SWIVURISO 31
31
1Marito ya hosi Lemuwele. Ku khongotela loku mana wa yena a n'wi dyondziseke kona:
2“Swi lo yini, n'wananga?
Swi lo yini, n'wana wa khwiri ra mina?
Oho! Ndzi to yini, n'wana wa khwiri ra mina?
3U nga nyiki vavasati matimba ya wena,
U nga landzeleli lava lovisaka tihosi.
4A hi tihosi, wena Lemuwele,
A hi tihosi leti lulameleke ku nwa vhinyo,
Hambi ti ri tihosana,
eku navela byalwa lebyi pyopyisaka;
5Loko va nwile va nga ta rivala milawu,
Va hoxela timhaka ta hinkwavo lava nga ekhombyeni.
6Nyikani byalwa eka munhu loyi a faka,
Ni vhinyo eka munhu wa mbilu ya nhlomulo,
7Leswaku a nwa, a rivala vusiwana bya yena,
A nga ta tshama a anakanya makhombo ya yena.
8Nomu wa wena wu ahlamisela timbheveve,
U yimela timhaka ta hinkwavo lava tshikiweke.
9Ahlamisa nomu, u avanyisa hi ku lulama,
U yingisa timhaka ta lowa khombo ni xisiwana.”
10Wansati wa matimba, i mani la nga ta n'wi kuma?
U tlula kule nxavo wa risima wa tidayimani.
11Mbilu ya nuna wa yena ya n'wi tshemba,
A nga ka a nga pfumari ndzalo.
12A n'wi endla swinene, swi nga ri swo biha,
Hi masiku hinkwawo ya ku hanya ka yena.
13A lava voya bya tinyimpfu ni ntsembyana,
A tirha hi mavoko ya ku tsaka.
14U fana ni byatso bya muxavi,
U lava swakudya swa yena ekule.
15U pfuka bya ha ri vusiku,
U avela va yindlu ya yena swakudya,
Ni malandza ya yena mitirho.
16U anakanya nsimu, a ya xava;
Hi leswi a swi kumeke, u byala nsimu ya vhinya.
17U tiboha xifungha hi matimba,
U tiyisa mavoko ya yena.
18U tsakela ku bindzula ka yena;
Nivusiku, rivoningo ra yena a ri timeki.
19Mavoko ya yena ma tamela nhonga ya ku luka,
Ni tintiho ta yena nhonga ya ku swula.
20U pfulela vapfumari voko ra yena;
U ri tshambulutela loyi a pfumalaka.
21A nga chavi gamboko hikwalaho ka va yindlu ya yena.
Hikuva va yindlu ya yena hinkwavo va funengele tinguvu ta crimson.
22U tilukela masangu yo saseka,
Swiambalo swa yena i ntsembyana ni xivunguvungu.
23Nuna wa yena u tiviwa ehubyeni ya muti,
Loko a tshamile exikarhi ka vavanuna lavakulu va tiko.
24Nsati u endla tinguvu, a xavisa,
Ni mavamba, a xavisa eka vaxavi.
25Matimba ni xichavo, i xifunengelo xa yena;
U hleka siku ra mundzuku.
26U ahlamisa nomu wa yena hi vutlhari,
Milawu ya vunene yi le ririmini ra yena.
27U risa yindlu ya yena,
A nga dyi vuswa bya vulolo.
28Vana va yena va pfuka va n'wi vula mukateki;
Nuna wa yena wa n'wi dzunisa:
29A ku: “Vana lavo tala va xisati a ti ri tinhenha,
Kambe wena u va tlula hinkwavo.”
30Ku saseka ka kanganyisa, vumbhurhi i vusinge!
Wansati la chavaka Yehovha hi yena la nga ta dzunisiwa.
31N'wi nyikeni mihandzu ya mavoko ya yena,
Mitirho ya yena yi n'wi dzunisa etihubyeni ta muti.
Currently Selected:
SWIVURISO 31: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.