SOFONIYA 3
3
Yerusalema u ta biwa. Switshembiso.
1Wu ni khombo muti lowu tiarisaka, wu ni thyaka, muti lowu xanisaka. 2A wu yingiselanga rito, a wu amukeli ku tshinyiwa, a wu tshembanga Yehovha; a wu tshinelanga eka Xikwembu xa wona. 3Tihosi ta wona, i tinghala leti dzumadzumaka exikarhi ka wona; vaavanyisi va wona, i timhisi ta madyambu leti nga hlayiseriki nchumu swa mundzuku. 4Vaprofeta va wona i vatikurisi, vavanuna va mavunwa; vaprista va wona va nyamise xivandla lexi kwetsimaka, va hombolokisa nawu.
5Yehovha u lulamile exikarhi ka wona a nga ka a nga endli swo biha, hi siku rin'wana ni rin'wana u humesa ku avanyisa ka yena eku vonakaleni, a nga tshiki ku endlisa sweswo; kambe lowo biha a nga tivi tingana. 6“Ndzi lovisile matiko, marhangu ya wona ma mbundzukile; ndzi onhile tindlela ta wona a ka ha ri na la fambaka kona, miti ya wona yi onhakile, a ka ha ri na munhu kona, a ka ha ri na la nga akaka kona. 7A ndzi ku: ‘Loko a wu ndzi chava, u va u amukela ku tshinyiwa, ingi vutshamo bya wena byi nga ha susiwi eka wena hilaha ndzi leriseke hinkwaswo hakona ehenhla ka yena,’ kambe va pfukele ku onha swiendlo swa vona hinkwaswo.”
8“Hikwalaho, ndzi languteleni,” ku vula Yehovha, “esikwini lero ndzi nga ta yima ha rona ku phanga, hikuva ndzi kanerile ku hlengeleta matiko ni ku hlanganisa ku fuma, ndzi ta chela ehenhla ka wona vukari bya mina, ni ku pfurha hinkwako ka vukari bya mina; hikuva misava hinkwayo yi ta hisiwa hi ndzilo wa rilondzo ra mina.
9“Hikuva, esikwini lero, ndzi ta hundzula milomu ya matiko, yi va leyi tengeke, ma ta vitana hinkwawo vito ra Yehovha, ma n'wi tirhela hi mbilu yi ri yin'we. 10Vakhongeri va mina va nga va tiko ra mina lava hangalakeke va ta ta, va pfa etikweni leri nge hase ka milambu ya Kuxi, va ndzi tisela tinyiko. 11Esikwini lero, a ku nga ha khomiwi hi tingana hikwalaho ka swiendlo swa wena hinkwaswo leswi u ndzi hundzukeleke ha swona; hikuva kona ndzi ta susa lava titsakelaka eku tikukumuxeni ka vona exikarhi ka wena, kutani a ku nga ha tshami u tikukumuxa entshaveni ya mina leyi hlawulekeke. 12Ndzi ta siya vanhu lava tsongahaleke, lava swisiwana exikarhi ka wena, kutani va ta tshemba vito ra Yehovha. 13Nsalo wa Israele wu nga ka wu nga endli leswo biha, wu nga ka wu nga vulavuri mavunwa ririmi ra ku kanganyisa ri nga ka ri nga kumiwi emilon'wini ya vona va ta dya va etlela ehansi, ku nga ri na loyi a va chavisaka.”
14Yimbelela hi ku tsaka, nhwanyana wa Siyoni! Israele, huwelela, u tsaka! U va u tsakisisa hi mbilu hinkwayo wena nhwanyana wa Yerusalema! 15Yehovha u susile ku avanyisiwa ka wena, u hlule loyi a nga nala eka wena; hosi ya Israele, Yehovha, u le xikarhi ka wena: a ku nga ha tshami u vona makhombo. 16Esikwini lero, va ta ku eka Yerusalema: “Siyoni, u nga chavi mavoko ya wena ma nga nembeleli! 17Yehovha, Xikwembu xa wena, u le xikarhi ka wena; i nhenha leyi ponisaka; u ta ku tsakela hi ku tsaka lokukulu, a va a miyela hikwalaho ka rirhandzu ra yena, u ta ku tsakela hi ku yimbelela.
18“Ndzi ta hlengeleta kun'we lava rilelaka tinhlengeletano letikulu; va huma eka wena; va tikeriwa hi xisolo. 19Vona, enkarhini wolowo, ndzi ta va ni mhaka ni vaxanisi va wena hinkwavo, ndzi hanyisa [nyimpfu] leyi khwitaka, ndzi hlengeleta leyi hlongoriweke, kutani ndzi ta va endla lava twarisiwaka ni lava twaleke ematikweni hinkwawo, laha va nga khomiwa hi tingana. 20Enkarhini wolowo, ndzi ta mi tisa, ndzi mi hlengeleta hi nkarhi wolowo; hikuva ndzi ta mi endla lava twaleke ni lava dzunisiwaka exikarhi ka vanhu hinkwavo va misava, siku ndzi vuyisaka vakhomiwa va n'wina emahlweni ka n'wina,” ku vula Yehovha.
Currently Selected:
SOFONIYA 3: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.