1 Timoteo 3
3
O le Galuega ma le Amioga a Epikopō ma Tiakono
1O le ‘upu moni lenei, ‘āfai e naunau se tasi i le faiva o le epikopō, e mana‘o o ia i le galuega lelei.#Galu 20.28 2O lenei, e tatau i le epikopō ‘ia lē mata‘uleagaina, o lē faiavā i le fafine e to‘atasi,#3.2 o lē faiavā i le fafine e to‘atasi: po o sa na o le tasi lana fa‘aipoipoga. o lē fa‘autauta, o lē mafaufau, o lē amio mamalu, o lē alofa i tagata ‘ese, o lē na te mafaia ‘ona a‘oa‘o atu. 3E lē se inu tele i uaina, e lē se fasi tagata, ‘ae agamalū, e lē se fai finauga, e lē se matape‘ape‘a i tupe. 4O lē pule lelei i lona lava ‘āiga, o lo‘o ‘ua usiusita‘i mai ‘iā te ia o lana fānau ma le fa‘aaloalo lava.#1 Samu 2.12 5Auā ‘āfai e lē iloa e se tasi ‘ona pule i lona lava ‘āiga, pe fa‘apefea ‘ona tausia e ia le ekalesia a le Atua? 6E lē se fa‘ato‘ā lotu, ne‘i fa‘afefeteina lona loto, ‘ona pa‘ū lea o ia i le fa‘asala a le tiapolo. 7E tatau ‘ona ia logoleleia o ia e i latou o i tuā, ne‘i ‘upuleagaina o ia ma pa‘ū i le mailei a le tiapolo.#1 Timo 5.10; 2 Kori 8.21; 1 Kori 5.12-13
O ē e Fesoasoani i le Ekalesia
8O tiakono fo‘i, ‘ia fa‘apea ‘ona fa‘atoeaina i latou, e lē fa‘agutugutulua, e lē fia inu uaina e tele, e lē manumanu i ‘oloa.#Fili 1.1; Galu 6.3 9O lo‘o latou tāofi i le mea lilo tau le fa‘atuatua i le loto fuatia ifo ‘ua mamā. 10A o i latou fo‘i, ‘ia muamua ‘ona tofotofoina o i latou, ‘ona latou faia ai lea o le faiva o le tiakono, ‘ina ‘ua lē mata‘uleagaina. 11O fafine fo‘i, ‘ia fa‘apea lava ‘ona fa‘amatuāfafine i latou, e lē ni fa‘atuaupua, a ‘ia fa‘autauta, ‘ia fa‘amaoni i mea uma lava. 12O tiakono, ‘ia ta‘itasi ma lana avā e to‘atasi,#3.12 ‘ia ta‘itasi ma lana avā e to‘atasi: po o sa na o le tasi lana fa‘aipoipoga. ‘ia pule lelei i la latou fānau ma o latou lava ‘āiga, 13Auā o ē ‘ua lelei ‘ona fai o le faiva o le tiakono e fai mo i latou lava le mamalu lelei, ma le fa‘amalosi tele i le fa‘atuatua o lo‘o ‘iā Keriso Iesu.
O le Mea Lilo Sili
14‘Ou te tusi atu ia mea ‘iā te oe, o lo‘o fa‘amoemoe a‘u ‘ou te vave alu atu ‘iā te oe. 15‘Ae ‘āfai ‘ou te tuai atu, ‘ia e iloa ai lau amio e tatau i le fale o le Atua, o le ekalesia lea a le Atua soifua, o le poutū fo‘i lea ma le lagolago o le ‘upu moni.#2 Timo 2.20; Efe 2.19-22 16‘Ua leai fo‘i sē tāofi ‘ese, e sili lava lenei mea lilo i la tatou lotu.#Ioane 1.14; 16.10; Roma 1.4; Mare 16.19
‘Ua fa‘aali mai o ia i le tino tagata,
‘ua fa‘aalia lana amiotonu e le Agaga,
‘ua va‘aia e agelu.
‘Ua tala‘iina atu i nu‘u ‘ese,
‘ua fa‘atuatua i ai o ē o i le lalolagi,
‘ua ‘aveina a‘e i le mamalu.
Currently Selected:
1 Timoteo 3: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.