SOFONIYA 2
2
Ku tshinyiwa matiko.
1Tiyingiseleni, tiyingiseleni, n'wina vanhu va tiko leri nga riki na tingana, makungu ya Yehovha ma nga si tswala, 2ku nga si ta siku lero kukotisa mungu lowu hahisiwaka vukari bya ku pfurha ka Yehovha byi nga si ta eka n'wina hi siku ra vukari bya Yehovha. 3Lavani Yehovha, n'wina, vatitsongahati hinkwavo va tiko, lava endlaka hi ku lerisa ka yena, lavani ku lulama, mi lava ku titsongahata; kumbe mi ta tifihla esikwini ra vukari bya Yehovha.
4Hikuva Gaza u ta sukeriwa, Axikeloni a hundzuka mananga; Axidodo, va ta n'wi hlongola ninhlekanhi lowukulu; Ekroni a tsuvuriwa. 5Va ni khombo lava akeke etikweni leri nga etlhelweni ra lwandle, tiko ra Vakereti! Rito ra Yehovha ri kona ehenhla ka wena, Kanana, tiko ra Vafilista; ndzi ta ku lovisa, u va u pfumala ni la nga ta aka eka wena! 6Tiko leri hambaneke ni lwandle ri ta hundzuka vudyelo, ni vuako bya varisi, ni matshanga ya tinyimpfu. 7Ri ta va tiko ra nsalo wa yindlu ya Yuda; va ta dyisela mitlhambi ya vona kona; nimadyambu, va etlela etindlwini ta Axikeloni; hikuva Yehovha, Xikwembu xa vona, u ta va endzela, a tlherisela vabohiwa va vona.
8“Ndzi twile ku sandza ka Mowabu ni tinhlambha ta vana va Amoni lava sandzeke tiko ra mina, va tikurisa hi le ndzilakaneni wa vona.” 9Hikwalaho, Yehovha wa mavandla, Xikwembu xa Israele, u ri: “Ndza hanya, ndzi ri, Mowabu u ta kotisa Sodoma, vana va Amoni va kotisa Gomora, yi nga ndzhaka ya mitwa, ni migodi ya munyu, ni mananga hilaha ku nga heriki; nsalo wa tiko ra mina wu ta va phanga, ni lava seleke va tiko ra mina va ta va fuma hi mukhuva wa ndzhaka.” 10Leswo swi ta va humelela hikwalaho ka ku tikukumuxa ka vona; hikuva va sandzile, kutani va tikukumuxela ehenhla ka tiko ra Yehovha wa mavandla. 11Yehovha u ta chavisa ehenhla ka vona, hikuva u ta herisa swikwembu hinkwaswo swa misava; va ta ta n'wi khinsamela, un'wana ni un'wana hi ku suka exivandleni xa yena, swi nga swihlale hinkwaswo swa matiko.
12Na n'wina Vakuxi, mi ta va lava dlayiweke hi fumu ra mina! 13Kambe Yehovha u ta tshambulutela voko ra yena hitlhelo ra n'walungu, a dlaya Asiriya, a hundzula Ninivha rhumbi ni ku oma loku kotisaka mananga! 14Mitlhambi yi ta etlela ehansi exikarhi ka wona; tinxaka hinkwato ta swiharhi leto tala, mampfana, ni tinhloni, swi ta etlela exikarhi ka timhandze ta kona; ku twakala nyanyana leyi yimbaka noti efasitereni; enyangweni i tinhulu ta swilo leswi mbundzukeke, hikuva Yehovha u veke mapulangi ya tikedari exikombisweni. 15Hi wona muti lowu tsakisiseke ingi wu tshamisile hi ku rhula, lowu ingi wu ku embilwini ya wona: “Hi mina ntsena, a ku na wumbe!” Wu hundzukise ku yini rhumbi laha ku etlelaka swiharhi kona xana? Un'wana ni un'wana la hundzaka emahlweni ka wona u ta yimba noti, a va a tsekatsekisa voko.
Currently Selected:
SOFONIYA 2: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.