Fa‘ata‘oto 3
3
O le Usiusita‘i, o le Fa‘atuatua, ma le ‘Onosa‘i
1Lo‘u atali‘i e,
‘aua ne‘i galo ‘iā te oe la‘u tulafono;
a ‘ia tausia a‘u poloa‘iga i lou loto.
2Auā e fa‘aopoopoina ai ‘iā te oe o aso e tele,
ma tausaga ‘e te ola ai, ‘atoa ma le manuia.#Teu 30.20; Sala 119.165
3‘Aua ne‘i te‘a ma oe le alofa ma le fa‘amaoni,
‘ia asoa ai i lou ua; ‘ia e tusi ai i le papa o lou loto;
4‘ona e maua ai lea o le alofa ma le manuia lelei i luma o le Atua, ‘atoa ma tagata.#Luka 2.52; Roma 14.18; 1 Samu 2.26
5‘Ia e fa‘atuatua i le ALI‘I ma lou loto ‘atoa;
‘ae ‘aua le fa‘alagolago i lou lava atamai.#Sala 37.3; Iere 10.23
6‘ia e manatua o ia i ou ala uma,
‘ona fa‘atonuina ai lea e ia lava ou ala.
7‘Aua ‘e te fa‘afiapoto; ‘ia e mata‘u i le ALI‘I,
‘ia ‘alo ‘ese i le leaga;#Roma 12.16; Iopu 28.28
8e fai lea ma mea e malosi ai lou pute ma mea e su ai ou ivi.
9‘ia e āva i le ALI‘I i lou ‘oa ma le fa‘apolopolo o au mea uma e tutupu;#Eso 23.19
10‘ona tūtūmu ai lea ou fale saito i le mau;
e feosofi fo‘i au tu‘ugāuaina i le uaina fou.
11Lo‘u atali‘i e,
‘aua le fa‘atauva‘a ‘iā te oe le a‘oa‘iga a le ALI‘I;
‘aua fo‘i ‘e te ‘ino‘ino pe a a‘oa‘iina oe e ia.#Iopu 5.17; Teu 8.5; 1 Kori 11.32; Epe 12.5-6; Fa‘ata 3.19
12Auā o lē ‘ua alofagia e le ALI‘I,
e a‘oa‘iina o ia e ia;
e pei o le tamā ‘ona a‘oa‘iina o lona atali‘i ‘ua ia fiafia i ai.
13‘Amu‘ia le tagata na te maua le poto ma le tagata na te maua le mafaufau;
14auā e sili ‘ona lelei o lona fa‘atau
i lo le fa‘atau o le ario ma mea e maua ai e sili lea i le auro.#Iopu 28.15-18; Fa‘ata 8.10-11
15E sili ‘ona lelei o ia i penina ma au mea fa‘afiafia uma lava e lē tusa ma ia.
16O lo‘o i lona lima taumatau le ola tulu‘i;
a o i lona lima tauagavale le ‘oloa ma le vi‘iga.#Fa‘ata 8.18
17O ona ala o ala matagofie; ma ona magāala uma o i ai le manuia.
18O ia o le la‘au o le ola i ē tago atu ‘iā te ia;
‘amu‘ia fo‘i i latou o ē tāofi atu ‘iā te ia.#Kene 2.9; 3.22; Fa‘aa 2.7; 22.2
19O le poto na fa‘avaeina ai e le ALI‘I le lalolagi;
‘ua fa‘atumauina le lagi i le mafaufau.
20O lona poto ‘ua vaeluaina ai moana;#Kene 7.11; Teu 33.28; Iopu 38.8
o ao fo‘i ‘ua to‘ulu ai le sau.
21Lo‘u atali‘i e,
‘aua ne‘i te‘a ‘ese nei mea i ou luma;
‘ia e tāofi mau i le poto ma le mafaufau;
22e fai ia mea ma ola o lou agaga ma mea matagofie i lou ua.#Teu 32.47; Fa‘ata 1.9
23‘Ona e savali ai lea ma le saogalemū i lou ala;
e le tu‘ia fo‘i lou vae;
24a e ta‘oto ‘e te lē fefe; ‘e te ta‘oto lava, e malie fo‘i au moe.#Levi 26.6; Iere 32.26
25‘Aua ‘e te mata‘u i le fefe fa‘afuase‘i
ma le malaia o ē amio leaga pe a o‘o mai.
26Auā o le ALI‘I, e fai o ia mou fa‘atuatuaga;
na te leoleo fo‘i i lou vae, ne‘i maua.
27‘Aua ne‘i e fa‘afiti se mea lelei i ē ‘ua tatau i ai,
pe a ‘ua e mafai ‘ona faia.#Kala 6.10
28‘Aua ne‘i e fai atu i lē lua te tuā‘oi,
“Alu ia, ‘inā toe sau, a taeao, ‘ona ‘ou avatu ai lea;”
a o lo‘o i ai lava le mea ‘iā te oe.#Levi 19.13; Teu 24.15
29‘Aua ne‘i e fai togafiti e leaga ai lē lua te tuā‘oi;
a o ia o lo‘o nofo fa‘atalanoa fa‘atasi ma oe.
30‘Aua ne‘i finau fua ma se tasi tagata;
‘āfai ‘ua na lē faia se mea leaga ‘iā te oe.
31‘Aua ‘e te matau‘a i le tagata fa‘asauā;
‘aua fo‘i ‘e te filifili i se tasi o ona ala.
32Auā e ‘inosia e le ALI‘I le tagata agapi‘opi‘o;
‘ae fefa‘auōa‘i o ia ma ē ‘ua sao a latou amio.#Iopu 29.4
33O le fetu‘u a le ALI‘I o lo‘o i le fale o lē amio leaga;
a ‘ua fa‘amanuia e ia le mea e nofo ai ē amiotonu.
34O ē tauemu e tauemua fo‘i i latou e ia;
‘ae foa‘i mai e ia le alofa tunoa i ē agamalū.#Iako 4.6; 1 Pete 5.5; Fili 3.19
35O ē popoto e fai mo latou tofi le vi‘iga;
a o ē vālelea, e fai mo latou tomai le mā.#Fili 3.19
Currently Selected:
Fa‘ata‘oto 3: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.