Teuteronome 3
3
O le Fa‘ato‘ilaloina o Oko le tupu o Vasana
(Nume 21.31-35)
1‘Ona tatou liliu ane lea, ma tatou ō a‘e i le ala i Vasana, ‘ona latou ō mai lea, o Oko le tupu o Vasana, o ia ma lona nu‘u uma lava e fa‘afetaia‘i ‘iā te i tatou e tau ai le tau‘a i Eterei. 2A ‘ua fetalai mai le ALI‘I ‘iā te a‘u, “‘Aua ‘e te mata‘u ‘iā te ia, auā ‘ua ‘ou tu‘uina atu i lou lima o ia, ma lona nu‘u uma, ‘atoa ma lona lau‘ele‘ele; ‘e te faia ‘iā te ia e pei ‘ona e faia ‘iā Sekono le tupu o sa Amorī, o lē sa nofo i Hesepona.”
3‘Ona tu‘uina mai ai lea e le ALI‘I lo tatou Atua i o tatou lima o Oko le tupu o Vasana, ma lona nu‘u uma lava, ‘ona tatou fafasi ai lea ‘iā te i latou, na lē toe lava se to‘atasi ‘iā te ia. 4Na tatou ā‘ea fo‘i ona ‘a‘ai uma lava i ia ona po, e leai so latou ‘a‘ai na lē ā‘ea e i tatou, o ‘a‘ai e onogafulu, o le itū uma o Arakopo na pule ai Oko i Vasana. 5O ‘a‘ai uma lava ia ‘ua puipuia i pā maualuluga, o puipui ‘ua fai ma fa‘amau fa‘alava; ‘atoa ma faoa ‘a‘ai e tele lava.#1 Tu 4.13 6‘Ona tatou fa‘aumatia lea i latou, e pei ‘ona tatou faia ‘iā Sekono le tupu o Hesepona, na tatou fa‘aumatia o tane, o fafine, ma tamaiti i ‘a‘ai uma lava. 7A o manu uma, ma ‘oloa o i ai, ‘ua tatou vetea ma tatou.#Teu 2.34-35
8O ia ona aso fo‘i na tatou faoa ai le lau‘ele‘ele nai lima o tupu e to‘alua o sa Amorī, ‘ua i le itū mai o Ioritana, e āfua mai i le alia o Arinona, ‘ua o‘o atu lava i le mauga o Heremoni, 9(na igoa Heremoni e tagata o Saitonu, o Siriona, a ‘ua igoa e sa Amorī, o Senira); 10o ‘a‘ai uma lava i le ‘ele‘ele laugatasi, ma Kiliata uma, ma Vasana uma ‘ua o‘o atu i Saleka ma Eterei, o ‘a‘ai i nu‘u na pule ai Oko i Vasana.
11Auā ‘ua na o Oko le tupu o Vasana, na toe i tagata maualuluga; fa‘auta i lona moega, o le moega u‘amea, e lē o lo‘o i Rapa ‘ea o le ‘a‘ai o le fānauga a Amoni? E iva kupita o lona umi lea, e fa kupita o lona lautele lea, o le kupita o le tagata lea.
O Itū‘āiga sa nonofo i le itū i sasa‘e o Ioritana
(Nume 32.1-42)
12O le nu‘u lea sa fai mo i tatou i ia ona po, e pau mai i Aroeru e lata ane i le alia o Arinona, ma le tasi itū o le mauga o Kiliata, ma ona ‘a‘ai ‘ua ‘ou foa‘iina atu i sa Reupena, ma sa Katō. 13O le toe itū o Kiliata, ma Vasana uma, na pule ai Oko, ‘ua ‘ou foa‘iina atu ai i le vaega o le itū‘āiga o Manase; o le itū uma o Arakopo.
O Vasana uma lava, sa ta‘ua o le nu‘u o tagata maualuluga. 14O Iairo le atali‘i o Manase ‘ua na faoa le itū uma o Arakopo, ‘ua o‘o atu i le tuā‘oi o Kasuri, ma Maaka, ‘ua na fa‘aigoaina ai i lona lava igoa, o Vasanahavota-iairo, ‘ua o‘o i nei ona po.
15‘Ua ‘ou foa‘iina atu fo‘i Kiliata ‘iā Makiro; 16‘ua ‘ou foa‘iina atu fo‘i i sa Reupenā, ma sa Katō, e āfua mai i Kiliata, ‘ua o‘o atu i le alia o Arinona, o i totonu lava o le alia, ma le tuā‘oi; ‘ua o‘o atu lava i le alia o Iapoka, o le tuā‘oi lea o le fānauga a Amoni. 17O le ‘ele‘ele laugatasi fo‘i, ma Ioritana, ma ona itū e āfua mai i Kinereta, e pau mai i le sami o i le ‘ele‘ele laugatasi, o le sami ‘o‘ona lea i lalo o Asetota-peseka i le itū i sasa‘e.
18O ia ona po na ‘ou fai atu ai ‘iā te ‘outou, ‘ua fa‘apea atu: “‘Ua foa‘i mai ‘iā te ‘outou e le ALI‘I lo ‘outou Atua lenei nu‘u e fai mo ‘outou, o ‘outou uma o ē malolosi, tou te ō atu o sauni i le tau‘a i luma o ‘outou ‘au uso le fānauga a Isaraelu.#Iosu 1.12-15 19A o a ‘outou avā, ma a ‘outou tamaiti, ma a ‘outou manu, auā ‘ua ‘ou iloa ‘ua tele a ‘outou manu, ‘ia latou nonofo i o ‘outou ‘a‘ai ‘ua ‘ou avatua ‘iā te ‘outou; 20se‘ia avatua e le ALI‘I le mapusaga i o ‘outou uso, e pei o ‘outou na lava, se‘ia fai fo‘i mo i latou le nu‘u o i ona tala atu o Ioritana, ‘ua foa‘iina atu ‘iā te i latou e le ALI‘I lo ‘outou Atua; ‘ona toe ō mai ai lea o ‘outou, e ta‘itasi i lona tofi ‘ou avatua ‘iā te ‘outou.”
21O ia ona po na ‘ou fai atu ai ‘iā Iosua, ‘ua fa‘apea atu, “Na e iloa atu i ou lava mata i mea uma lava ‘ua faia e le ALI‘I lo ‘outou Atua i na tupu e to‘alua, e fa‘apea fo‘i ‘ona faia e le ALI‘I i mālō uma lava, o le ‘ae alu atu i ai. 22‘Aua tou te matata‘u ‘iā i latou, auā o le ALI‘I lo ‘outou Atua, o ia e tau mo ‘outou.”
‘Ua lē Fa‘atagaina Mose e ulufale atu i Kanana
23O ia ona po na ‘ou ‘ai‘oi atu ai i le ALI‘I, ‘ua fa‘apea atu,#Nume 27.12-14; Teu 32.48-52 24“Le Ali‘i e, le ATUA, ‘ua e amataina ‘ona fa‘aalia mai i lau ‘au‘auna o lou silisili ‘ese ma lou ‘a‘ao malosi, auā o ai sē Atua o i le lagi, po o le lalolagi na te mafaia ‘ona fai o mea e pei ‘ona e faia, e tusa fo‘i ma lou malosi? 25‘Ou te ‘ai‘oi atu ‘iā te oe se‘i ‘ou alu atu ‘ou te matamata ai i le nu‘u lelei o i tala atu o Ioritana, o lenā mauga lelei, ma Lepanona.”
26A ‘ua to‘asā mai le ALI‘I ‘iā te a‘u ‘ona o ‘outou ma ‘ua na lē fa‘afofoga mai ‘iā te a‘u, a ‘ua fetalai mai le ALI‘I ‘iā te a‘u, “Sōia, ‘aua lava ‘e te toe fai mai se ‘upu ‘iā te a‘u i lea mea. 27Alu a‘e ia oe i le tumutumu o Peseka, ma e va‘ai i le itū i sisifo, ma le itū i matū, ma le itū i saute, ma le itū i sasa‘e, ma ‘ia e iloa ai i ou mata; auā ‘e te lē sopo‘ia atu lenā Ioritana. 28A ‘ia e poloa‘i atu ‘iā Iosua, ma e fa‘amafanafana, ma fa‘amalosi ‘iā te ia, auā o ia e alu atu lava i luma o le nu‘u nei, o ia na te tofia mo i latou le nu‘u ‘e te va‘aia.”#Nume 27.12-13
29‘Ona tatou nonofo ai leai i le vanu e feagai ma Petepeoro.
Currently Selected:
Teuteronome 3: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.