ESEKIELE 1
1
NA MARUTEHA GI TAGE IANA O ESEKIELE RENIA GOD
(1.1—7.27)
Na atohana God
1Igê na rimata na tangiana igê na heta na hageha igê na tangahuruta gi oru na harisi inê o Esekiele na mane ni vogasiha, karena o Busi, inê kê marute, vi na vavearo ki tahataha, ma kê bâsia God. I na matena ngekana inê kê goga hagarangia na ve i Kebare henira na enoni getera, ga bani henahuraura igê tanga i Babilonia. 2Ngaia ki na rimata na harisi i murina ga henahuraua na maneraha o Jehoiagino tanga i ngekana. 3I ngekana i Babilonia hagarangia na ve i Kebare inê kê rongoa igê na Araha, i tamasi tangê ma ki angariê.
4Inê kê sira râ, ma kê rigia na roga na avarosi. Na marangea ki marangea me tenia na roto raha. Na vavearo rihia na roto ki marara. Igê na roto, i râ me tenia na marangea, ta na marâ ki mave igê manga na kapa, i togatoga. 5I gupuna na roga raha inê kê bâsia igê na marâ ge he, ga mauri. Ngaira ka bâ mangara na enoni. 6Na ara ni hitangita ki tonga re na maana ge he ma na gagahana ge he. 7I oto na êgata. Ngaira ka tonga re na misini na êgata mangara na puruka. Ngaigi ki togatoga manga na kapa. 8Na ara ni hitangita ki tonga renigi na maana ge he ma na gagahana ge he: tani i otona, tani na gagahana i mahana, tani i matona, ma tani i gerina, ma tagenani ma nikâ na maana. Na ara ni hitangita ki tonga renigi nikâ na rimana ge he. Na rimana ki oga tonganigi na ruguhani na gagahana. 9Na ara ni hitangita na marâ, ga mauri ngegana, ki gasirerua na gagahana gi rua, ma ngaira haku ki puru haku na taretareni na gagahata, ki rihu ki taku. Matena ga arâ, naka ma tanga i he, ngaira ka oto vê ka arâ igê, ma ki mareha vige apapariri rârâ.
10Na ara ni hitangita ki tonga re na maana ge he, ga bâ hegitigi: na maana i manga na enoni; i otona ki oga igê na maana, i manga na maana na laione; i mahana ki oga igê na maana, i manga na puruka; ma i gerina ki oga igê na maana, i manga na ahetaronga. 11Na ara ni hitangita na marâ, ga mauri ngegana, ki gasirerua akê na gagahana gi rua, ma ngaira haku ki puru haku na taretareni na gagahata, ma na ara ni hitangita ki rumirerua so na gagahana gi rua. 12Na ara ni hitangita na marâ, ga mauri ngegana, ki maatigi na ruguni ge he na maveta. Igê na tarana ngekana ngaira ka oto vê ka arâ, naka ma tanga i he, ma ki mareha vige apapariri rârâ.
13I berarogata na marâ, ga mauri ngegana, ki oga na marâ, i bâ mangagi na garaputani na gi, se mangagi na ahame i mave, i guruguru rârâ. Na gi ki rogatenigi ma ki marangea. 14Na marâ mauri ngegana ka guruguru rârâ nogata mangagi na marangea.
15Matena gê boretenira na marâ mauri ge he ngegana, inê kê bâsigi na wili ge he, ga pu so i ano, na ani gi tage i na apanena na ara ni hitangita. 16Na wili ge he ngegana ka tage tora ma. Na ara ni hitangini ki togatoga manga na hê ahe, ma ki kumu hagarabo i raroni tani. 17Igê na tarana ngekana ngaira ka girara ga oto vê ka arâ, naka ma tanga i he, ma ki mareha vige apapariri rârâ. 18Ngaira ka raha teha ngavê, ma ka tonga rako na maata igê na apaneta hura. 19Na ara ni mateni na marâ, ga mauri ngegana, ka arâ, na wili nogani ka tage arâ henira. Na ara ni mateni na marâ mauri ka akê i haha, na wili nikâ ka tage akê henira. 20Na marâ mauri ka arâ i na agua mavê, ga obania, ma na wili ka tage arâ henira tare, suria na marâ mauri ka angarigi. 21Tahema i na ara ni mateni na marâ mauri ka arâ, se ga rêra so, se ga akê i haha, na wili nogani nikâ henira. Matena gê bâsia vikana, inê kê susure. Na bêku ki puru i ano.
22I avorani na bêta na marâ mauri ki oga igê na marâ, i bâ manga na gerina na ruma buni, i togatoga ngavê manga na hê misini bo. 23Na marâ mauri ka oga i ruguhana. Na ara ni hitangita ki gasirerua na gagahana gi rua, na ani tanga na tamana i otona, ma tani tanga na tamana i mahana, ma ta na gagahana gi rua ki rumirerua so i apena. 24Matena ga gaha, inê kê rongogi na avoavoni na gagahata. I rongo manga na asi i maguhu, se mangara na mane ni me ga nagiakuruhi, se manga na ringena God raramohaga hunia. Matena ga vato so ka rêra, ngaira ka rumigi so na gagahata. 25Ma na ronguhani na gagahata ki arâ mênga me tenia i agua i ahaha igê na agua, i bâ manga na gerina na ruma buni i avorata. 26I avorana na marâ ngekana ki oga igê ta na marâ, i bâ manga na âgâga na hê marava, i togatoga ngavê. Ma igê na âgâga ngekana ki oga igê na marâ, i bâ manga na enoni. 27I gupina ki akê, ki mave manga na kapa i togatoga renia na mavetana na gi rihia. I gupina ki vato, ki manga na gi, i rihia, ma ki bâ manga na rorovagaro. 28Na tarani ngegana ka hagabângenia, vi na raramohana God ki oga i ngekana.
Currently Selected:
ESEKIELE 1: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific