Galatians 3
3
Be ꞌalha ꞌuhoontꞌoh-i, ꞌi be za Yakꞌusda nalh tsꞌihꞌun dune tsꞌuzdliꞌ
1O Galatia whutꞌenne whuzahni! Mbe duyun-un nistꞌi whe nohnanꞌa ndi khuni ꞌalhaꞌ ꞌuntꞌoh-i ookꞌu nulhéꞌzoohtꞌen ha? Nohnichꞌoh Christ tulalhgus kꞌut neba dazsai-un, whunilhꞌen leꞌ hoontꞌoh. ꞋEt whuz unꞌa nohba be hóodatꞌen. 2ꞋIlhoghun ꞌet sudutáhnelh hukwaꞌ nuszun. Ntsꞌenꞌa Ndoni nohyudíltsꞌut? Moses be ꞌudustlꞌus ookꞌuneꞌ ꞌuhtꞌen kꞌus whudahtsꞌo-un tilah nohba ꞌalha ꞌuhoontꞌoh? 3Whuz unꞌa stabe whuzahni! Ndoni ꞌen be wheꞌ dahtꞌen. ꞋInkꞌez ꞌandit nohyustꞌe dalhꞌen-un, ꞌet whuz unꞌa tsꞌihꞌun ꞌuntꞌohne tihleh, nahzún eh? ꞋAwundooh! 4Nohni lhat-un whe dzoh nusahde wheꞌ hoontꞌoh. ꞋEt ndúwhulcho whe ꞌantsꞌi ꞌuhoontꞌoh nahzun eh? ꞋEt ntsꞌenꞌa ꞌantsꞌi nohba ꞌuwhutátꞌelh! 5ꞋEt huwa Yakꞌusda Ndoni nohyeídanꞌai ꞌinkꞌez nohtoh huwa ꞌitꞌen tuneꞌ ꞌutꞌen. Di ha ꞌuhoonla? Moses be ꞌudustlꞌus ookꞌuneꞌ ꞌuhtꞌen kꞌus ndet whudahtsꞌo-un nohba ꞌalha ꞌuhoontꞌoh?
6Abraham Yakꞌusda yuba ꞌalhaꞌ ꞌuntꞌoh whe Yakꞌusda tsꞌihꞌun dune unli yúlhni, 7ꞌet whuz unꞌa nohni cha tsꞌihꞌun unꞌa tꞌewhunoohzeh ꞌet nohtsꞌu hukwaꞌ nuszun. Mbe oobe ꞌalha ꞌuhoontꞌoh ꞌutꞌine, ꞌenne za Abraham buzkeh hinli. 8Yakꞌusda ooghuni nus de dawhútanelh, ꞌet whunénulhtun. Be ꞌalha ꞌuhoontꞌoh-i, ꞌi be Yakꞌusda ꞌudun yun kꞌut whutꞌenne tsꞌihꞌun ꞌuntꞌohne ubutilhtselh. ꞋEt whutso ꞌuwhutánelh-un, ꞌet Yakꞌusda Abraham njan ndúyulhni, “Nyun ngha ꞌudun yun kꞌut whutꞌenne, tsꞌiyawh dáwhuldzooꞌ-un bugha hóotaltsꞌulh.” 9ꞋInka Abraham Yakꞌusda yuba ꞌalhaꞌ ꞌuntꞌoh ꞌet huwa ꞌukꞌenus hoonzoo-un oogha whultsꞌut. ꞋInkꞌez mbe la Yakꞌusda ooba ꞌalhaꞌ yintꞌohne, ꞌenne cha whuz unꞌa za njan ꞌukꞌenus hoonzoo-un bugha hóotaltsꞌulh.
Moses be ꞌudustlꞌus ꞌi be ꞌaw dune Yakꞌusda nalh tsꞌihꞌun hooleꞌ ꞌaitꞌoh
10ꞋEt Moses be ꞌudustlꞌus yutꞌa ninintanne, ꞌenne tsꞌiyawh Yakꞌusda musai butilhtselh-un, ꞌet whutsꞌeꞌ hutꞌen. ꞋEt ndiz unꞌa ꞌukꞌehóoguz whe ndutni, “Moses be ꞌudustlꞌus, ꞌukꞌeyanguz-i, ꞌi tsꞌiyawh mbene la tsꞌiyawh hikꞌu nulheꞌustꞌen de, ꞌet de musai ubutilhtselh-un, tsꞌiyawh huwhutiꞌelh.” 11ꞋInkꞌez ndi Moses be ꞌudustlꞌus ꞌi be ꞌaw dune Yakꞌusda nalh tsꞌihꞌun ꞌuhootꞌeꞌ ꞌaitꞌoh. ꞋEt Yakꞌusda ooghuni njan ndutni, “Mbene tsꞌihꞌun ꞌuntꞌohne, ꞌenne be ꞌalha ꞌuhoontꞌoh-i, ꞌi be tsꞌukhuna.” 12ꞋEt Moses be ꞌudustlꞌus be ꞌalha ꞌuhoontꞌoh-i ꞌaw ꞌi gha iloh. ꞋEt mbe dune Moses be ꞌudustlꞌus yukꞌuneꞌ ꞌutꞌen de, ꞌet de ꞌi be ꞌet whuz unꞌa ndi yun kꞌut huhutinalh. 13Mbe Moses be ꞌudustlꞌus kꞌunyisne, musai hooleꞌ hubaꞌ hoontꞌoh. ꞋEt whuchꞌa Christ naneoket. Ndet musai netilhtselh-un dichꞌoh kꞌéhootꞌai. ꞋEt whuz unꞌa ꞌukꞌehonguz whe ndutni, “Mbe duchun unduniltꞌo-un, ꞌen musai tileh whe ꞌuntꞌoh,” ni. 14ꞋEt huwa Abraham dawhuldzooꞌ-un ooghá whultsꞌut, ꞌudun yun kꞌut whutꞌenne, ꞌenne cha Christ Jesus gha bugha whútaltsꞌulh. ꞋEt neba ꞌalha ꞌuhoontꞌoh-i, ꞌi be Ndoni netsꞌu yoozi neyudooltsꞌit ha.
Yakꞌusda ndet la khuni neba lhaídanla-i, ꞌaw ꞌatsꞌun unꞌa nahótneh ꞌaitꞌoh
15Sulhutsinke ndi yun kꞌut dune kꞌunꞌa ꞌet huwun nohbulh yasduk. Ndunne lhkꞌoh tsꞌe nehóninꞌai de, ꞌet huwun lhgha huhoontꞌiꞌ ꞌinkꞌez ꞌukꞌehooguz de, ꞌaw dune ꞌudun nehóhoꞌalh ꞌaitꞌoh. ꞋInkꞌez dune ꞌudun whutanahahóꞌalh-un ꞌaitꞌoh. 16ꞋEt Yakꞌusda Abraham ꞌinkꞌez ootsꞌu ha yánzut-un, ndai ye yutsꞌu náhizya, ꞌaw ꞌen za ꞌinkꞌez ootsꞌu ha yánzut-un, ꞌenne za butsꞌú yoozi. ꞋAw Abraham tsꞌu haíndene, ꞌenne iloh ꞌubudusni. ꞋAw lhane iloh ꞌulhni. ꞋEt hoontsꞌi Yakꞌusda ꞌilhoghun dune za ghu yalhduk whe ꞌutni. ꞋEt whuz unꞌa ꞌudija whe Abraham, “Ntsꞌu haínzut-un,” yúlhni. ꞋInkꞌez ndun Christ ꞌen Abraham tsꞌu hainzut-un ꞌuntꞌoh. 17Daja nohdusni-un, ꞌet ndi khuni be yutsꞌu náhizya, ꞌudaꞌ Yakꞌusda Christ bulh lhahódinla wheꞌ hoontꞌoh. ꞋEt 430 be yus kꞌut hukwꞌelhꞌaz ꞌet Moses ꞌudustlꞌus ꞌukꞌu neyuzguz. ꞋEt huwa njan Abraham khuni ooba lhaíndanla-i, ndi khuni ꞌaw gak nahooselh ꞌaitꞌoh. 18ꞋEt Yakꞌusda yutꞌi-i negha ítalelh-i, ntsꞌenꞌa Moses be ꞌudustlꞌus gha negha ítalelh? Gak! ꞋAw ꞌuhotꞌeꞌ ꞌaitꞌoh. ꞋEt hoontsꞌi Yakꞌusda Abraham yutsꞌu náhizya-un, ꞌi be yughá whuninꞌai.
Moses be ꞌudustlꞌus ꞌi ndet huba unzoo?
19ꞋEt Moses be ꞌudustlꞌus ndet huba ꞌuzooꞌ nahzun? Nintaꞌtsꞌutꞌih-un ꞌet whuchꞌa neba ꞌuhóonla. ꞋInkꞌez nkede ꞌuwhutánelh whe whusawhútiltsꞌulh, Abraham ootsꞌu ha yánzut-un whusatiyalh whutsꞌun, ꞌet whutsꞌun nebaꞌ hóonla. ꞋInkꞌez mbe yutsꞌu haínzut-un, ndi yé netsꞌu nahizya-i, ꞌen ghun ꞌuhoontꞌoh. ꞋEt mbe la dune eguz unli-un, ꞌet lizas daja hidániꞌ-un, ꞌet ꞌon ꞌun budániꞌ. 20ꞋEt mbe dune eguz unli-un, ꞌaw ꞌilhoghun za ba lheꞌítꞌoh. ꞋEt hoontsꞌi Yakꞌusda ꞌen ꞌilhoghun za unli.
21Daja nahzun? Moses be ꞌudustlꞌus ꞌinkꞌez Yakꞌusda Abraham yutsꞌu nahizya-un, ꞌet lhgheꞌ ꞌutsꞌun unꞌa eh ꞌuntꞌoh? ꞋAwundooh! ꞋEt hoontsꞌi Moses be ꞌudustlꞌus daja ni, ꞌet butlꞌa hónꞌai. ꞋEt ꞌi be dune ꞌilhiz wheni hukhuna de, ꞌet de ꞌalhaꞌ Moses be ꞌudustlꞌus ꞌi be dune tsꞌihꞌun unꞌa ꞌuhintꞌoh hutileh inleꞌ. 22ꞋEt hoontsꞌi Yakꞌusda ooghuni ndutni, tsꞌiyanne dune lubeshi bulh ꞌuhintꞌoh inleꞌ. ꞋEt ndi ye butsꞌu náhizya-i, ꞌi mbe Jesus Christ buba ꞌalhaꞌ yintꞌohne, ꞌaw ꞌenne za bugha whútakulh.
23ꞋEt hoontsꞌi be ꞌalha ꞌuhoontꞌoh-i ꞌuztitꞌelh whutsodaꞌ, Moses be ꞌudustlꞌus ꞌi be ꞌantsꞌi ꞌazdanlaꞌ leꞌ tsꞌantꞌeꞌ. ꞋI be dutsꞌo nehulhtsi, nkede be ꞌalha ꞌuhoontꞌoh-i buneuntiltun ꞌet whutsꞌun. 24ꞋEt huwa Moses be ꞌudustlꞌus nehodalhꞌeꞌ-un inleꞌ. ꞋEt whe Christ tsꞌun neoozdla. ꞋInkꞌez be ꞌalha ꞌuhoontꞌoh-i ꞌi be tsꞌihꞌun dune tsꞌooleꞌ ha. 25ꞋEt be ꞌalha ꞌuhoontꞌoh-i tsꞌutꞌi. ꞋEt huwa ndi whuneodalhꞌeꞌ-un ꞌaw ꞌon ꞌun ookꞌuneꞌ tsꞌootꞌen huba lheꞌítꞌoh.
Nohni tsꞌiyawh Christ Jesus ꞌen be ꞌilhoghun za ꞌahli
26ꞋEt nohni tsꞌiyawh Christ Jesus ꞌen gha ꞌet be ꞌalha ꞌuhoontꞌoh-i, ꞌi be Yakꞌusda buzkeh uhli. 27ꞋEt nohni nohtoh mbene Christ ba too be ꞌulyane, bulh ꞌáhtꞌoh suhliꞌ. 28ꞋInka ꞌaw lizwifne kꞌus ꞌudun yun kꞌut whutꞌenne hooloh. ꞋInkꞌez ꞌaw ꞌulhnane kꞌus oola naditnine cha hooloh. ꞋInkꞌez ꞌaw dune kꞌus tsꞌekoo cha hooloh. Nohni tsꞌiyawh Christ Jesus ꞌen bulh ꞌilhoh ꞌahtꞌoh. 29ꞋEt Jesus Christ ooduneꞌ ꞌahli de, ꞌet Abraham tsꞌu haindene cha ꞌahli. ꞋInkꞌez ndi Yakꞌusda Abraham ye yutsꞌu náhizya-i, ꞌi gha tsꞌiyawh nohtsꞌu whutikulh.
Currently Selected:
Galatians 3: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.