ROMANI NA KIHA 7
7
Na mane
1Baharamu iaku.
Na tohomu!
Na ababani ugamu igê na santere
karu bâkoro ngavê.
Na tangamu karu arige
manga na garo bara
i tagarahia na mane i manisingenia.
2Na pomu ki arigokogoko manga na apira
i vunuvunu tare renia na vaini.
Na obamu ki manga na koni ga rurura
i gupuni na garoro taku bâkoro.
3Na susumu karu mangarerua
na kare papa na goti vasiga.
4Na riomu ki maratorana
na rivona na pusuasi.
Na maamu karu maratorani
na nonganonga i Geseboni,
ga hagarangia na maani para ni hinua.
Na barisumu ki riki hura
manga na bebetehe i Libanone
i anumasia i Tamasiko.
5Na bêmu ki akê
manga na hungana i Karamele.
Na hirihiriana ni varehumu
ki togatoga manga i rotorotoaga memera.
Na bâkorohana na varehumu
ki hagarigu parongana na maneraha.
6Go bâkoro taraha!
Na tohomu!
Na vagevageha ki teha ngavê
renia na hetakuiha iamu.
7Na bâkorohamu ki manga na ni.
Na susumu ka na gena na ni.
8Inê be hane na ni ngekana
ma be husi na guani.
Tangê inê, na susumu
ka na parani na vaini.
Na manavasua iamu
ka na unuhani na gahiga.
9Na haramu ki mamaki
manga na vaini mora.
Na gete
Na vaini ke gogo ototo râ
tanga na baharana iaku
ma ke monamonaga
i gaviharana me rivona!
10Inê kani iana baharana iaku
ma ngaia ke vanasiê.
11Barokomu, garu hura karu râ i bemu
ma karu tâ i berarogani na mahe.
12Igê na mahogotana karu riterite,
hanana garu haharirigi na vaini
manga vi ngaigi ki papêhu
manga i he kaniga ahaketa na takani
ma ki manga i he kaniga ka takataka na gahiga.
I ngekana inê be megomêru igê.
I ngekana ki na ruma iakerua.
13Na ria ki unuha i ngekana
ma na apinige hato ga mamaki na guani
ka akê i ngekana.
Na girarani hato na hetakuiha ngegana,
na bani ani ma na ani haoru,
inê kê bani nakagi tangago,
barokomu iaku.
Currently Selected:
ROMANI NA KIHA 7: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific