Teuteronome 2
2
O le Tala i mea na faia ‘iā Etoma ma nisi Nu‘u
1‘Ona tatou liliu ane lea, ma tatou ō atu i le vao i le ala i le sami Ulaula, e pei ‘ona fetalai mai o le ALI‘I ‘iā te a‘u, e tele lava aso ‘ua tatou si‘osi‘o ai le mauga o Seira.#Nume 21.4
2‘Ona fetalai mai lea o le ALI‘I ‘iā te a‘u, ‘ua fa‘apea mai, 3“‘Ua leva ‘ona ‘outou si‘osi‘oina lenei mauga, ‘ia ‘outou liliu ane i le itū i matū. 4‘Ia e fai atu i le nu‘u, ‘ia fa‘apea atu, o le a ‘outou ui ane i le tuā‘oi o ‘outou uso, o le fānauga a Esau, o ē nonofo i Seira, latou te matata‘u ‘iā te ‘outou, ia ‘outou lava;#Kene 36.8 5‘aua ne‘i ‘outou tau ma i latou, auā ‘ou te lē avatu ‘iā te ‘outou sina o latou fasi fanua, e leai sina mea e tusa ma se tulagāvae, auā ‘ua ‘ou avatu le mauga o Seira, o le tofi lea o Esau. 6Tou te fa‘atau mea e ‘ai mai ‘iā te i latou i tupe, tou te ‘a‘ai ai, o le vai fo‘i tou te fa‘atau mai ai ‘iā te i latou i tupe, tou te inu ai. 7Auā ‘ua fa‘amanuia oe e le ALI‘I lou Atua i galuega uma a ou lima; ‘ua na silafia lou sāvaliga i lenei vao tele, na ‘iā te oe le ALI‘I lou Atua i ona tausaga e fagafulu; e leai lava se mea na e mativa ai.”
8Na tatou ō ane nai o tatou uso le fānauga a Esau, o ē ‘ua nonofo i Seira, i le ala i le ‘ele‘ele laugatasi nai Elata ma Esiokape, ‘ona tatou liliu lea ma ō ane i le ala i le vao o Moapi. 9‘Ona fetalai mai lea o le ALI‘I ‘iā te a‘u, “‘Aua ‘e te fa‘asauā atu ‘iā Moapi, ‘aua fo‘i ‘e te tau ai se tau‘a ma i latou; auā ‘ou te lē avatua ‘iā te oe sina ‘ona fasi fanua e fai mou, auā ‘ua ou avatu Aro i le fānauga a Lota e fai mo latou.”#Kene 19.37
10Sa nonofo ai sa Ememā anamua, o le nu‘u lea e malolosi ma le to‘atele, e maualuluga fo‘i e pei o sa Anakī. 11‘Ua ta‘ua fo‘i i latou o tagata maualuluga, e pei o sa Anakī, a ‘ua fa‘aigoaina i latou o Ememā o sa Moapī. 12Sa nonofo fo‘i o sa Horī i Seira anamua, a ‘ua tulia i latou e le fānauga a Esau, ma latou fa‘aumatia i latou a‘i o latou luma, ma nonofo i le mea sa i ai i latou, e pei ‘ona faia e Isaraelu i le nu‘u ‘ua fai mōna tofi, ‘ua foa‘iina e le ALI‘I ‘iā te i latou.
13“O lenei, ‘inā tutū ia ‘outou, ma sopo‘ia atu le alia o Sareta.” ‘Ona tatou sopo‘ia lea o le alia o Sareta. 14O ona aso na tatou sāvavali ai nai Katesapanea, ‘ua o‘o ‘ina sopo‘ia atu o le alia o Sareta, e tolu sefulu ma le valu o ona tausaga ia; ‘ua o‘o ‘ina fa‘aumatia o lea tupulaga o tagata tau a‘i le toagalauapi, e pei ‘ona tautō ai o le ALI‘I ‘iā te i latou.#Nume 14.28-35 15Auā ‘ua o‘o ‘iā te i latou le ‘a‘ao o le ALI‘I e fa‘auma ai ‘iā i latou a‘i le toagalauapi, ‘ua o‘o ‘ina fa‘aumatia i latou.
16‘Ua i‘u fo‘i ‘ina ‘ua fa‘aumatia i le oti o tagata tau uma lava, a‘i le nu‘u, 17‘ona fetalai mai ai lea o le ALI‘I ‘iā te a‘u, ‘ua fa‘apea mai, 18“O le aso nei ‘e te ui ane ai i Aro o le tuā‘oi o Moapi; 19‘ae fa‘alatalata atu fo‘i e feagai ma le fānauga a Amoni, ‘aua ne‘i e fa‘asauā ‘iā i latou, ‘aua fo‘i ‘e te tau ma i latou, auā ‘ou te lē avatu ‘iā te oe sina fasi fanua o le fānauga a Amonī e fai mou, auā ‘ua ‘ou avatu ai i le fānauga a Lota e fai mo latou.”#Kene 19.38
20Na ta‘ua fo‘i lea o le nu‘u o tagata maualuluga, sa nonofo ai tagata maualuluga anamua, ‘ua fa‘aigoaina fo‘i i latou e sa Amonī o Samasuma. 21O le nu‘u lea e malolosi ma le to‘atele, e maualuluga fo‘i e pei o sa Anakī; a ‘ua fa‘aumatia i latou e le ALI‘I a‘i o latou luma, na latou tulia fo‘i i latou, ma latou nonofo i le mea sa i ai i latou; 22e pei ‘ona faia e ia i le fānauga a Esau ē ‘ua nonofo i Seira, ‘ina ‘ua fa‘aumatia e ia o sa Horī a‘i o latou luma, ‘ua latou tulia i latou, ma latou nonofo i le mea sa latou i ai, ‘ua o‘o mai lava i nei ona po. 23O sa Gavī fo‘i sa nonofo i Haserima e o‘o atu i Kasa, o sa Kafatorī na ō mai mai Kafatori ‘ua fa‘aumatia i latou, ma ‘ua latou nonofo i le mea sa i ai i latou.
24“‘Inā tutū ia ‘outou, ō atu ia, ma sopo‘ia atu le alia o Arinona; fa‘auta, ‘ua ‘ou tu‘uina i lou lima o Sekono le tupu o Hesepona o le sa Amorī, ma lona fanua, ‘ia e amata nei lava ‘ona fai mou, i le ē tau ai le tau‘a ma ia.#Nume 21.13-14 25O le aso nei e amata ai ‘ona ‘ou fa‘ao‘o atu le mata‘u, ma le atuatuvale ‘ona o oe i nu‘u o i le lalolagi uma, e lagona e i latou se tala ‘iā te oe, ma latou gatete, ma fa‘avaivai i ou luma.”
‘Ua Fa‘aumatia e Isaraelu le Tupu o Sekono
(Nume 21.21-30)
26‘Ona ‘ou ‘a‘auina atu lea o le savali a‘i le vao o Katemoti ‘iā Sekono le tupu o Hesepona, ma ‘upu o le filemū, ‘ua fa‘apea atu ai:#Nume 21.21 27“Se‘i ‘ou ui atu i lou nu‘u, o le ala tele ‘ou te savali ai, ‘ou te lē liliu ane i le itū taumatau, po o le itū tauagavale. 28‘E te fa‘atauina mai mea e ‘ai i tupe, ‘ou te ‘ai ai, ‘e te ‘aumai fo‘i ni vai i tupe, ‘ou te inu ai, nā ‘ona ui atu lava o‘u vae. 29E pei ‘ona faia ‘iā te a‘u o le fānauga a Esau, ē ‘ua nonofo i Seira, ma sa Moapī ē ‘ua nonofo i Aro, se‘ia ‘ou sopo‘ia atu Ioritana le nu‘u ‘ua foa‘iina mai ‘iā te i matou e le ALI‘I lo matou Atua.”#Nume 20.18, 21; Teu 23.3-4; Fa‘ama 11.17
30A ‘ua lē mafai Sekono le tupu o Hesepona ‘ona tatou ui ane i ai; auā na fa‘ama‘a‘a e le ALI‘I lou Atua lona loto, ma ‘ua fa‘afinauvaleina o ia, ‘ina ‘ia tu‘uina atu o ia i lou lima, e pei ‘ona faia i le aso nei.#Eso 4.21; Nume 21.23; Iosu 11.19-20
31‘Ona fetalai mai lea o le ALI‘I ‘iā te a‘u, “Fa‘auta, ‘ua ‘ou tu‘uina atu nei lava o Sekono ma lona nu‘u ‘iā te oe, ‘ia e fai nei lava mou lona nu‘u.” 32‘Ona latou ō mai lea o Sekono ma lona nu‘u uma e fa‘afetaia‘i ‘iā i tatou e tau ai le tau‘a i Iaesa; 33na tu‘uina mai fo‘i i latou e le ALI‘I lo tatou Atua ‘iā te i tatou, ‘ona tatou fafasi ai lea ‘iā te ia, ma ona atali‘i, ‘atoa ma lona nu‘u uma. 34‘Ona tatou ā‘ea ai lea ona ‘a‘ai uma lava i ia ona po, ma tatou fa‘aumatia o tane, ma fafine, ma tamaiti i ‘a‘ai uma lava, ‘ua leai se tasi na tatou fa‘atoeina; 35na o manu na ‘ave ma tatou, ‘atoa ma vete i ‘a‘ai na tatou faoa. 36E āfua mai i Aroeru, o i le ‘auvai o le alia o Arinona, ma le ‘a‘ai i le alia, ‘ua o‘o atu i Kiliata, e leai lava se ‘a‘ai na sili lo latou malosi i lo tatou, ‘ua foa‘iina mai uma e le ALI‘I lo tatou Atua ‘iā te i tatou.#Iosu 13.9-10; 12.2 37Na o le nu‘u o le fānauga a Amoni na e lē o‘o i ai, o se mea e tasi e latalata ane i le alia o Iapoka, po o ‘a‘ai o i mauga, po o se mea na vavao mai ai e le ALI‘I lo tatou Atua.
Currently Selected:
Teuteronome 2: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.