2 TIKRONIKA 35
35
Ta ku endla Paseka.
1Yosiya a endla Paseka ya Yehovha eYerusalema, va tlhava Paseka hi siku ra 14 ra n'hweti yo sungula. 2Kutani a veka vaprista emitirhweni ya vona, a va tiyisa entirhweni wa yindlu ya Yehovha. 3A byela Valevhi lava hlawuleriweke Yehovha, lava dyondziseke Vaisraele hinkwavo a ku eka vona: “Vekani areka leyi hlawuriweke endlwini leyi akiweke hi Solomoni, n'wana Davhida, hosi ya Israele; a mi na ku yi pinga emakatleni. Sweswi, tirhelani Yehovha, Xikwembu xa n'wina ni tiko ra xona ra Israele. 4Tilunghiseni hi tindlu ta vatata wa n'wina, hi mitlawa ya n'wina, hilaha ku tsariweke hakona hi Davhida, hosi ya Israele, na Solomoni, n'wana wa yena; 5mi tshama evukwetsimelweni, hi marhavi ya tindlu ta vatatana, ni ta vamakwenu, vana va tiko, mi landza mitlawa ya mindyangu ya vatata ya Valevhi. 6Tlhavani Paseka, mi tihlawula, mi yi lunghisela vamakwenu mi endla hi rito ra Yehovha leri nyikiweke ha Muxe.”
7Yosiya a nyika vana va tiko swifuwo leswitsongo, swi ri swinyimpfana ni swimbutana swa 30 000, xi ri xitlhavelo xa Paseka xa hinkwavo lava ngi va ri kona, ni tihomu ta 3 000, swi huma eswifuweni swa hosi. 8Tihosana ti humesela tiko, ni vaprista ni Valevhi, tinyiko hi ku rhandza ka vona: Hilkiya, na Zakariya, na Yehiele, tihosana ta yindlu ya Xikwembu, va nyika vaprista ku endla xitlhavelo xa Paseka, swinyimpfana swa 2 600 ni tihomu ta 300. 9Konaniya, na Xemaya, na Netanele, ni vamakwavo na Haxabiya, na Yeyiele, na Yozabadi, tihosana ta Valevhi, ti nyika Valevhi ku endla xitlhavelo xa Paseka swinyimpfana swa 5 000, ni tihomu ta 500.
10Kuteloko ntirho wu lunghisiwile, vaprista va yima endhawini ya vona, ni Valevhi va yima hi mitlawa ya vona hi ku lerisa ka hosi. 11Kavaloko va tlhava Paseka, kutani vaprista va halata ngati leyi va yi amukeleke emavokweni ya vona; Valevhi, vona a va ri karhi va yevula. 12Kutani va veka etlhelweni tiholokosta, ku ti nyika eka mitlawa ya tindlu ta vatata wa vana va tiko, va ta ti humesela Yehovha, hilaha ku tsariweke hakona ebukwini ya Muxe va endlisa sweswo ni tihomu. 13Va sweka Paseka hi ku lerisa ka yona; va sweka tinyama leti hlawuriweke etimbiteni, ni le mapotweni, ni le mapaneni; va hatlisa ku ti yisa eka vana va tiko. 14Kutani va tilunghisela vona ni vaprista tinyama, hikuva vaprista, vana va Aroni, a va tirha ku humesa holokosta ni mafurha ku ko ku fika vusiku kutani Valevhi va tilunghisela vona ni vaprista, vana va Aroni.
15Vayimbeleri, vana va Asafa, a va ri endhawini ya vona hi ku lerisa ka Davhida, na Asafa, na Hemani, na Yedutuni, muvoni wa hosi; valanguteri va tinyangwa a va ri enyangweni yin'wana ni yin'wana; a va sukelanga mitirho ya vona, hikuva vamakwavo, Valevhi, va va lunghisele Paseka. 16Ntirho hinkwawo wa Yehovha wu lunghisiwa hi siku lero ku endla Paseka ni ku humesa tiholokosta ealitarini ya Yehovha hilaha hosi Yosiya a leriseke hakona. 17Vana va Israele lava ngi va ri kona, va dya Paseka enkarhini lowu, va endla ni nkhuvo wa swinkwa leswo kala comela hi masiku ya ntlhanu na mambirhi.
18Ku suka emasikwini ya Samiele, muprofeta, a ku endliwanga Paseka leyi fanaka na yona etikweni ra Israele, ni le xikarhi ka tihosi hinkwato ta Israele, a ku vanga na yin'we leyi nga endla Paseka leyi fanaka ni leyi Yosiya ni vaprista ni Valevhi va yi endleke, swin'we ni va Yuda ni va Israele hinkwavo lava ngi va ri kona ni vaaki va Yerusalema. 19Paseka leyi yi endliwe hi lembe ra 18 ra ku fuma ka Yosiya.
Yosiyasi a dlawa hi vacopi va Neko, hosi ya Egipta.
20Endzhaku ka sweswo hinkwaswo, kuteloko Yosiya a lunghisile yindlu ya Yehovha, Neko, hosi ya Egipta, a tlhandlukela eKarkemixi, henhla ka Yufrata, ku ya lwa kona, kutani Yosiya a huma ku ya hlangana na yena. 21Neko a n'wi rhumela tintsumi, ti ku: “Ku ni mhaka yihi exikarhi ka mina na wena, hosi ya Yuda? A ndzi telanga ku lwa na wena namuntlha, kambe ndzi tele yindlu leyi ndzi nga karhi ndzi lwaka na yona; kambe Xikwembu xi vula leswaku ndzi hatlisa. Tshika ku lwa ni Xikwembu lexi nga na mina, xi nga tshuki xi ku lovisa!” 22Kambe Yosiya a nga n'wi fularhelanga; a tihundzula ku n'wi pfukela, a nga yingisanga marito ya Neko lama humeke enon'wini wa Xikwembu; kutani a ta ku lwa enkoveni wa Megido. 23Kutani vacopi va copa etlhelweni ra hosi Yosiya, kutani hosi yi ku eka malandza ya yona: “Ndzi tlakuleni, hikuva ndzi tlhaviwile ngopfu.” 24Malandza ya yena ma n'wi tlakula, ma n'wi susa egolonyini, ma n'wi khandziyisa egolonyini ya yena yin'wana, ma n'wi yisa eYerusalema; kutani a fa, a lahliwa emasirheni ya vatata wa yena. Kutani va Yuda hinkwavo ni va Yerusalema, va va enkosini hikwalaho ka yena. 25Yeremiya a thya risimu ra ku rila Yosiya; vayimbeleri va xinuna ni va xisati va vurile timhaka ta Yosiya etinsin'wini ta vona ku fika ni namuntlha; va wu endla nawu eka Vaisraele; kutani maswivo, timhaka leti ti tsariwile ebukwini ya tinsimu ta mikosi.
26Leswi seleke swa timhaka ta Yosiya, ni vukhongeri bya yena, hilaha a landzeke marito ya nawu wa Yehovha, 27ni mitirho ya yena ya ku sungula ni ya ku hetelela, maswivo, swi tsariwile ebukwini ya tihosi ta Israele ni ta Yuda.
Currently Selected:
2 TIKRONIKA 35: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.