1 VATESALONIKA 5
5
Nkarhi wa ku vuya ka Hosi; ku hiteka.
1Loko ti ri ta masiku ni mikarhi, a swi hi fanelanga, vamakwerhu, ku mi tsalela. 2Hikuva ma swi tiva swinene, na n'wina, leswaku siku ra Hosi ri ta humelela ri kotisa khamba ra vusiku. 3Hikuva siku va nga ta ku: “Ku rhurile, ku tsakiwile!” Hilaha ku onhaka loku nga languteriwangiki ku nga ta va wela ehenhla, kukota mbeleko loko yi humelela la tikeke, va nga ka va nga poni. 4Kambe loko mi ri n'wina vamakwerhu, a mi le munyameni, siku rero ri nga mi weli hi xitshuketo kukotisa khamba. 5Hinkwenu mi vana va ku vonakala, mi vana va nhlekanhi; a mi va vusiku, hambi va munyama. 6Hikwalaho-ke, hi nga tshuki hi etlela kukota van'wana, kambe a hi hitekeni, hi ri karhi hi tikhoma. 7Hikuva lava etlelaka, va etlela nivusiku ni lava pyopyaka, va pyopya nivusiku. 8Kambe hina hi nga va nhlekanhi, a hi tihlayiseni, kutani hi ambala xisirhelelo xa xifuva, ku nga ku pfumela ni rirhandzu, hi havaxela ni xihuku xa ku tshemba ku hlayiseka. 9Hikuva Xikwembu a xi hi vekelanga ku kariha, kambe ku ri ku hi fuwisa ku hlayiseka hi Hosi ya hina, Yesu Kriste, 10la hi feleke leswaku, hambi hi hanyanya, hambi hi etlele, hi hanya swin'we na yena. 11Hikwalaho khongotelanani, mi akisana, kukotisa leswi mi swi endlaka.
Mikhongotelo ni marungulo.
12Ha mi khongela, vamakwerhu, leswaku mi va ni xichavo eka lava nga ni ntirho exikarhi ka n'wina, lava mi risaka eHosini, lava mi tiyisaka; 13mi va ni xichavo eka vona ngopfungopfu hi rirhandzu, hikwalaho ka ntirho wa vona. Akisanani swin'we hi ku rhula.
14Kambe, vamakwerhu, ha mi khongotela, hi ri: Layani lava nga fambiki hi nawu, mi chavelela lava karheleke timbilu, mi tiyisa lava tsaneke, mi va lehisela mbilu hinkwavo. 15Mi vona leswaku ku nga tshuki ku va na loyi a rihisaka swo biha hi leswo biha; kambe lavani hi masiku leswo saseka eka un'wana ni un'wana exikarhi ka n'wina, ni ka hinkwavo.
16Tsakani hi masiku.
17Mi nga rhuteli ku khongela.
18Etimhakeni hinkwato, mi khensa; hikuva hi swona leswi Xikwembu xi swi rhandzaka, ha Yesu Kriste.
19Mi nga timi Moya.
20Mi nga sandzi vuprofeta.
21Ringani hinkwaswo, mi tiyisela eka leswo saseka.
22Chavani hinkwaswo leswi fanaka ni leswo biha.
23Xikwembu xa ku rhula a xi mi basise swinene, xi mi endla lava hetisekeke hinkwenu, leswaku hinkwaswo leswi nga eka n'wina, moya, ni mbilu, ni miri, swi hlayiseriwa ku vuya ka Hosi ya hina, Yesu Kriste, swi basile. 24La mi vitaneke wa tshembeka, u ta swi endla.
25Vamakwerhu, hi khongeleleni.
26Rungulani vamakwavo hinkwavo hi ku ntswontswa loku tengeke.
27Ndza mi khongela hi Hosi leswaku epistola leyi, yi hlayeriwa vamakwerhu hinkwavo.
28Tintswalo ta Hosi ya hina, Yesu Kriste, a ti ve na n'wina.
Currently Selected:
1 VATESALONIKA 5: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.