EKLESIASTA 2
2
Ku tsaka ka misava ni rifuwo a swi humeseli munhu ku tsaka ka xiviri.
1Ndzi va ndzi ku embilwini ya mina: Tana, ndzi ku korwisa hi ku tsaka, u ta nantswa ku tsaka; kambe vonani, na swona i vuhava.
2A ndzi ku: “Ku hleka i ku hunguka, ni ku tsaka, ku pfuna yini xana?”
3Kutani ndzi anakanya embilwini ya mina ku nyiketa nyama ya mina evhinyeni, mbilu ya mina yi ri karhi yi ri ni ku tlhariha; yi namarhela vuphukuphuku, ndzi ko ndzi vona leswi lulamelaka vana va vanhu ku swi endla ehansi ka matilo, emasikwini ya ku hanya ka vona.
4Kutani ndzi endle mitirho leyikulu, ndzi tiakela tindlu; ndzi tirimela masimu ya vhinya; 5ndzi tiendlela masimu ni mitanga ya mirhi, ndzi byala kona mirhi leyi vekaka mihandzu ya tinxakaxaka. 6Ndzi tiendlela mativa ya mati ku cheleta xihlahla xa mirhi leyi milaka. 7Ndzi xava malandza ya vavanuna ni ya vavasati ehandle ka lava velekiweke endlwini ya mina; kambe ndzi fuwa mitlhambi leyikulu ya tihomu ni tinyimpfu, ku tlula hinkwavo lava ngi va ri kona eYerusalema, emahlweni ka mina. 8Ndzi tihlengeletela silivhere ni nsuku, ni xuma xa tihosi ni xa matiko; ndzi tilavela swiyimbeleri swa vavanuna ni swa vavasati, ndzi titsakela hi mukhuva wa vana va vanhu, va nga vasati lavo tala.
9Ndzi va munhu lonkulu, la fuweke ku tlula mani na mani la ngi a ri kona eYerusalema eku sunguleni, kambe, na byona vutlhari bya mina byi yima na mina. 10Hinkwaswo leswi ngi swi naveriwa hi mahlo ya mina, a ndzi ma tsonanga swona; a ndzi alelanga mbilu ya mina ku tsaka kwihi na kwihi mbilu ya mina yi tsakela ntirho hinkwawo wa mina, kutani hi swona leswi ndzi nga swi fuwa entirhweni hinkwawo wa mina. 11Kambe kuteloko ndzi langutisisa mitirho hinkwayo leyi mavoko ya mina ma yi endleke, ndzi hlaya ku karhateka loku ndzi tikarhateke hakona loko ndzi yi tirha, kutani ndzi vona leswaku hinkwaswo i vuhava ni ku landza mheho, a ri kona bindzu ehansi ka dyambu.
12Kutani ndzi fularhela sweswo ku lava vutlhari, ni vuhunguki, ni vuphukuphuku; hikuva munhu la landzelaka hosi a nga endla yini, loko swi nga ri leswi va swi endleke? 13Kutani ndzi vonile leswaku vutlhari byi sasekile ku tlula vuphukuphuku, kukotisa loko ku vonakala ku sasekile ku tlula munyama.
14Mahlo ya munhu lowo tlhariha ma le nhlokweni ya yena, kasi xihunguki xi famba emunyameni hambiswiritano ndzi tsundzukile leswaku va humeleriwa havambirhi hi khombo leri fananaka.
15Kutani ndzi va ndzi ku embilwini ya mina: “Khombo leri humeleleke xihunguki, na mina, ri ta ndzi humelela; loko swi ri tano, swi ndzi pfuna yini ku n'wi tlula hi ku tlhariha-ke?” Ndzi va ndzi ku embilwini ya mina: “Leswi, na swona, i vuhava.” 16Swi tano, lowo tlhariha ni xihunguki, havambirhi va nga ka va nga tsundzukiwi hilaha ku nga heriki, hikuva emikarhini leyi nga ta ta, hinkwaswo swi ta rivariwa ngopfu; lowo tlhariha wa fa kukotisa xihunguki.
17Kutani ndzi venga vutomi, hi ku karhatiwa hi mitirho hinkwayo leyi endliwaka ehansi ka dyambu; kunene hinkwaswo i vuhava, ni ku landza mheho.
18Ina ndzi va ndzi venga ni mitirho hinkwayo leyi ndzi tikarhataka ha yona ehansi ka dyambu, hikuva hi leyi ndzi faneleke ku yi siyela munhu loyi a nga ta ndzi tlhandlama. 19Kambexana u tiviwa hi mani leswaku u ta va mutlharihi, kumbe xihunguki xana? Kasi hi yena la nga ta va n'wini wa mitirho hinkwayo ya mina, leyi ndzi tikarhataka ha yona, leyi ndzi yi endleke hi vutlhari ehansi ka dyambu. Swoleswo, na swona, i vuhava.
20Kutani ndzi tshika mbilu ya mina yi phirwa hi ntirho hinkwawo lowu ndzi tikarhateke ha wona ehansi ka dyambu. 21Hikuva munhu a nga va kona loyi ntirho wa yena wu endliweke hi vutlhari, ni ku tiva, ni bindzu, kasi u ta wu siyela munhu un'wana la nga ka a nga tikarhatelanga wona. Sweswo na swona, i vuhava, i khombo lerikulu.
22Loko swi ri tano, munhu u kuma yini hi ku karhateka hinkwako ka yena, ni ku chivirika ka mbilu ya yena loku a tikarhataka hakona ehansi ka dyambu? 23Hikuva masiku hinkwawo ya yena, hi lama nga ni mahlomulo, kutani ntirho hinkwawo wa yena hi lowu nga ni tingana; hambi byi ri vusiku, mbilu ya yena a yi kumi ku wisa. Leswi, na swona, i vuhava.
24A ku na lexo saseka eka munhu lexi tlulaka ku dya ni ku nwa, ni ku lavela moya wa yena ku titsakela hi ku tirha ka yena. Na swona leswi, ndzi swi vonile leswaku swi huma evokweni ra Xikwembu. 25Hikuva la nga ndzi tlulaka hi ku dya ni ku nwa i mani Xana? 26Hikuva Xikwembu xi nyika munhu lonene emahlweni ka xona, vutlhari, ni ku tiva, ni ku tsaka, kasi eka mudyohi xi n'wi nyika ntirho lowo tika, ku hlengeleta ni ku vunganyetela leswaku swi ta nyika la nga lonene emahlweni ka Xikwembu. Sweswo, na swona, i vuhava ni ku vaviseka ka moya.
Currently Selected:
EKLESIASTA 2: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.