2 VATESALONIKA 1
1
Vatesalonika va hlayisa ku pfumela ni rirhandzu eku xanisekeni.
1Pawulo, na Silvano, na Timotiya, eka Kereke ya Vatesalonika leyi nga eka Xikwembu Tatana, ni le ka Hosi Yesu Kriste;
2Tintswalo ni ku rhula a swi ve na n'wina, swi huma eka Xikwembu Tata wa hina, ni le ka Hosi Yesu Kriste.
3Hi fanele ku khensa Xikwembu hi masiku hikwalaho ka n'wina vamakwerhu, hilaha swi lulameke hakona, hikuva ku pfumela ka n'wina ku karhi ku kula ngopfu, ni ku rhandzana ka n'wina ku engeteleka; 4hi kona hi tidzunisaka ha n'wina etikerekeni ta Xikwembu hikwalaho ka ku tiyisela ka n'wina, ni ku pfumela ka n'wina eku xanisekeni hinkwako, ni le maxangwini lawa mi ma yingiselaka, 5hi kona ku kombisa ka ku avanyisa loku lulameke ka Xikwembu, ku va leswaku mi endliwa lava lulameleke ku fuma ka Xikwembu, xolexo mi twisiwaka ku vaviseka hikwalaho ka xona.
Xikwembu xi ta avanyisa valala va xona.
6Hikuva swi lulamile loko Xikwembu xi tlherisela lava mi xanisaka ku xaniseka, kasi n'wina mi xanisiwaka mi ta nyikiwa ku wisa na hina, 7siku Hosi Yesu a vonakalaka, a huma etilweni ni tintsumi ta yena leta matimba, 8hi ndzilo lowu pfurhaka, ku rihisa lava nga tiviki Xikwembu, ni lava nga yingisiki Evhangeli ya Yesu Kriste, Hosi ya hina. 9Valavo va ta biwa hi ku onhaka loku nga heriki, hi ku humelela eka Hosi, ni matimba layo kwetsima ya yona; 10loko a ta ta ku ta dzunisiwa enkarhini wolowo hi vakwetsimi va yena, ni ku tlangeriwa hi hinkwavo lava pfumeleke; hikuva vumbhoni bya hina exikarhi ka n'wina byi amukeriwile.
11Hikwalaho ha mi khongelela hi mikarhi, leswaku Xikwembu xa hina xi mi veka lava lulamelaka rivitano ra xona, xi hetisa makungu ya xona lamanene, ni mitirho hinkwayo ya ku pfumela; 12leswaku vito ra Hosi ya hina, Yesu Kriste, ri dzunisiwa eka n'wina, na n'wina mi dzunisiwa eka yena, hi tintswalo ta Xikwembu xa hina ni ta Hosi Yesu Kriste.
Currently Selected:
2 VATESALONIKA 1: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.