ANGIHA MARAMARA 5
5
Na nungi ni hetakiha
1Araha, gu takusigi na eraha, ga tarahugami.
Bâsia na makiha ki nahuigami.
2Na ai mahuara ka parênigi na mako iamami.
Na merongamami ka ogasigi na hinua iamami.
3Ngaira ka bani nahuira ka me na vaemamami.
Na kenamami ngaira ka nâ.
Igami kami vora re na kare banogo.
4Igami kami vurigi na ve mi tonomigi.
Na ario nikâ kami vurivuri.
5Ngaira ka hagatagarahigami bâraha
ma ka hagamamasiagagami ngavê.
Igami kami mangusi ngavê na apemami.
I mareha ngavê vi na mamaroha.
6Igami kami nungira na ai ni Esipito me Asiria,
ka tamanigami renigi na ngauha,
hanana ma vigami mauri renigi.
7Na êvarimami ka tasi,
ma ngaira ka bani magahuru.
Ma igami kami mamasiaga
meni na tasi iata.
8Igami ka marungigami na enoni rakuraku.
I mareha ngavê ta na enoni,
ge girara, vige hagatahigami tenira.
9Matena mi totora ngêra i mu,
igami kami arâ mamagura,
suria na manero ka gamorahigami.
10I mahanaga na apemami renia na matoroha,
suria i ramo na magêha i apemami.
11I hungana i Sione ka tutugurira igê
na gete iamami ka rongo era henira
ma na kare viru iamami nikâ
surigi na hinua hato i Juta.
12Ngaira ka riguira na enoni raha iamami
ma ka pe hagahigasira na meraha.
13Ngaira ka hagatagarahira bâraha i mu
na mane na gapu haoru iamami.
Na kere mane ka migitariahehu na ario,
suria i higera.
14Na bani nuni ki hato,
vige page oga nikâ igê na tavani ogaha.
Ma na enoni haoru ki hato,
vige page ki nikâ, se vige page mâ nikâ.
15Na vagevageha ki bani hato vê tenigami.
Na angiha maramara kani urusia na mâha.
16Na ara na marâ mi ageagesigi
ka bani mutemute vê tenigami.
Igami kami tasi.
I era ngavê tangagami.
17Igami kami oba era ngavê.
I hara na mamami,
suria mi angisia i Sione.
18Na hungana i Sione ki hihiruga
ma ki aruhuruhu ngavê.
Na o vasiga ma kani ga ogasia.
19Ma igo God, igo ko Araha tare ma tarema.
Na arahanga iamu ki asa, vige page hato.
20Igo ko kasi renigami ngavê vari?
Igo ko page takusigami aporo vari?
21Araha, gu toregami aporo tangago.
Katogami, kami aporo tangago.
Gu katogami, kami oga aporo manga i nago.
22I hega, go rumakaka renigami ngavê vari?
I hega, na mangariaganiha iamu ki asa vari, vige page hato?
Currently Selected:
ANGIHA MARAMARA 5: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific