Galatia Whutꞌenne 2
2
Khuni unzoo-i tsꞌihꞌun unꞌa ooghu yasduk
1ꞌEt whunizyat ꞌon ꞌat dit yus kꞌut hukwꞌelhꞌaz, Barnabas bulh doo cha ndo Jerusalem tsꞌe natitꞌaz. Titus ꞌen cha uschoot ꞌinkꞌez nebulh tizꞌaz. 2Senghun neꞌwhultsꞌut-un, ꞌet huwa doo cha za Jerusalem tsꞌe nunásusja whe Jerusalem ꞌet whunilhchoh ꞌubudásniꞌ. Ndi khuni unzoo-i, ꞌi be ndunne ꞌudun yun kꞌut whutꞌenne bubulh yasduk, ꞌet whunilhchoh ꞌubudásniꞌ. ꞌInkꞌez nchane unline, ꞌenne whuꞌiz ꞌet bubulh yasduk. ꞌEt whe ꞌaw ꞌantsꞌet lheꞌústꞌel whuzdliꞌ. 3ꞌEt hoontsꞌi Titus, sulh ꞌutꞌen-un, ꞌen Greek whutꞌen-un unli, ꞌet hoontsꞌi ꞌaw yuka dune unli-i hititꞌus whutsꞌun lhehinilhtꞌi. 4Whulohne neulhutsinke naꞌhududilꞌi. ꞌEnne bugha ꞌuhooja nunútꞌiꞌ be netabonínla. Neghu hooleꞌ ha datsꞌintꞌoh whe dune tsinli. Gri Sizi ꞌantsꞌi nekꞌunaꞌanꞌoh neꞌleꞌneyinla. Wheni doo cha Moses be ꞌudustlꞌus kꞌut ꞌi be ꞌulhnane nehoolhtselh hukwaꞌ hutꞌen. 5ꞌEt hoontsꞌi nduntꞌohne ꞌaw ꞌilhoh sadzi ookꞌoh whuntátꞌoh ꞌet hoontsꞌi butlꞌa ꞌuzdudooyelh aitꞌoh. ꞌEt whe ndi khuni unzoo-i be ꞌalha ꞌuhoontꞌoh-i, ꞌi be whuz unꞌa za oohtꞌeꞌ.
6ꞌEt ndunne nchane unli butsꞌutni, ꞌenne lhgha za ubunusꞌen. Mbe hinli ꞌet hoontsꞌi sba dalhúhitꞌoh. Yakꞌusda nalh lhgha za ꞌutsꞌintꞌoh ꞌet huwa. 7ꞌEt hoontsꞌi Peter ndi khuni unzoo-i yutlꞌa idanꞌai whe ꞌi be yuka dune unli-i kꞌut huyuztꞌusne, ꞌenne bubulh yatilhduk ha, ꞌet whuz unꞌa si cha ndi khuni unzoo-i stlꞌa idanꞌai, ꞌi be ꞌudun yun kꞌut whutꞌenne bubulh yaóosduk ha. ꞌEt ndunne nchane, ꞌenne tsꞌiyawh tsꞌihꞌun unꞌa tꞌehonanzin. 8Ntsꞌenꞌa Yakꞌusda Peter lizwifne buba whelꞌaꞌ-un yulhtsi, ꞌet whuz unꞌa si cha ꞌudun yun kꞌut whutꞌenne buba whelꞌaꞌ-un sulhtsi ꞌet huwa. 9ꞌInka James, Cephas, ꞌinkꞌez John, ꞌenne butsꞌutni keyoh whuduchun unline, ꞌenne ndi ye unzoo-un ꞌet stlꞌa hónꞌai, ꞌet tsꞌihꞌun unꞌa tꞌehonanzin, ꞌet de Barnabas ꞌinkꞌez si cha ꞌet huwa nela nahúzꞌai. ꞌEt whuz unꞌa tsꞌiyanne whúbuznilhtan, wheni ꞌinkꞌez James, Cephas ꞌinkꞌez John te lhulh ꞌutsꞌintꞌoh za búznidulh. Wheni ꞌudun yun kꞌut whutꞌenne butsꞌúztidulh, ꞌinkꞌez ꞌenne Lizwifne butsꞌu hutidulh. 10Mbe la telꞌenne, ꞌenne ꞌaw bunalh tsꞌodulhnoh ꞌet za hukwaꞌ huninzun, ꞌinkꞌez si cha whuz unꞌa hukwaꞌ nuszun.
Moses be ꞌudustlꞌus ꞌaw doo cha ookꞌuneꞌ tsꞌootꞌen huba lheꞌhóotꞌoh
11ꞌEt Peter ꞌoh daꞌ keyoh Antioch tsꞌe oozya whe ꞌutsꞌun unꞌa ꞌuja. ꞌEt huwa oonin tsꞌe dásniꞌ. 12Whulohne James yulh ꞌutꞌenne, ꞌenne keyoh Antioch nehútidulh whutso, Peter ꞌudun yun kꞌut whutꞌenne ꞌahoolhiz bula ꞌáꞌalh. ꞌEt hoontsꞌi James yulh ꞌutꞌenne whusahándil whe, ꞌet Peter buchꞌa nasja. Ndunne Lizwifne bube nuljut ꞌet huwa. 13ꞌInkꞌez ꞌonghohne Lizwifne, duba naꞌudzooꞌne ꞌenne cha Peter bulh buchꞌa nahusdil. ꞌInkꞌez Barnabas, ꞌen hoontsꞌi, hinalh nduhútꞌen ꞌinkꞌez ꞌen cha bubundulꞌen suliꞌ.
14Ndi khuni unzoo-i ꞌalhaꞌ ꞌuntꞌoh-i, ꞌi daja ni, ndunne Lizwifne ꞌaw tsꞌihꞌun hikꞌú nulheꞌustꞌen. ꞌEt nawhusꞌai whe, tsꞌiyanne nalh ꞌet hukwa Peter njan dúdusni, “Nyun Lizwif ꞌintꞌoh ꞌet hoontsꞌi ꞌudun yun kꞌut whutꞌenne kꞌunꞌa dune inli. ꞌInkꞌez di ha ꞌudun yun kꞌut whutꞌenne Lizwif kꞌunꞌa dune hooleꞌ hukwaꞌ bilhꞌen?
15Wheni Lizwif tsinli whe tsꞌuwhuzdli. ꞌAw ꞌudun yun kꞌut whutꞌenne kꞌunꞌa lheꞌtsꞌítꞌoh. 16Moses be ꞌudustlꞌus ꞌi gha za ꞌutsꞌutꞌen de, ꞌaw tsꞌihꞌun dune lhtsꞌiloh. Sizi Gri neba ꞌalhaꞌ ꞌuntꞌoh ꞌet huwa tsꞌihꞌun dune tsinli ꞌet tꞌetsꞌoninzun. ꞌInkꞌez Gri Sizi ꞌen neba ꞌalhaꞌ ꞌuntꞌoh-un unli ꞌet whe Gri neba ꞌalhaꞌ ꞌuntꞌoh-un, ꞌet ꞌi be tsꞌihꞌun dune tsꞌuzdliꞌ. Moses be ꞌudustlꞌus kꞌuneꞌ ꞌutsꞌutꞌen de, ꞌaw ꞌet huwa iloh tsꞌihꞌun dune tsꞌuzdliꞌ. Moses be ꞌudustlꞌus kꞌuneꞌ ꞌutꞌenne, ꞌaw ꞌilhoghun hoontsꞌi tsꞌihꞌun unꞌa lheꞌínel ꞌet huwa.
17Wheni Lizwifne, Gri ꞌen be tsꞌihꞌun ꞌuntꞌohne tsꞌooleꞌ ꞌet za hukwaꞌ ꞌuzninzun de, ꞌet hoontsꞌi lubeshi ꞌulhꞌenne tsinli, ꞌet natsꞌuhoonꞌai de, Gri ꞌen cha eh lubeshi tsꞌu nóhnilhtꞌi unli? Ntsꞌenꞌa ꞌuwhutátꞌelh? ꞌAw ꞌuhótꞌeꞌ aitꞌoh! 18ꞌEt ndi Moses be ꞌudustlꞌus kꞌut ꞌudun nenúsdla ꞌinkꞌez doo cha za náschoot ꞌinkꞌez ookꞌuneꞌ tistꞌen de, ꞌet de khuni kꞌunusyuz wheꞌ tisnelh. 19Moses be ꞌudustlꞌus kꞌut, whulh dasúsai le ꞌustꞌoh, ꞌaw ꞌon ꞌat ookꞌú nulheꞌtuzistꞌel ꞌet huwa. ꞌEt whuz unꞌa Yakꞌusda ba khusna zaꞌ tistꞌelh. 20Gri tulalhgus kꞌut bulh dasusai le ꞌustꞌoh, ꞌet ꞌaw ꞌon ꞌun lhuhúsnoh le ꞌustꞌoh, ꞌet hoontsꞌi Gri syudinda. ꞌInkꞌez ye khuna-i, ꞌi be khusna. Yakꞌusda ooYeꞌ sba ꞌalhaꞌ ꞌuntꞌoh-un, ꞌet ꞌi gha yun kꞌut khusna. ꞌEn ꞌuja skꞌentsiꞌ kꞌet sba whutlꞌaꞌ dudilti. 21ꞌAw Yakꞌusda ye unzoo-i ꞌaw ꞌudun neoosꞌalh aitꞌoh! Moses be ꞌudustlꞌus kꞌut, ꞌi be tsꞌihꞌun dune tsꞌooleꞌ aitꞌoh. ꞌEt whuz unꞌa ꞌuhoontꞌoh de, ꞌet Gri ꞌantsꞌet whe neba dazsai leꞌwhutatꞌelh,” Peter ꞌet ndudúsni.
Currently Selected:
Galatia Whutꞌenne 2: crx
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.