2 TIKRONIKA 36
36
Ta Yowahazi, ni ta Yoyakimi, ni ta Yoyakini, tihosi ta Yuda.
1Kutani tiko ri teka Yowahazi n'wana Yosiya, ri n'wi veka hosi ematshan'weni ya tata wa yena eYerusalema. 2Yowahazi a a ri wa malembe ya 23 loko a sungula ku fuma, kutani a fuma tin'hweti tinharhu Yerusalema. 3Hosi ya Egipta yi n'wi tekela vuhosi bya yena eYerusalema, yi lerisa tiko ndzuvo wa titalenta ta dzana ta silivhere ni talenta ya nsuku. 4Kutani hosi ya Egipta yi veka Eliyakimi, makwavo hosi ya Yuda na Yerusalema; yi hundzula vito ra yena, yi n'wi thya Yoyakimi. Kutani Neko a teka Yowahazi, makwavo, a n'wi yisa eEgipta.
5Yoyakimi a a ri wa malembe ya 23 loko a sungula ku fuma, kutani a fuma malembe ya 11 eYerusalema, a endla leswo biha emahlweni ka Yehovha, Xikwembu xa yena. 6Nebukadnetsara, hosi ya Babilona, a tlhandluka ku n'wi pfuka, kutani a n'wi boha hi tiketana ta koporo ku n'wi yisa eBabilona. 7Nebukadnetsara a yisa Babilona swibya swin'wana swa yindlu ya Yehovha, a swi veka endlwini ya yena ya vuhosi eBabilona.
8Leswi seleke swa timhaka ta Yoyakimi, manyala lawa a ma endleke, ni leswi kumiweke ka yena, maswivo swi tsariwile ebukwini ya tihosi ta Israele ni ta Yuda. Yoyakini, n'wana wa yena, a fuma ematshan'weni ya yena.
9Yoyakini a a ri wa malembe ya 18 loko a sungula ku fuma; kutani a fuma tin'hweti tinharhu na khume ra masiku eYerusalema, a endla leswo biha emahlweni ka Yehovha. 10Eku heleni ka lembe, hosi Nebukadnetsara a rhuma vanhu ku n'wi khoma, va n'wi yisa eBabilona, ni swibya leswo saseka swa yindlu ya Yehovha. A veka Sedekiyasi makwavo, hosi ya Yuda na Yerusalema.
11Sedekiyasi a a ri wa malembe ya 21 loko a sungula ku fuma, kutani a fuma malembe ya 11 eYerusalema. 12A endla leswo biha emahlweni ka Yehovha, Xikwembu xa yena; a nga titsongahatangi emahlweni ka Yeremiya, muprofeta, loyi a n'wi byeleke rito ra Yehovha. 13A va a xandzukela hosi Nebukadnetsara leyi n'wi hlambanyiseke hi vito ra Xikwembu; kutani a nonon'hwisa nhamu ya yena, a nonon'hwisa ni mbilu ya yena, a nga ti tshuka a tlhelela eka Yehovha Xikwembu xa Israele. 14Swi tsandza ni tihosana hinkwato ta vaprista, ni vanhu va tiko, va andzisa ku homboloka ka vona, va landza manyala hinkwawo ya matiko; va va va nyamisa yindlu ya Yehovha leyi a tikwetsimiseleke yona eYerusalema.
15Yehovha, Xikwembu xa vatata wa vona, a va layile emikarhini leyo tala hi tintsumi ta yena, hikuva a a rhandza ku ponisa tiko ra yena ni vuako bya yena. 16Kambe a va rhukana tintsumi ta Xikwembu, va sandza marito ya xona, va hleka vaprofeta va xona, vukari bya Yehovha byi ko byi pfuka tiko ra yena swonghasi leswaku ku nga ha vi na ku ponisiwa.
17A rhuma eka vona hosi ya Vakalediya ku va pfuka, a dlaya hi tlhari majaha ya vona evukwetsimelweni bya vona; a nga tsetselelanga majaha, hambi vanhwanyana hambi vakulukumba, hambi misisi leyo basa; a n'wi nyiketa hinkwaswo. 18Ni swingolongondzwana swa yindlu ya Xikwembu, leswikulu ni leswitsongo, ni xuma xa yindlu ya Yehovha, ni xuma xa hosi ni xa tindhuna ta yena, Nebukadnetsara a yisa hinkwaswo eBabilona. 19Va hisa yindlu ya Xikwembu, va mbundzuxa rirhangu ra Yerusalema, va hisa tindlu hinkwato ta vuhosi, va onha swilo hinkwaswo swa risima. 20A yisa Babilona lava poneke matlharini, kutani va n'wi tirhela ni vana va yena, ku ko ku pfuka vuhosi bya ku fuma ka Peresi, 21leswaku ku hetiseka rito ra Yehovha leri nga vuriwa hi nomu wa Yeremiya, tiko ri ko ri tsakela Tisavata ta rona; ri wisa hi nkarhi hinkwawo lowu, ku ko ku hela malembe ya 70.
22Hi lembe ro sungula ra Korexe, hosi ya Peresi hileswaku ku endlakala rito ra Yehovha leri a ri vuleke hi nomu wa Yeremiya, Yehovha a pfuxa mbilu ya Korexe, hosi ya Peresi, kutani a twarisa hinkwako eku fumeni ka yena, hi mukhosi ni matsalwa mhaka leyi nge: 23“Ku vula Korexe, hosi ya Peresi: ‘Yehovha, Xikwembu xa le matilweni, xi ndzi nyikile vuhosi hinkwabyo bya misava; kambe xi ndzi lerisile leswaku ndzi n'wi akela yindlu eYerusalema, etikweni ra Yuda. U kwihi exikarhi ka n'wina la nga wa tiko ra xona? Yehovha, Xikwembu xa yena a a ve na yena, a a tlhandluke!’ ”
Currently Selected:
2 TIKRONIKA 36: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.