ESAYA 65
65
Ku hlamula ka Yehovha.
1“Ndzi laviwa hi lava ngi va nga ndzi vitani, ndzi pfumela ku kumiwa hi lava ngi va nga ndzi lavi; a ndzi ku: ‘Hi mina loyi, hi mina loyi!’ Eka tiko leri nga riki na vito ra mina. 2Ndzi tshambulutile mavoko ya mina siku hinkwaro eka tiko leri tiarisaka, eka lava fambaka hi ndlela yo homboloka, va ri karhi va landzelela miehleketo ya vona; 3eka tiko leri nga tshikiki ku ndzi pfuka hi ku humesa magandzelo emitangeni, hi ku humesa mirhi leyi nun'hwelaka eswitineni; 4hi ku tshama emasirheni, hi ku peta vusiku emabakweni, hi ku dya nyama ya nguluve, ni swakudya leswi nyameke eswibyeni swa vona; 5va ku: ‘Tlhelela endzhaku, u nga tshineli ekusuhi na mina, hikuva ndzi hlawulekile eka wena!’
“Valavo, i musi etinhompfini ta mina, i ndzilo lowu pfurhaka hi masiku. 6Waswivo leswi swi tsariwile emahlweni ka mina: Ndzi nga ka ndzi nga miyeri, ndzi nga si tlherisela, kunene ndzi nga si tlherisela eka vona, 7swidyoho swa n'wina,” ku vula Yehovha, “swin'we ni swidyoho swa vatata wa n'wina, lava nga humesa mirhi ya risuna etintshaveni, lava ndzi sandzeke eswitsungeni; ndzi ta va pimela hakelo ya ku hanya ka vona ka khale.”
8Yehovha u vula sweswo, a ku: “Loko ku ri ni mati exidzumbeni xa vhinya, va ku: ‘U nga xi herisi, hikuva ka ha sele ku kateka kona!’ Na mina ndzi ta endlisa xisweswo hikwalaho ka rirhandzu ra malandza ya mina, leswaku ndzi nga herisi hinkwaswo. 9Ndzi ta humesa eka Yakobo rixaka, ni ka Yuda mudyandzhaka wa tintshava ta mina, vahlawuriwa va mina va ta ti fuma, ni malandza ya mina ma ta tshama eka tona. 10Rivala ra Xaroni ma ta va madyelo ya tinyimpfu, ni nkova wa Akora ma ta va madyelo ya tihomu, eka tiko ra mina leri ndzi lavaka. 11Kambe n'wina, lava nga tshika Yehovha, lava nga rivala ntshava ya mina leyo kwetsima, lava andlalelaka Gadi tafula, lava chelelaka Meni ndzheko, 12ndzi mi nyiketa tlhari, kutani mi ta khinsama hinkwenu ku tlhaviwa, hikuva ndzi vitanile kasi a mi hlamulanga, ndzi vulavurile, kasi a mi yingisanga; kambe mi endlile leswi biheke emahlweni ka mina, mi titsakele eka leswi ndzi nga swi rhandziki.”
13Hikwalaho Hosi Yehovha u vulavula sweswo, a ku: “Maswivo, malandza ya mina ma ta dya, kambe n'wina mi ta va ni ndlala; maswivo, malandza ya mina ma ta nwa, kambe n'wina mi ta va ni torha; maswivo, malandza ya mina ma ta tsaka, kambe n'wina mi ta va ni tingana; 14maswivo, malandza ya mina ma ta yimbelela hi ku tsaka ka timbilu ta wona, kambe n'wina mi ta kolola eku vavisekeni ka timbilu ta n'wina, mi ta huwelela hi ku hela ka timbilu. 15Vito ra n'wina ri ta sala ri va ndzhukano exikarhi ka vahlawuriwa va mina; kutani Hosi Yehovha u ta ku dlaya kambe u ta thya vahlawuriwa va yena vito rin'wana.
16“Mani na mani la nga ta rhandza ku katekisiwa etikweni, u ta rhandza ku katekisiwa hi Xikwembu xa ntiyiso, kutani un'wana na un'wana la nga ta hlambanya, u ta hlambanya hi Xikwembu xa ntiyiso; hikuva nhlomulo wo sungula wu ta rivariwa, wu ta va wu hundzile emahlweni ka mina.
17“Hikuva, maswivo, ndzi vumba matilo lamantshwa, ni misava leyintshwa: timhaka ta khale a ti nga ha tsundzukiwi, ti nga ka ti nga ha tlheleri emiehleketweni. 18Kambe hikwalaho ka leswi ndzi nga ta swi vumba, tsakani, mi tsakisisa hi masiku, hikuva Yerusalema, ndzi n'wi tumbuluxela ku tsaka, ni tiko ra yena ku tsakisisa. 19Kutani ndzi ta titsakela ha Yerusalema, ndzi ta tsaka hikwalaho ka tiko ra mina; kutani ku nga ka ku nga ha twakali rito ra swirilo, hambi ku ri ku huwelela ka ku chava. 20Kona a ku nga ha vi na swihlangi leswi velekiweleke masiku ma nga ri mangani, hambi swikoxa leswi nga hetisiki ntsengo wa masiku ya swona; hikuva u ta fa a ri lontshwa, loyi a nga ta fa a ri ni dzana ra malembe, kambe ndzhukano wu ta wela xidyohi, loko xi ta va ni dzana ra malembe.
21“Va ta aka tindlu, va ta tshama eka tona; va ta byala tivhinya, va dya mihandzu ya tona. 22Va nga ka va nga ha aki tindlu, leswaku un'wana a ta tshama kona, va nga ka va nga ha byari leswaku un'wana a ta dya, hikuva masiku ya tiko ra mina ma ta ringana ni masiku ya mirhi, kutani vahlawuriwa va mina va ta tsakela ntirho wa mavoko ya vona, 23va nga ha tikarhateli swahava, a va nga ha veleki vana ku va vona va hatla va fa; hikuva va ta va rixaka leri katekisiweke hi Yehovha, kutani vana va vona va ta hanya na vona. 24Ku ta humelela leswaku loko va huwelela, ndzi ta hlamula, loko va ha vulavula, ndzi ta va yingisa.
25“Mhisi ni xinyimpfana swi ta dya swin'we, nghala yi ta dya byanyi tanihi homu; nyoka yi ta dya ntshuri; ku nga ka ku nga endliwi leswo biha, ni leswi onhaka, entshaveni hinkwayo ya mina leyo kwetsima,” ku vula Yehovha.
Currently Selected:
ESAYA 65: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.