Failauga 2
2
O Mea a lenei Olaga e Fiafia ai Tagata
1‘Ua ‘ou fa‘apea ifo i lo‘u loto, “Sau ia, ‘ou te tofotofo ‘iā te oe i le ‘oli‘oli, ‘inā e fiafia ia i mea lelei; fa‘auta fo‘i, o le mea fa‘atauva‘a lava lea.”#Luka 12.19 2‘Ua ‘ou fa‘apea i le ‘ata‘ata, “‘Ua valea lea,” o le ‘oli‘oli fo‘i, “Se a se mea na te faia?” 3‘Ua ‘ou mānatunatu ifo i lo‘u loto e fa‘amasani lo‘u tino i le uaina, o lo‘o ta‘ita‘iina fo‘i ma le poto lo‘u loto; e tago atu fo‘i i le valea, se‘ia ‘ou iloa le mea e lelei a‘i tagata latou te faia i lalo o le lagi, i aso uma o latou olaga nei.#Fai 1.17
4Na ‘ou faia galuega tetele mo a‘u; na ‘ou faia fale mo a‘u; na ‘ou faia tōvine mo a‘u;#1 Tu 10.23-27; 2 No 9.22-27 5na ‘ou faia fo‘i mo a‘u o fa‘ato‘aga ma fanua e totō ai la‘au, na ‘ou totō fo‘i i ai la‘au uma lava e fua; 6na ‘ou faia fo‘i mo a‘u o vailepa, e fa‘asūsū atu ai le fanua e tutupu ai la‘au; 7na ‘ou fai mo a‘u o ‘au‘auna tane ma ‘au‘auna fafine, sa ‘iā te a‘u fo‘i ‘au‘auna na fānanau mai i lo‘u ‘āiga; sa ‘iā te a‘u fo‘i o lafu povi ma mamoe e tele, e sili ‘iā i latou uma lava o ē na muamua ‘iā te a‘u i Ierusalema;#1 Tu 4.23 8na ‘ou fa‘apotopoto fo‘i mo a‘u ario, ma auro, ma le ‘oloa tāua o tupu ma itū mālō; na ‘ou fai fo‘i mo a‘u o tane pepese ma fafine pepese, ma mea e fiafia ai tagata, o le avā ma nisi avā.#1 Tu 10.10, 14-22
9Na tamao‘āiga fo‘i a‘u, na tele fo‘i a‘u mea ‘iā latou uma lava o ē na muamua ‘iā te a‘u i Ierusalema; i le ma lea, ‘ua tumau lo‘u poto ‘iā te a‘u.#1 No 29.25 10O mea uma fo‘i sa fia va‘ai i ai o‘u mata ‘ua ‘ou le vaoia i ai; na ‘ou lē tāofia fo‘i lo‘u loto i se mea e tasi e fiafia ai; auā na ‘oli‘oli lo‘u loto i a‘u galuega uma na fai fo‘i lea mau mea i a‘u galuega uma. 11‘Ona ‘ou va‘ai lea i galuega uma na faia e o‘u lima ma le galuega na ‘ou tigā ai i fai; fa‘auta fo‘i, o mea fa‘atauva‘a uma lava ia ma le ‘ai i le matagi, ‘ua leai lava se mea aogā i lalo o le lā.#Fai 1.3, 14
E Oti le Poto, e oti fo‘i le Vale
12Na ‘ou liliu ane fo‘i ‘ia ‘ou iloa le poto ma le fa‘alialia vale, ma le valea; auā se a se mea e toe mafaia ‘ona fai e le tagata e mulimuli mai i le tupu, e lē na o mea ‘ea ‘ua uma ‘ona faia? 13Na ‘ou iloa fo‘i ‘ua sili le aogā o le poto i le valea, e pei ‘ona sili o le aogā o le malamalama i le pouliuli.
14O le tagata poto, o i lona ulu ona mata,
a o le valea e savali o ia i le pouliuli.
A ‘ua ‘ou iloa fo‘i, e tasi lava le mea e o‘o ‘iā te i lā‘ua uma.#Fa‘ata 17.24; Fai 9.2 15‘Ona ‘ou fa‘apea ifo lea i lo‘u loto, “E pei ‘ona o‘o i le vale, e fa‘apea fo‘i ‘ona o‘o ‘iā te a‘u lava; o le a fo‘i ‘ua sili a‘i lo‘u nei poto?” ‘Ona ‘ou fa‘apea ifo lea i lo‘u loto, o le mea fa‘atauva‘a fo‘i lea. 16Auā e lē manatua le tagata poto po o le vale e fa‘avavau; auā o mea ‘ua i ai nei e fa‘agalogaloina uma lava i se aso. Auē! e oti le tagata poto e pei o le vale.#Fai 1.11 17O le mea lea na ‘ou ‘ino‘ino ai le olaga nei; auā ‘ua leaga ‘iā te a‘u galuega ‘ua faia i lalo o le lā; auā o mea uma lava e fa‘atauva‘a ia ma le ‘ai i le matagi.
18Na ‘ou ‘ino‘ino fo‘i i a‘u galuega uma ‘ua ‘ou tigā ai i lalo o le lā; auā ‘ou te tu‘uina ia mo le tagata e nofo mai pe a mavae atu a‘u;#Sala 39.6; 49.10 19o ai fo‘i sē na te iloa po o se tagata poto, po o se vale o ia? ‘ae pule o ia i a‘u galuega uma ‘ua ‘ou tigā ai ma ‘ou faia i lo‘u poto i lalo o le lā. O le mea fa‘atauva‘a fo‘i lea.#1 Tu 12.13-14 20‘Ona ‘ou toe manatu ifo lea e fa‘aliliu ‘ese lo‘u loto i le fa‘atuatua i galuega uma ‘ua ‘ou tigā ai i lalo o le lā. 21Auā o lo‘o galue le tasi tagata ma le poto ma le iloa, ma le manuia; ‘ae tu‘uina e ia mo le tagata na lē tigā ai e fai mōna tofi. O le mea fa‘atauva‘a lea, o le mea leaga tele. 22Auā se a se mea ‘ua maua e le tagata i ana galuega uma ma le taumafai o lona loto, ‘ua tigā ai o ia i lalo o le lā? 23Auā o ona aso uma o fa‘anoanoaga ia, o le mea tigā fo‘i lana galuega; e lē mapu fo‘i lona loto i le po. O le mea fa‘atauva‘a fo‘i lea.#Iopu 5.7; 14.1
24E leai se tasi mea lelei i le tagata, na ‘ona ia ‘ai ma inu ma fa‘afiafia lona loto i mea lelei i ana galuega. ‘Ua ‘ou iloa fo‘i le mea nei, e mai le ‘a‘ao o le Atua lea.#Fai 3.13; 5.18; 9.7; Luka 12.19; 1 Kori 15.32 25Auā o ai sē na te mafaia ‘ona ‘ai, o ai fo‘i sē na te mafaia ‘ona fai lona loto, e sili ‘iā te a‘u ne‘i? 26Auā e foa‘iina e le Atua i le tagata e lelei i ona luma, o le poto, ma le iloa o mea, ma le ‘oli‘oli; a o lē ‘ua agasala, e foa‘iina e ia i ai le faiva e fa‘apotopoto ma fa‘aputu, ‘ina ‘ia foa‘iina atu ai e ia i lē ‘ua lelei i luma o le Atua. O le mea fa‘atauva‘a fo‘i lea ma le ‘ai i le matagi.#Iopu 32.8; Fa‘aa 2.6
Currently Selected:
Failauga 2: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.