Galatians 4
4
Dune ꞌawhuz tsꞌoodun unli de, ꞌantsꞌi ꞌulhna-un unli leꞌ ꞌuntꞌoh, ꞌet hoontsꞌi ꞌilhudzin moodih tileh
1ꞋEt ndiz unꞌa nohdusni, mbe la ꞌukꞌelhutizulh-un, ꞌen ꞌawhuz tsꞌoodun unli de, ꞌantsꞌi ꞌulhna-un unli leꞌ ꞌuntꞌoh, ꞌet hoontsꞌi ꞌilhudzin moodih tileh. 2Nkede la oobá yuba hoozi-un whusawhútiltsꞌulh ꞌet whutsꞌun, yughunline ꞌinkꞌez yoh huwundline, ꞌawhuz highunli. 3Wheni cha ꞌet za ꞌet dutsꞌántꞌeꞌ. Tsꞌoodunne ndutsꞌultꞌoh whe ꞌutsꞌantꞌeꞌ. Ndi yun kꞌut ꞌutꞌen be tankꞌus úznantꞌi. ꞋEt huwa ndi yun kꞌut whe ꞌulhna tsꞌanleꞌ. 4ꞋEt hoontsꞌi whusahóoltsꞌut whe Yakꞌusda duYeꞌ whusayálhꞌaꞌ. Tsꞌeke ꞌen yulhtsi, Moses be ꞌudustlꞌus yukꞌúneꞌtitꞌen ha. 5ꞋEt whuz unꞌa mbene Moses be ꞌudustlꞌus kꞌúneꞌ ꞌutꞌenne, ꞌenne tsꞌiyawh nabonket. ꞋEt whe wheni Yakꞌusda buzkeh tsꞌooleꞌ ha. 6ꞋInkꞌez Yakꞌusda buzkeh suhliꞌ. ꞋEt huwa Yakꞌusda duYeꞌ ooyughi, ꞌen nohtsꞌun whusayálhꞌaꞌ, nohdzi yoh oodaꞌ ha. Tube cho “Abba” ni. ꞋUBá ni whe ꞌutni. 7ꞋEt huwa ꞌaw ꞌon ꞌun ꞌulhnane lháhloh, ꞌen buzkeh suhliꞌ. ꞋInkꞌez buzkeh suhliꞌ de, ꞌet Christ ꞌen gha Yakꞌusda yutꞌi-i nohchꞌeꞌ tileh.
Paul Galatia whutꞌenne ꞌubulhni, “ꞋEt nohba whénuzjut! ꞋOh daꞌ nohba ꞌuwhúsdla-un, ꞌet ꞌantsꞌi ꞌistꞌen whutaleh”
8ꞋEt hoontsꞌi niz de whudizulh daꞌ ꞌaw Yakꞌusda tꞌenuzahzun inleꞌ. Whulohne Yakꞌusda lhílohne, ꞌenne hoontsꞌi buba ꞌulhnane ꞌahtꞌoh inleꞌ. 9ꞋInkꞌez ꞌandit ꞌawet Yakꞌusda tꞌenihzin, kꞌus ndiz unꞌa tilah ꞌudoosniꞌ, Yakꞌusda nohni tsꞌiyawh soo cho tꞌenohnanzin. ꞋEt di ha nohni doo cha ndai la ndi yun ye tetsun-i, ꞌinkꞌez lheꞌízooꞌ-i, ꞌi tsꞌiyawh ootsꞌu nátilhye hukwaꞌ ꞌahtꞌen? ꞋOhwhi doo cha za eh be ꞌulhna tihleh hukwaꞌ nahzun eh? 10Lheꞌuhtꞌen! Whuloh dzin, sanun te, ꞌinkꞌez hoonli ntsꞌowhuya whudizulh kꞌus whulukhun yus kꞌut cha, ꞌi tsꞌiyawh neba whudiztiꞌ duhni! 11ꞋAntsꞌi ꞌet tilah nohba ꞌistꞌen, ꞌet huwa nohba whénuzjut.
12Sulhutsinke nohni nohtsꞌun tedusdlih skꞌunꞌa ootꞌeꞌ ha. Nohni si nohkꞌunꞌa ꞌustꞌoh ꞌet huwa. ꞋAw hoonli whe sulh lhundúlhdal. 13Tꞌeoonahzun bé syustꞌe tetsun-i, ꞌet huwa soo ꞌudechoo ndi khuni unzoo-i be nohbulh yasduk inleꞌ. 14ꞋInkꞌez ntsꞌenꞌa la syustꞌe be dzoh nuszut, ꞌet hoontsꞌi nohba dalhúhootꞌoh. ꞋEt huwa ꞌaw tenásulhnahyulh. ꞋEt hoontsꞌi Yakꞌusda oolizas usdli nohba le ꞌustꞌoh. ꞋEt whuz unꞌa nohyoh tsꞌe dasunulhti. Christ Jesus ꞌen nohba le ꞌustꞌoh, ꞌet huwa ꞌanih sudahni. 15Ndet whe ndi ꞌukꞌunus hoonzoo-un nohgha whultsꞌut? ꞋEt dáhooja? Tsꞌihꞌun unꞌa ꞌunohdusni, nohna ha níhla ꞌinkꞌez daꞌ sgha nóhlelh ooleꞌ daꞌ. 16ꞋEt dahooja? Tsꞌihꞌun nohdusni. ꞋEt huwa nohchꞌaz nedisja nahzun eh?
17ꞋEt ꞌuyoonne nunútꞌiꞌ be khanóhonotꞌah hukwaꞌ hutꞌen, butsꞌun nenádohdilh ha. ꞋEt ꞌudun nenohoninla. ꞋEt la bukaꞌ nooszin ha. 18ꞋEt tsꞌihꞌun ꞌuhoontꞌoh-un, ꞌet soo cho hukwaꞌ ꞌahtꞌen nohbulh ꞌustꞌen kꞌus ꞌaw nohbulh lheꞌzustꞌen ꞌet hoontsꞌi. 19Suzkehke nkede whusaootiltsꞌulh soo tsꞌihꞌun unꞌa Christ nohbulh ꞌutitꞌelh ꞌet whutsꞌun, ꞌantsꞌi tsꞌoodun ha sulh ꞌultsꞌulh nohba le ꞌustꞌoh. 20ꞋAndit ꞌaho nohbulh ꞌutistꞌelh hukwaꞌ nuszun. ꞋEt khuni ꞌutsꞌun unꞌa nohbulh yaoosduk hukwaꞌ nuszun. Nohbulh nawh ꞌunuszun ꞌet huwa.
Nane tsꞌekoo, Sarah ꞌinkꞌez Hagar, ꞌenne nawh hukwꞌunꞌa khuni neba lhadulya-i hinli leꞌ hintꞌoh
21Nohni mbe ꞌahli whe Moses be ꞌudustlꞌus ookꞌuneꞌ tihtꞌen hukwaꞌ nuhzun, ꞌet suduhni, ndi Moses be ꞌudustlꞌus daja ni la, soo tsꞌihꞌun unꞌa tꞌeoonúhzun eh? 22ꞋEt ndiz unꞌa ꞌukꞌeyanguz whe njan ndutni, Abraham nane buzkeh ooyeꞌke, ꞌilhoghun, ꞌen ꞌustle-un, ꞌen ooyaz. ꞋEt ꞌilhoghun ꞌaw ꞌustle-un lhíloh, ꞌen ooyaz. 23ꞋEt hoontsꞌ ndun tsꞌeke ꞌustle-un ooyaz, ꞌen neyustꞌe kꞌoh tsꞌe whuzdli. ꞋEt hoontsꞌi tsꞌeke ꞌustle-un lhiloh ooyaz, ꞌen Yakꞌusda Abraham yutsꞌú hoozi, ꞌet hukwꞌunꞌa whuzdli.
24ꞋEt ndi ꞌi tsꞌiyawh oogha neꞌtsꞌutꞌen-i neba unli. Njan dahoontꞌoh whe ndunne tsꞌekoo ꞌenne nawh hukwꞌunꞌa khuni neba lhadulya-i hinli leꞌ hintꞌoh. ꞋEt ndi ꞌilho khuni, ꞌi dzulh Sinai tsꞌun hadiltsꞌut-i le ꞌuntꞌoh. ꞋInkꞌez mbene la ꞌet whuzdline, tsꞌiyawh ꞌulhnane hinli. ꞋI nyoon tsꞌeke ꞌustle-un Hagar huyulhni, ꞌen kꞌunꞌa ꞌuntꞌoh, ni whe ꞌutni. 25Ndiz unꞌa njan dúhoontꞌoh, ndun tsꞌeke Hagar, ꞌen ndi dzulh Sinai, yun kꞌut Arabia tsꞌuwhutni-un, ꞌet whuz unꞌa ꞌuntꞌoh. ꞋInkꞌez njan keyoh Jerusalem, ꞌet ndun Hagar kꞌunꞌa ꞌuhoontꞌoh. Njan keyoh, ꞌet ꞌulhnane keyoh ꞌuhoontꞌoh. ꞋInkꞌez mbene ꞌet whuzdline, ꞌenne tsꞌiyawh ꞌulhnane ꞌuhintꞌoh. 26ꞋEt hoontsꞌi ꞌudun keyoh Jerusalem ndo yakꞌuz ꞌuhoontꞌoh, ꞌet ꞌulhnane keyoh lheꞌhootꞌoh ꞌinkꞌez wheni tsꞌiyawh njan keyoh neloo ꞌuhoontꞌoh leꞌ hoontꞌoh. 27ꞋEt whe Yakꞌusda be ꞌudustlꞌus kꞌut ꞌet ndutni,
“Whunilhni tsꞌeke!
Nyuzkeh hooloh. Nyun ꞌintꞌoh ꞌaw nyuzkeh hóleꞌ ꞌaitꞌoh. ꞋAw nyaz whutaleh hukwꞌunꞌa whélhdintnih. ꞋAwet hootántꞌeꞌ! Tube cho hoonáhtꞌiꞌ! Mbe buzkeh hooloh-un, ꞌen ooki hoonli-un, anus buzkeh lhai tileh ꞌet huwa,” ni.
28ꞋEt sulhutsinke, wheni Isaac kꞌunꞌa ꞌutsꞌintꞌoh. Wheni cha Yakꞌusda Abraham yutsꞌu hoozi-un, ꞌen buzkeh tsinli. 29ꞋEt hoontsꞌi ꞌoh daꞌ ndun neyustꞌe kꞌoh tsꞌe whuzdli-un, ꞌen Ndoni ye ulhtus-i be whuzdli, ꞌet ndet huwa dzoh nuyulhdzut ꞌet ꞌandit dzin ꞌawhuz ꞌet za neba ndúhoontꞌoh. 30ꞋEt hoontsꞌi Yakꞌusda be ꞌudustlꞌus daja ni la? ꞋEt Sarah Abraham njan yulhni, “ꞋEt ꞌustle-un tsꞌeke, duyeꞌ bulh tenabuninyoot. ꞋAlhaꞌ ndun ꞌustle-un tsꞌeke ooyeꞌ, ꞌaw nkꞌelheꞌtoolelh ꞌaitꞌoh. Tsꞌeke ꞌustle-un lhusdloh, syeꞌ ꞌen za nkꞌélheꞌtilelh,” yulhni. 31ꞋEt huwa sulhutsinke wheni ꞌaw ꞌustle-un tsꞌeke buzkeh lhtsꞌiloh. ꞋEt ꞌustle-un tsꞌeke lhiloh-un, ꞌen buzkeh ꞌutsꞌintꞌoh.
Currently Selected:
Galatians 4: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.