2 VATESALONIKA 2
2
Ta ku vuya ka Hosi.
1Loko ti ri ta ku vuya ka Yesu Kriste, Hosi ya hina, ni ta ku hlengeletana ka hina na yena, 2ha mi khongelela, vamakwerhu, leswaku mi nga hatlisi mi tsekatsekisiwa etimbilwini ta n'wina, ni ku tshuka hambi hi moya, hambi hi marito man'wana, hambi hi epistola yin'wana leyi nga vuriwaka leswaku yi huma eka hina swange hi loko siku ra Kriste ri ri ekusuhi; 3mi nga tshuki mi xisiwa niswitsongo hi munhu, hikuva swi fanele leswaku ku tlhelela endzhaku ku va kona eku sunguleni, ni ku humelela ka munhu wa xidyoho, n'wana wa ku lahleka, 4la kanetaka ni la titlakuselaka ehenhla ka hinkwaswo leswi vuriwaka Xikwembu ni leswi khinsameriwaka, a ko a tshamisa kukota Xikwembu etempeleni ya Xikwembu, a ri karhi a tivula Xikwembu.
5Xana a mi tsundzuki leswaku, loko ndza ha ri na n'wina, ndzi tshama ndzi mi byela timhaka teto xana? 6Kutani sweswi, ma tiva ni leswi n'wi sivelaka a kondza a humelela hi nkarhi wa yena. 7Hikuva xihundla xa ku homboloka xa karhi xa tirha, ntsena la n'wi sivelaka sweswi, u fanele ku susiwa. 8Kutani enkarhini wolowo, ku ta humelela nala loyi Hosi yi nga ta n'wi heta hi moya wa nomu wa yona, kambe yi ta n'wi lovisa hi ku vonakala ka ku humelela ka yona. 9Yeloyi u ta humelela hi matimba ya Satana, hi swihlamariso swa tinxakaxaka, ni swikombiso, ni masingita yo hemba, 10ni ku kanganyisa hinkwako ka ku homboloka ka lava lovaka, hikuva a va amukelangi ni ku rhandza ntiyiso leswaku va hanyisiwa. 11Hikwalaho Xikwembu xi ta va rhumela matimba lama hambukisaka, leswaku va ta pfumela mavunwa, 12leswaku ku ta avanyisiwa hinkwavo lava nga ka va nga pfumelanga ntiyiso kambe va tsakela ku homboloka.
Ku khensa ni ku khongela ka muapostola.
13Kambe loko hi ri hina, hi fanele ku khensa Xikwembu hi masiku hikwalaho ka n'wina, vamakwerhu varhandziwa va Hosi, hikuva Xikwembu xi mi hlawurile ka ha ri eku sunguleni, leswaku mi ta hlayiseka hi ku basisiwa hi Moya, ni ku pfumela ka ntiyiso; 14xi mi vitanele swona hi Evhangeli ya hina leswaku mi fuwa ku vonakala ka Hosi ya hina Yesu Kriste.
15Hikwalaho, vamakwerhu, yimani, mi tiya, mi hlayisa timhaka leti mi ti dyondzisiweke, hambi ku ri hi milomu, hambi ku ri hi epistola ya hina. 16Kutani Hosi ya hina Yesu Kriste yena hi xiviri, ni Xikwembu, Tata wa hina, la hi rhandzeke, la hi nyikeke hi tintswalo ta yena ku chavelela loku nga heriki, ni ku tshemba lokunene, 17a a ve yena la chavelelaka timbilu ta n'wina, a va a mi tiyisa emitirhweni hinkwayo leyo saseka, ni le dyondzweni hinkwayo leyo lulama.
Currently Selected:
2 VATESALONIKA 2: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.