kulele eku tlhariheni, ndzi yile emahlweni ku tlula munhu wihi na wihi loyi ngi a ri kona emahlweni ka mina eYerusalema, kutani mbilu yanga yi kumile vutlhari ni ku tiva lokukulu.” 17Kambe, kuteloko ndzi nyiketile mbilu ya mina ku tiva vutlhari, ni ku tiva vuphukuphuku ni vuhunguki, ndzi vonile leswaku na swona i ku landza mheho. 18Hikuva laha ku nga ni vutlhari lebyo tala, nhlomulo lowukulu wu kona, kutani la tiengetelaka ku tiva, u tiengetela, na kona, ku vaviseka.
Currently Selected:
EKLESIASTA 1: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.